Wakker van viene
Weeromme naor Essays
Weeromme naor Stellingwarfs
Home
Wakker van viene
Wakker van Viene (in 't veurend)
Zo as wel vaeker gebeurde -a'k es eventies niet thuus was- ston Andries
zien auto op die dag in jannewaori es weer bi'j oons op de oprit. Doe
'k de kaemer inkwam stokte de praoteri'je tussen him en mien maegien
Monique. Ze hadden et daenk ik -zoas meerstal et geval was- vaaste weer
over heur peerden had. Disse keer was hi'j -meer nog dan aanders- slim
aordig tegen mi'j en zee "'k Mos jow krek hebben", en d'r drekt
aachteran "Wo'j mit mi'j mit naor een kursus 'Stellingwarfs'?". Beduusd
van zoe'n malle vraoge, wa'k even stille en hebbe doe zonder an te
vraogen toezegd da'k graeg mit him mitgaon wol. Ja, en dan is't bi'j
Andries now ienkeer zo, dat aj' "ja" zegt hebben, daj' d'r dan ok
geliek an vaaste zitten.
Doe Andries, nao nog een leste bakkien koffie weer votgaon was vreug
mien Monique kwaanskwies naor de aachtergrond van mien -zo vlot-,
ja-zeggen. "Waorom woj' aenliks mit him mit naor zoe'n kursus, et hiele
levend is toch al iene grote leerschoele?". Deur disse vraoge mos ik
dus wel even naodaenken over mien (misschien wel te?) gauw neumen
beslut. Nao wat kopbrekens he'k mar tegen heur zegt dat et mi'j in't
veurste plak gaot om de sociaole kontakten die aj' daor wellicht opdoen
kunnen. Veur mi'jzels doch ik meer an een wat zinniger
vri'jetied-bestedinge as altiet mar heur helpen mit tuunschoffelen en
patties anvegen. Mar dat kuj' vanzels zo niet tegen heur zeggen.
Now a'k mi'j dan opgeven hebbe wo'k d'r ok mar volut tegenangaon. Nao
elke aovend wo'k ok mar es perberen om wat te schrieven in de tael die
as ik al zoelange, wel praote mar waor a'k nooit een letter in schreven
hebbe. Een aordige bi'jkomstighied liekt mi'j, da'k een elk, deur disse
schrievere'je -vanut mien 'point of view'- een betien op de hoogte
holen kan van mien bevienings. En wie wet, misschien kan de
kursus-leiding der ok nog wat van opstikken. 't Is, daenke ik, veur
heur ok altied goed om te weten hoe as een aander daenk't over heur
inspannings.
Wakker van Viene
31-01-2002 (1-ste aovend) GBD-GL
Now, op disse dattigste jannewaorie is et dan zoveer. De eerste
kursus-aovend. Stief tegen halveachten bin'k deur Michel mit de auto
anhaeld en togen we'j naor Berkoop. Wi'j weerden al drekt bi'j de
veurdeure mit een waarm haandschudden inhaeld deur -zo dee later
blieken- Geert. Hi'j wees oons naor een grote kaemer an de linkerkaante
van de vestibule. De meerste kursisten bleken d'r al te wezen. An de
deftig in 't ronde opstelde vierkaante taofelties zaten al een man of
tiene mit de frouluden een stokmennig in de minderhied.
Om krek halveachten gaot een, zo te zien slim aordige dame van
middel-baore leeftied staon, en vraogt oons aller andacht. 't Leek mi'j
echt zoe'n lieve schoeljuffer van zegge de eerste of twiede klasse.
Zi'j stelde heurzels veur as Grietje; Grietje Bosma - Dijkstra uut
Wolvege. Mien inschatting van leeftied en wark kwam aordig overien. Al
hiet de eerste klasse van een legere schoele tegenwoordig 'groep drie'.
Mi'j ok goed. Grietje het naost heurzels ok de twie manluden van de
leiding veursteld. Dat weren Pieter Jonker, direkteur van de Stichting
Stellingwarver Schrieversronte (vrogger wodde hi'j -naor ik miene-
altied Heufdmitwarker nuumd) en de man bi'j de veurdeure bleek Geert
Lantinga. Hi'j zol een hiele protte ofweten van de stallingwarver
cultuur en historie.
Doe Grietje mit heur inleiding klaor was, gaf ze et woord an Pieter. 't
Leek wel afpraot wark. Pieter het oons nog es opni'j van harte welkom
hieten, mar waor as et him eigenlik omme gaon was, was de centeraosie.
Hi'j wol mar wat graeg de 40,84 euro mit ons ofrekenen. Nao et betaelen
mossen wi'j verplicht een stok of viere leesboeken mitnemen, die as
wi'j in de loop van de kursus mar es goed lezen mossen. Doe Pieter de
centen binnen had en zien boeken kwiet was, was hi'jzels ok al rap en
stillegies vertrokken.
Grietje nam doe et woord weer en vreug oons om in groepies van twie
bi'jmekaere zitten te gaon om mekaer wat uut te heuren. 't Zol et
mooiste wezen as d'r een Stellingwarver autochtoon bi'j een
import-Stellingwarver zitten gaon kon. Twie verplichte vraogen mossen
wi'j teminste an de aander stellen: 'Waorom bi'j hiere' en 'Wat
verwaachten jow van disse kursus'. In dezelde tied kregen wi'j d'r van
Grietje een koppien koffie bi'j. Nao een menuut of tiene gong elkeniene
weer op zien plak zitten en mossen wi'j omstebeurten vertellen wat wi'j
zoal van die aander gewaer wodden weren.
