Zaandhuzen

Weeromme naor Artikelen
Home


Zaandhuzen

Plaetselik Belang van Zaandhuzen dee neffens de Aanpakken op 15 augustus van et veurig jaor, B&W en et gemientebestuur in Wolvege kond van heur ‘verontrusting’ m.b.t. de braandveiligens in heur dörp. Gien onbelangriek onderwarp, zo donkt mi’j. De ienige tiedinge die PB sund die tied weeromme kreeg was van elk een ontvaangstbevestiging van heur brief. Now het Zaandhuzen heur gemientebestuur -hiel terechte- veur de klachtekemissie daegd en beticht PB et gemientebestuur van ‘zeuven doodzunden’ (LC 31-1). Een peer jaor leden het disse gemiente ok al es een uutbraander van hogerhaand had wegens de miskommunikaosie mit heur burgers. Daor zollen doe hadde veraanderings in kommen neffens borgemeister Heite mar zien baentiesmannen hebben bliekber toch niet al te vule mitkregen van zien donderpreek. Mar let op, now hebben B&W ’t uutvunnen. Zi’j stellen veur om een bedrag van € 100.000 (!) beschikber te stellen om een extern buro een ‘suggestie’ doen te laoten hoe as de gemiente in ’t vervolg beter mit heur inwoners kommuniceren kan. Veur zoe’n bedrag willen B&W een repot maeken laoten waor dan naor alle gedaachten in komt te staon daj’ je as gemientebestuur gewoon netties beheuren te gedregen tegenover je burgers. As ze dit op et gemientehuus now zels al niet bedaenken kunnen -en veur dat geld- wat zollen ze dan eins wel kunnen vraog ik mi’j of. Krek as heur kollega’s, de boompiesrooiers van ’t Oostaende, zullen ze et op ’t heden wel te drok hebben mit de ni’jbouw en inrichting van heur gemientepeleizen.


© Piet/er Bult