Nao et vertellen van de -soms slim intieme- gewaerwordings gaf Grietje
et woord an Geert. Mit graegte ging disse man d'r van tussen in zien
uutleg over et ontstaon en de ontwikkeling van de Stellingwarven. Hi'j
gong zoemar in een drieketier tied, van zo'n
honderd-vuuf-en-twintig-duuzend jaor leden terogge naor de dag van
vandaege. Tjonge, wat kon die man slim anstik'lik vertellen. Naost et
geluud van zien dud'like stemme hadde hi'j d'r ok nog plaeties bi'j.
Veur mien geveul zagen de plaeties d'r trouwes haost allemaole et zelde
uut. Mar, zo as Geert d'r bi'j vertelde! Jow konnen et grös heuren
gruuien in 't lege laand stief tegen de Kuunder en de Lende. Op de hoge
stokken wodde woond. Ok koj' in zien verhael et zuuite waeter van de
Kuunder stromen zien van heur oorsprong boven Oosterwolde tot in de
-doe nog- zilte Zuiderzee. Doe Geert, al kiekend op zien klokkien zag,
dat zien tied d'r al haost opzat, begon hi'j wat te raffelen, want hi'j
wol zo graeg nog vule meer vertellen over bevobbeld de ribben, de
keliezen en de schaope(waskers)dobben. Een aandere keer wi'k d'r graeg
meer van heuren.
Op'e drumpel van et votgaon kregen wi'j van Grietje nog wat huuswark
mit. Wi'j mossen de de beroemde Stellingwarver klaanken 'ae' en 'ao'
mar es goed bestuderen.
Wakker van Viene
07-02-2002 (2-de aovend) GBD
Op 'n paer nao, zitten zi'j allemaole al te plak as wi'j -Michel en
ikke- binnenkommen. Grietje, de zelde as van de veurige weke, dielt
eerst een opdracht van Geert even uut. Daorin vraogt hi'j oons om "Een
historische opdracht" te maeken. Hi'j zal wel een opdracht bedoelen die
over de historie gaon moet daenke ik; een historische opdracht is al es
maekt, bin ik van gedaachte. Dan gaot Grietje an et heufd van de taofel
zitten en zet uut aende. Zi'j wiest iene mit een gelosie an die as de
tied bi'jholen zal en dan moeten wi'j -de hiele kring in 't ronte-
omstebeurten zoe'n halve menuut volpraoten over wat as wi'j vandaege
zoal daon hebben. Zo now en dan gript Grietje in om hier en daor een
woortien te verbeteren of een begrip toe te lichten. Zo wodt d'r
morgens bi'j de iene brood eten dat deur een mem klaorzet is en bi'j
een aander wodt d'r ok wel deur een moeke, botter op een plakkien bolle
smeerd. D'r was zels iene die vertelde dat hi'j meerstal koffie op
bedde kreeg. Niet te leuven!
Nao disse ronte dielt Grietje een blattien uut mit een wark van Harm
Houtman. Et is et stokkien "Michiel zag et" uut zien boek "Onder eigen
volk". Alweer ombeurten moeten wi'j hier een riegeltien of tiene uut
veurlezen. 't Gaot over een briefien van honderd gulden dat een aende
mit de trein mitreisde. Dat pepiertien (mit een prentien van Michiel
Adriaensz. de Ruyter) is trouwes krekleden ofschaft as betaelmiddel. Ok
in de Stellingwarven biwwe overgaon van de gulden naor de euro. Een
stok of drie meensken hadden dat briefien dus op de grond in de trien
liggen zien. Gieniene hadde et lef om 't van de grond op te pakken. Op
't laest van 't verhael, bleek et onder an een tasse plakt te wezen
waorin as bliekber een pot mit stroop ommevalen was. Uutaenlik gong de
gattiesknipper van de trein d'r mit henne. De meraol van 't verhael:
"Waor as drie meensken in gedachten vechten om een briefien van
honderd, giet de vierde d'r mit an de loop".
Nog zoe'n gezegde of spreuk, kwamen wi'j in de doe volgende opgaove
tegen. Wi'j kregen een diktee veurzet. "Die naachs uut visken gaot,
moet daegs de netten dreugen" zee Grietje. Ze las een stokmennig van
dat soorte van riegelties tekst veur, die as wi'j op een pepiertien
opschrieven mossen. Et klamme zwiet brak mi'j now zo langzaomerhaand
toch aordig uut. Bi'j de veurige keer vergeleken wodde et now, verduld,
nog hatstikke serieus anpakt! Onder 't naokieken van et diktee was d'r
gelokkig een bakkien troost mit een plakkien koeke. An al die diepe
zuchten om mi'j henne te begriepen, hadden de meersten et daor now ok
wel an toe.
De koffie nog waarm achter de koezen, gaot et d'r al weer ommeweg mit
Grietje. Wi'j mossen oons bugen over "De laeste schoeledag" en "'t Kwam
van 't roken" uut H.J. Bergveld zien bundel "Klaeterjaegers". Vot'n
daoliks d'r achteran ok drekt mar een stokmennig riempies, gedichies en
ere proza o.e. "Een immigrant" van Peggy Klinkhaemer, "Rusten" van
Roelof J. Oosterhof, "De warkloze" van Jan van Overtjonger,
"Stoppelkattien" van Lamkje Hof - De Boer en "Hoe bestaot et" van Johan
Veenstra.
Zo tegen halftiene had elkeniene de piepe toch wel aordig uut donkt
mi'j. As huuswark kregen wi'j nog wel eventies van Grietje te heuren
dat wi'j de kotte verhaelen uut et warkboek mar es goed deurlezen
mossen en dat wi'j toch echt, ok niet te lange waachten mossen mit et
lezen van de vier boeken die as wi'j de veurige weke van Pieter
mitkregen hadden. Ze haemerde d'r nog mar es op dat, aj' dat lezen van
die boeken op et laeste van de kursus deden, dan koj' et zo kot veur de
tied, wel es slim muuilik kriegen mit et examen. Hiel stiekem hebbe ik
toen docht dat, a'k Pieter now zag, ik misschien mien kursusgeld wel
teroggevraogd hadde. Mar gelokkig (en allienig daoromme) dawwe Pieter
disse aovend niet troffen hebben.
Wakker van Viene
14-02-2002 (3-de aovend) PJ
Opni'j toogden wi'j vanaovend naor Berkoop. Wi'j kwamen zo ongeveer
midden in de meute an en zochten een plakkien an iene van de
taofelties. Vule tied hadden wi'j niet te vergriemen want -nao achterof
blieken dee- hadden wi'j disse aovend een hiele 'strenge' kursusleider.
Een echte schoelemeester zo as hi'j zels vertelde. De naeme was/is
Pieter Jonker. Hi'j komt van 'e Haule en hi'j hadde vrogger studeerd
aan de Pabo in Drachten. Doedestieds nuumden zi'j dat nog gewoon een
kweekschoele naor ik miene. Pieter zee ok nog dat hi'j dit wark een
aovend of drieje in 't jaor dee. Hi'j wol zich op zoe'n aovend dan ok
graeg uutleven. Wi'j weerden waorschouwd!
Zo as meesters wel vaeker doen, begon Pieter mit et uutdelen van
briefies. Nao 't laeter blieken dee weren dit briefies "In
voegelvlocht". Hi'j het et niet mit zovule woorden zegt, maor et dee
mi'j slim daenken an iets wa'k al eerder lezen hadde. Verduld, et leek
krek al hadde Pieter disse 'Voegelvlocht' overneumen ut et boekien van
Henk Bloemhoff, nuumd as "Hoe schrijf je 't Stellingwerfs?". Ja, zo kan
ik et ok vanzels. Hier en daor wat ere woorties bruukt, mar veerder
veur et grootste pat overschreven!. 'k Zal et nog wel es an de odder
stellen.
An de haand van et veurste blad van die Voegelvlocht-briefies mossen
wi'j de klaanken "ao", "ae", "aa" en "a" bestuderen. Dat hadde Grietje
ok al es vraogd. 't Laeste briefien wawwe kregen was een invulbriefien
waor as wi'j disse kombinaosies van letters in bruken mossen. Veertien
riegelties laank klaeterde et waeter tegen de glaezen en vleugen de
baorden mit gries haor deur de kaemer, in een huus dat an de vaort op
de kaorte ston. Dat een taofelblad niet praoten kan en an gesnaeter
gien aende komt, dat wussen wi'j eins allemaole al. Mien risseltaot was
-'t zal beginnersgelok west hebben- een dikke tiene.
Nao et eerste, kregen wi'j nog zoe'n briefien. Et gong hierbi'j om
woorden as: peer, meensken, thuuskommen, veurjaorberaod, bluuiende
zoegepap en sepiepen, gremietig kieken en wif staonde taofelties in
huzen mit grune loeken. Waoromme et geveerlik is om je in Berkoop te
verpraoten is mi'j niet hielendal duudlik wodden. Een protte fouten
weerden maekt doe zi'j wat onder de schölk dreug. Mar dat geft wel
vaeker een boel argewaosie. In dit stokkien ha'k wel twie schrief- en
iene tikfout maekt. Dat was te verklaoren -zo zee Pieter- deurdat op
verschillende plakken in de gemeente de klaank bi'j et praoten mar al
te vaeke stark ofwiekt van waj' schrieven.
Mit al zien uutwijdinge over leterties, woordties en zinnegies weer et
al aordig laete wodden mar ok disse Pieter wus van gien opholen. Hi'j
begon -alweer as een echte schoelemeester- een diktee veur te lezen.
Wi'j mossen opschrieven wat as hi'j veurlas. 't Gong bevobbeld over 't
naor huus gaon en dat 't Stellingwarfs een tael wezen zol en zo
veerder. Dat de Kaastdaegen en Paosken niet op dezelde dag veulen dat
wussen wi'j ok wel mar dat Pieter vaeke de hiele dag tot 't raem uut
staot te kieken, dat ha'k niet van him docht.
Tot nao de klokke van halvetienen gong hi'j deur. Zien laeste opdracht
van disse aovend was 't opgeven van niet te zunig huuswark. Opni'j
begon hi'j briefies uut te dielen en daor mossen wi'j dan thuus mar es
naor kieken. In de gauwegiet en an al dat thuuswark he'k al zien, dat
Pieter him, ok nao vanaovend nog, in zien gedaachten nog vaeke een
schoelemeester vulen zal. Mar 't was vanaovend opni'j wel de muuite
weerd om hierhenne te kommen. Aankem/Toekem weke mar weer es kieken.
Wakker van Viene
21-02-2002 (4-de aovend) HB
Et eerste ure van disse aovend moest ik et laoten ofweten deur een slim
geval in de femielie. Nog krek veur de koffie kwam ik binnenvalen. Zo
te zien was elkeniene veerders wel al anscheuven. Veur et eerst was de
leiding van disse aovend in hanen van Henk Bloemhoff. Al naor gelaank
de aovend vodderde wa'k eins mar wat bliede da'k wat laeter kommen was.
Wat kon disse meneer Bloemhoff alderverschrikelikst aemelen over
kommagies, punties, dee's en tee's. Niet dat de man gien geliek hadde
of niet aordig was, mar ...
An de haand van een deur himzels schreven boekien "Hoe schrijf je 't
Stellingwerfs?" gongen wi'j et hiele alfabet deur. Een gelok bi'j een
ongelok was wel, dat een hieleboel woorties niet altied allienig mar
goed schreven weren zoas et in zien boekien ston, mar dat er nog pattie
aandere meugelikheden wezen zollen. Mar et liefst zag Henk et zo as et
in zien boek beschreven was. Dat zol ik ok zegt hebben, as ik zoe'n
mooi boekien schreven hadde.
Doe et oons mittertied haost te vule wodde, kwam Henk mit een diktee
anzetten. Ie konnen an zien gezicht zien dat hi'j d'r aordighied an
kreeg as bi'j mennig van oons de zwietdruppelties op et blattien pepier
veulen. Hoe meer zwiet, destemeer Henk zien heufd begon te glimmen van
-ik daenke- plezier. Et diktee gong over maegies (gien maechies) die
heur hanen (gien haanden) beter mit ziepe wasken konnen. De twiede
riegel gong over grös dat te kot mi'jd was. Zo gong et mar deur mit een
flinke bujje in de vaort van Appelsche die ok al stiefvol mit
plezierboties lag. Toen d'r ok nog oolde vrommesies anfietsen kwamen
die goenend zochten die an et eierzuken wezen zollen, doe hadde ik de
boek wel vol.
Nao opni'j weer een slag deur zien boekien mossen wi'j doe as een
volleerd redaktiemitwarker van een kraante, in een stokmennig
kraanteriegels de verkeerd schreven woorden deurhaelen. Et bleken
riegelties uut een veurseleksie van et 'groot Stellingwarver diktee' te
wezen. Nog mar net an de helte zi'j Henk dawwe hier toch mar mit
opholen mossen en dawwe de rest thuus mar naokieken mossen. De man
scheen d'r warkelik plezier an te beleven dat wi'j et mitmekere zo
muuilik hadden. Een, bliekber echt schreven stokkien uut een kraante,
van Jehannes Stellingwerf gong mi'j haost te veer om mi'j daor warkelik
mit bezig te holen. 't Was nog mar krek halftiene doe Henk aendelik
ophul mit zien pesteri'je. Aanders kan ik et niet zien.
As huuswark mossen wi'j de eerste 24 bladzieden uut Henk zien boekien
de volgende weke uut 't heufd leren. De al eerder nuumde
kraante-riegelties mossen wi'j nog naokieken en dat stokkien tekst van
Jehannes Stellingwerf bestuderen. Ik geef et je te doen! Allienig al
die 24 bladzieden! Gelokkig begint et boek pas bi'j bladziede vieve mit
een 'woord vooraf', zodawwe de aldereerste viere al gauw verdiend
hebben. Op et blatziede viere in dat boekien ston, dat veur wat de
centeraosie anbelangt, de perveensie Fryslân mithulpen het. Daor kan'k
mi'j toch eins niks bi'j veurstellen. Dat Fryslân investeert in et
Stellingwarfs! Of 't moet al om een hiel bescheiden bedraggien gaon.
Wakker van Viene
28-02-2002 (5-de aovend) PJ
Wat de kommunikaosie angiet liekt d'r niks mis mit de Stellingwarver
Schrieversronte. Pieter Jonker hadde van Henk Bloemhoff goed deurkregen
wat wi'j as huuswark te doen hadden. Zodoende kon Pieter d'r ok niet
omhenne om disse aovend te beginnen mit et naokieken en overheuren van
dat huuswark. Et stokkien schriefwark van Jehannes Stellingwerf he'k
geleuf ik wel drie keer lezen mar nog hieltied niet begrepen. Ie moe'n
d'r toch niet an daenken daj' een zinnigien as "Tjonge jonge ! wat vol
en wat waarm en wat drok en wat té vol en wat té waarm en wat té drok
..." uut jow eigen grieze massa ontsnappen laoten moeten, om as
Stellingwarver schriever naeme te kriegen? A'k 'em es tegenkomme, wi'k
Johan V. nog es vraogen as die misschien ok zo begonnen is.
An de haand van et 'gele boekien' het Pieter oons perbeerd uut te
leggen van et hoe en waoromme van verschillende woorties en
uutdrokkings. Een riegel liekas "De kort klinkende a wordt dus met een
a geschreven", daor ha'k et vanzels niet al te muuilik mit. Mar as d'r
dan vot achteran staot dat 'arf' en 'nargens' mit een lange aa zegd en
toch mit een kotte a schreven wodden, dan krieg ik et weer slim
benauwd. De aovend mocht om mi'j wel weer veurbi'j wezen. Mar nee heur,
et hul mar niet op. Woorden as "hujjinge" en "dri'jen" en zo, die bin
toch niet te begriepen?
Krek doe'k docht dat disse soorte van woorties wel zo ongeveer et
slimste van disse kursus weren zollen, begon Pieter over 'Moeilijke
verbindingen'. Now moe'k jim zeggen da'k persoonlik al es eerder een
'moeilijke verbinding' angaon bin, mar dat ston in gien vergeliek mit
wawwe no te heuren kregen. Ja, jow heuren et goed, "wawwe". En et bleef
niet bi'j dat iene "wawwe", och heden nee. Awwe, biwwe, dawwe, hewwe,
hawwe, kuwwe, kowwe, kwawwe, mawwe, mowwe, wiwwe, wowwe, zowwe en
zuwwe. 't Is toch niet te geleuven dat bevobbeld een 'Import Hollander'
hier ooit wat van snappen zal! As echte Stellingwarver hebbe ik d'r al
genoeg muuite mit.
Nao et anheuren van zoe'n 'om-te-lachen' riegel woorties, wa'k bliede
dat et toch zo stiekeman bi'j half tiene wodden was. 't Was mi'j now
wel hielendal duudlik; Pieter het bliekber vrogger echt een
schoelmeester west. Disse man kon et ok niet laoten om oons mit een
protte huuswark op te zaedelen. Wi'j kregen een stokmennig briefies
mit. Iene over "Inkelvoold en meervoold", een ere over
"Verkleinwoorden", een stok "Nederlandse tekst" en een "Oefening 1".
Pieter, Henk en nog een stokmennig bin -geleuf ik- heur volle warktied
in de weer mit et Stellingwarfs. Zi'j staon d'r bliekber niet iens bi'j
stille, dat wi'j -de meersten van oons- et d'r even bi'j doen moeten.
Volgende weke mar weer es kieken.
Wakker van Viene
07-03-2002 (6-de aovend) PJ
Wi'j mienden dawwe niet al te laete ankwammen disse aovend mar et leek
wel as wi'j vusen te laete weren. Et was ja al een geroezemoes van
jewelste in de 'grote zael' van oons klubhuus. Wat bleek now? In plak
van Henk Bloemhoff mos Pieter disse aovend ok weer opdraeven en daor
hadde hi'j niet al te vule nocht an. Pieter zien perti'j had 's aovens
te veuren aordig verleuren in de verkiezings veur de leden van de
gemienteraod. Et was an zien stemming goed te marken. Woest zette
Pieter uutaende mit et naokieken van et huuswark van de veurige weke.
Hi'j had oons doe al waorschouwd niet te wachten mit et maeken daorvan.
Van inkelvoold naor meervoold, bleek veur de meersten van oons nog wel
te doen. Dat een "buisien" een "kammeraotien" was, hadde ik trouwes nog
nooit van heurd.
De verkleinwoorties gaven geleuf ik niet de meerste perblemen. Et
verkleinen van een "kalf" tot "kalfien" ha'k as strikvraoge wel mooier
bedaenken kunt deur bevobbeld et verkleinwoortien van "koe" te vraogen.
Mar dan hadden zi'j vanzels "koegien" of mischien wel "koekien" hebben
wilt. De vertaeling van de nederlandse tekst was goed te doen al
ontston daorbi'j wel een boel diskussie. De meersten van oons hadden de
woorties iene veur iene vertaeld in et Stellingwarfs. Gelokkig weren
d'r een stokmennig die de hiele riegel over de kop haeld hadden en
daormit opschreven zoas zoe'n Hollaans zinnegien, hier in disse
kontreien zegt wodden zol.
De 'Oefening 1' leek de muuite niet mar d'r zat dan ok een addertien
onder et grös. Wi'j mossen woorties -vervoegings van warkwoorden-
invullen in de tegenwoordige tied. Dat was et slimste niet mar aj'
klaor weren dan stonden d'r twie riegelties onder die je vernaggelden.
"Now dezelde zinnegies in de verleden tied" en "Kun jim van disse
zinnegies ok een zinnegies maeken mit een voltooid dielwoord?". Ja,
waor, zo ston et op et briefien "van disse zinnegies een zinnegies
maeken". En disse meensken zullen oons wat leren? Zi'j maeken oons mar
wat wies! Ik hebbe toch mar an disse wiesmaekeri'je mitwarkt deur an de
vraogde opdracht te voldoen.
't Leup al aordig tegen de koffie doe wi'j nog even slim an 't wark zet
wodden. "In elke zin zitten twie fouten. Streep ze an en verbeter de
fouten". Opni'j ontstaot dan vanzels weer diskussie over aj' argens
"frolik" of "vrolik" van wodden. Ik kan jow zeggen dat ik in't Hollaans
wel es argens "vrolijk van" wodden kan, mar in't kroem wor ik argens
"bliede omme". De volgende opdracht was "Zet een krinkien om de goeie
schriefwieze". In dit stok weren "kroje/krooie", "gruuien/greuien" en
"mujke/muuike" mischien wel de meerst moeilike woorden. Duudlik was wel
dat et een "klarre" wezen mos en gien "kladde". In de vuuftig zinnegies
kwam ik d'r mit mien drie fouten, aordig vanof donkt mi'j zo.
Nao dawwe ombeurten een riegel op et bod schrieven mossen en daorbi'j
een vertaelslag maeken mossen van et Hollaans naor et Stellingwarfs
kwam -veurwat mi'j betreft- iene van de beste onderdielen van disse
kursus. Let op, et is veur mi'j nog altied een 'kennismaeking' mit et
Stellingwarfs. Van de koffie tot et aende van de aovend -en et wodde
nogal wat laeter- het Pieter verteld van et ontstaon en et plak van
oonze Stellingwarver tael. An de haand van opmarkings of et
Stellingwarfs een tael of een dialekt is, ontstaon now ienkeer aordige
diskussies. Daorbi'j koj' niet alliennig meer te weten over et
Stellingwarfs mar minstens zovule over de meensken die heur stellings
verdedegen.
Et schient now zo te wezen dat et Stellingwarfs wel een tael is, mar et
het gien hoge officiele erkenning van de rieksoverhied. Pieter had et
nog over et diel twie of drie van et haandvest van europese
streektaelen. De schrieversronte is d'r now sund jaor en dag mit in de
weer om -tegaere mit Grunningen, Drente en Overiesel- et Stellingwarfs
bi'j de europese kommissie onder diel drie van et haandvest te kriegen.
Niet de erkenning allienig is daorbi'j van belang mar (misschien wel)
meer nog, de daorbi'j heurende centeraosie. Zo as omtrent overal veur,
is d'r ok veur streektaelen een pottien in Europa. Doe oons achterof
blieken dee dat Pieter vertelsgewieze veurlezen hadde uut "Oonze tael,
oonze zorg!" van Henk Bloemhoff, het hi'j oons mar een kopie van dat
stokkien (uut de ovend?) mitgeven.
Dat stokkien (Oonze tael, oonze zorg!) dawwe mitkregen het mi'j laeter
thuus nog slim bezigholen. Liekegoed om de 'stand-van-zaken' as om de
schriefwieze van -toch wel- een 'echte' Stellingwarver schriever. As
kursist van disse kennismaekingskursus he'k dat stok schrieveri'je es
hiel kritisch (positief bedoeld heur) bekeken. Een stok of wat
zinnegies veulen mi'j op zoas bevobbeld "... netuurlik is oons
Stellingwarfs een tael krek as aandere taelen...". Aj' et begrip van
'tael' ommeheinen in een raem van 'kommunikaosiemiddel', dan zal Henk
wis geliek hebben. As een tael ofhangt van een erkenning van de
rieksoverhied dan is oons Stellingwarfs dus duudlik gien tael mar een
dialekt, liekt mi'j.
"De Schrieversronte het him d'r indertied beheurlik veur inspand, oonze
gemientebesturen alliekegoed en ok de perveensie ston d'r dus aachter".
Mit dat woortien 'dus' kan ik 't in dit verbaand niet hielendal iens
wezen. "... weren ze bliede, omdat d'r zo gien anleiding meer wezen kon
veur et gevuul daj' wat minderweerdigs praoten (kroem, dialekt, plat,
boers en wat al niet)". Hoezo 'minderweerdigs'? Ik kan mi'j gien geval
veurstellen waor aj' je 'minderweerdig' vulen moeten om de tael die aj'
praoten. Dat kuj' allienig mar jezels anpraoten. Daenke hierbi'j
bevobbeld es an de klik-klak geluden van de Aboriginals. Strek toch de
rogge, mit de kop d'r recht bovenop!
Veerderop -in de twiede alinea- schrift Henk: "Nao de erkenning onder
diel II in 1995 ...". In 't begin van zien stokkien het hi'j et d'r
over dat een "... officiele erkenning van de rieksoverhied was
d'r tot oktober 1995 niet". Of hi'j zet mi'j hier op et verkeerde bien,
of ik begiepe d'r hielendal niks van. Op disse meniere zo'k nog wel
even deurgaon kunnen op dit bar ambtelik schreven stokkien, mar da's
niet mien bedoeling. Wa'k mar zeggen wol is, dat zi'j mi'j op disse
kursus hieltied weer zeggen, da'k goed op de schriefwieze van
'betrouwbare' schrievers letten moet. Mar ... hoe moe'k d'r now mit an
as d'r bi'j elke zin van zoe'n schriever, zoevule vraogen bi'j mi'j
opkommen?
Wakker van Viene
14-03-2002 (7-de aovend) GL
Geert Lantinga hadde vanaovend de leiding. 't Was nog mar krek
halfachte wodden en daor zette hi'j al uut aende. De 'over-de-kop'
projektor kwam inne braand en daor gong 't henne. Wi'j broesden in een
ure tied, van meer as 10.000 jaor veur Christus tot now an toe. Man,
man, wat kan die Geert ommeraek vertellen. De eerste iestied, de twiede
iestied en ok nog een dadde iestied; et kon niet op. Nao alle iestieden
was d'r ok nog een stientied, een iezertied en een broonstied. Hieleven
he'k perbeerd om wat antekenings te maeken mar deur Geert zien rappe
praoten, kon'k dat al gauw niet meer bi'jbiezen. Dat he'k dan veerder
ok mar zitten laoten (niet "laoten zitten" zoas Geert vaeke zegd).
In de laeste iestied -zo he'k begrepen- bin d'r een peer grote
iesbrokken van de noordpool hielendal tot hier an toe zwommen en hebben
doe et laand hier in de Rijndelta wat opscheuven. Daoruut zollen de
stokmennig heuvelroggen die we hier now nog kennen, ontstaaon wezen,
zoas de Drentse heuvelrogge en de Woldbarg bi'j Stienwiek. Dat
verschoeven van dat ies omtrent 8.000 veur Christus, het ok een protte
stienen van Noorwegen hierhenne sleept. Tegaere mit de protte stienties
die hier al lagen uut de tied van de Rijndelta, zitten wi'j hier dus
nog hieltied in et stienen tiedpark. Geert had een hiele grote kiste
mit stienen mitneumen om oons zien te laoten (niet om oons te "laoten
zien"). Niet da'k d'r nao 6 aovends al een protte verstaand van hebbe,
mar van Geert he'k vaeke de indrok dat hi'j Stellingwarfs praot in een
Hollaanse volgorde van zien bruukte woorden. En dan praot hi'j ok nog
zo rad dat hi'j himzels bi'jtieden veurbi'j praot. Dan is hi'j al mit
de volgende riegel doende wielst hi'j de veurige nog niet hielendal
ofmaekt het. Wonderlik! En toch blieft et slim spannend wat hi'j
allemaole te vertellen het.
Aenlik hadde Geert gien tied veur de koffie. Mar deurdat wi'j nogal
androngen, mos dat dan toch mar. Al onder de koffie zette Geert weer
uutaende mit een deur himzels maekte diaserie. De meerste foto's weren
uut de locht neumen. Opni'j kon Geert d'r meraokels bi'j vertellen.
Hi'j zag op die dia's ok meer dan dat ik ooit zien kon. Vaeke was et
plaetien krek wegdri'jd op et stuit dat ik deurkreeg waor a'k was. Et
zal an mi'j legen hebben. D'r wodt wel vaeker zegd da'k wat kalm-an van
begrip binne. Wa'k wel mitkregen hebbe van al die mooie plaeties daj'
nao zoe'n laank skoft nog zoe duudlik zien kunnen waoras ooit dobben en
petgatten bestaon hebben. Ok al is et laand al tachtig keer ommeploegd,
vanuut de locht ku'j nog persies zien hoe zoe'n ronde dobbe ooit west
het. Op dezelde wieze koj' ok goed zien hoe bevobbeld de Kuunder
verkanalisseerd worden is. Zoe now en dan is d'r bliekber een omhael
ofkapt deur daor een stokkien rechtuut te greven. De oolde loop van de
oorspronkelike revier ku'j op Geert zien dia's dan toch nog weeromme
vienen.
As 'man bi'j de Perveensie' is Geert bliekber ok een protte betrokken
west bi'j opgrevings en zo. Veural in disse omgeving. Van Holtwolde
vertelde hi'j dat daor de Hamburger Cultuur ontstaon was. Doe hi'j
anstipte dat et "Hamburger Cultuur" aenliks "Hamburg Cultuur" wezen mos
wa'k even de draod kwiet. Ik had altied begrepen dat de Hamburger
Cultuur deur McDonalds uutvunnen was. Wieder gong et weer. Over et
'Vri'je laand van de Stellingwarven', een Dutse meneer Von Saksen en de
Bischop van Utrecht. Een kesteel bi'j Vollenhove is een stokmennig keer
deur de Stellingwarvers bestormd. Soms deden de Stellingwarvers dat
allienig, soms mit hulpe van de Schoterlanders.
Geert had allemaole stienen in zien deusien die hi'j al es vunnen (of
kregen) had. Now ha'k eerder wel es een vuurstientien zien, mar zokken
as Geert bi'j him had, nee, zo ha'k ze nog nooit zien. Een
verschrikkelike hakbiele van vuurstien waor ik zoemar bi'j wegdromen
kon. Ik zag et hielendal veur mi'j: As man was ik van de jacht
weerommekommen, hadde de buit ofdreugen an de vrouw, die dan mit zoe'n
grote vuurstienen hakbiele in de weer gaot om et beest te slachten, te
bakken en te braoden... Ik was mit een kammeraod wat in't schaad onder
een boom zitten gaon mit een pottien bier -in beide hanen iene-, dat de
vrouw 's morgens brouwd hadde. Verduld, alweer gien tied veur mien
dromeri'je.
Geert had ok een stien bi'j him waor eerdgas in zeten hadde. Dat gas
was inmiddels al opstookt mar de stien was d'r nog. 'k Vreug nog even
wie as dat gas d'r dan eerst instopt hadde. Volgens Geert kwam dat uut
et binnenste van oonze eerde. Daor kookt en borrelt et nog altied en as
d'r dan bepaolde laogen van verschillende grondsoorten overmekeer
scheuven weren, dan kon daor et gas veur lange tied in beweert blieven.
Now begriep ik dus ok zoe'n betien dat dat dus wel aordig uutkommen kan
mit et begin van zien verhael over de laeste iestied en zo. Daenke now
niet dat et mit al die stienen klaor was. Nee, Geert had ok nog hiele
hadde turfstienen bi'j zich. Et leek op stien mar aj' 't zien wollen
dan koj' d'r ok nog turf in zien. Al mit al, meraokels mooie stienen en
nog mooiere verhaelen. Wat slim zuunig an tied, of wat te vule
verhaelen.
Wakker van Viene
21-03-2002 (8-ste aovend) GBD
Gelokkig, daor was Grietje weer vanaovend! Zi'j begon (jammergenog) al
geliek te zeggen dat dit heur laeste aovend van disse kursus wezen zol.
Op et examen (op zaoterdag 13 april) zowwe heur wel opni'j treffen. Die
dattien april -scheut mi'j deur 't heufd-, waor wa'k die al es eerder
tegenkomen? Doe scheut 't mi'j te binnen. Dat was de daotem van de dag
van de bevri'jdinge van de Stellingwarven. Daoromme ha'j in Oosterwolde
vanzels ok een dattien-aprilstraote en zo. Dat ze now krek op disse dag
et examen holen!
Ik blieve mi'j verwonderen, hoe as Grietje zoe'n aovend vullen kan mit
ofwisselend wat lezen, schrieven en luusteren. Veural, luusteren. Of
zol 't an mi'j liggen? Zo'k van huus uut wat luïg anlegd wezen
misschien? Wi'j hebben disse aovend hiel wat gedichies en verhaelties
lezen en anheurd. Bi'j elk stokkien het Grietje et ien en aander
verteld van de schriever(ster). D'r kwammen hiel wat boektitels en
naemen veurbi'j van Stellingwarver schrievers(sters) zoas o.e. "Et
maonetreintien". Een kienderboekien van Wil Vening. De gedichtenbundel
"Aosem" van Anke Hoornstra. En zo nog vule meer. 'k Kreeg de indrok dat
Grietje zels, et wark van Harm Houtman slim waarderen kon. Uut zien
bundel "Laot him niet valen" hebben wi'j nogal wat (drama) gedichies
bespreuken.
Et leek mi'j toe dat Grietje ok wat een zwak hadde veur Jouk (Marinus
Bakker). Over zien wark raekte zi'j ok mar niet uutpraot. Vanzels
wodden al die aanderen ok niet vergeten zoas: Philomene, Johan, Klaas,
Fokke, Benny, Lily, Oene, Dirk Kerst, Jan, Knillis, Pieter, Zwaantje,
Lamkje, Peggy, Henk, Hendrik en nog vule meer. Bi'j elke
schriever(ster) wus Grietje wel wat feitelikheden, een mooi verhael of
een andaenkens-weerdige anekdote te vertellen. Zo was zi'j al es een
keer mit Jouk -veur de Schrieversronte- op pad west, doe de auto van
Jouk et begeven hadde. Een boertien uut de buurt had hun doe veerder
hulpen. Jouk hadde van et veurval geliek een grappien maekt daj' laeter
in zien boekien "Wille op 'e brille" weeromme vienen konnen.
Nao ombeurten een betien lezen, mos d'r vanzels ok neudig es weer wat
schreven wodden. Grietje haelde een groot stok pepier te veurschien dat
-zo zee zi'j- in de laegste klassen van de laegere schoelen uutdield
wodde. Zi'j las daoruut veur en kwam zoe now en dan een woord tegen
dawwe opschrieven mossen. Woorden zoas: mitien, aenlik, vandaege,
paosketoeke, bi'jgelieks, dudelik, uutkieken, veurjaor, aorig en
zunnegien. Later kregen wi'j heur blattien van schoele deur de hanen en
konnen wi'j oons wark naokieken. An de haand van wat veurbeelden hewwe
Benny Holtrop ok uutbreided deurneumen. Benny schreef bevobbeld hiel
wat stokkies in de (meerst) regionaole kraanten. Hiel bekend bin zien
stokkies in 'Uut de Pultrum' en 'Op 'e schostienmaantel' wodden.
Even tussendeur:
Ik, as Ni'jebekoper, kan vanzels -en veural ok- niet om Henk Bloemhoff
henne, as -toch wel- een belangriek warker an de Stellingwarver tael.
Henk wodde in 1948 in Ni'jberkoop geboren. Vanwegens zien slimme
gewetensnood om bi'j 't leger te dienen, is hi'j om zien negentiende
henne, in Kamp Vledder te wark steld wodden. Daor kwam hi'j in de kunde
mit et wark van Hendrik Johannes Bergveld. Misschien wel juust omdat
hi'j disse tael -zien eigen moekestael- zo aordig vun, ging Henk laeter
studeren an de Rieks Universiteit van Grunningen. Iene van zien eerste
warken was een saemenstelling van de bundel "De oolde pook" van H.J.
Bergveld. Disse saemenstelling dee hi'j doedestieds op verzuuk van de
Kulturele Raod van Ooststellingwarf.
Om-en-bi'j 1970 begon Henk stokkies in en over et Stellingwarfs te
publiseren. Eerst in et Berkoper dörpskraantien "De Dreyer" en laeter
ok in et Nedersaksische blad "De Pennevoegel". Zien eerste dichtbundel
"Foddelpenneri'j" wodde uutgeven deur de Stellingwarver Schrieversronte
in 1974. Gaondeweg het Henk ok lieties schreven waor hi'jzels ok de
meziek bi'j maekte. As zinger/entertainer het Henk doende west bi'j et
"Harbargespul". Al sund de zeuventiger jaoren was hi'j Stellingwarver
woorden an et vergeren. Daoruut wodt op 't heden et Stellingwarfs
Woordenboek gaersteld. Hi'j is al mit vier dielen klaor. Et eerste diel
kwam uut in 1994. In 1991 haelde Henk zien bulle (wodde "Dr. H.
Bloemhoff") mit zien proefwarkstok "Fonologie en morfologie van het
Stellingwerfs". Oprecht en letterlik dus een 'drokte-maeker-doktor'
altied doende mit oonze tael.
Tot zoveer even et tussendeurtien. Tot zoveer trouwes ok mien verslag
van disse aovend. Volgende weke donderdag mar weer op naor Berkoop.
Wakker van Viene
28-03-2002 (9-de aovend) HB
'k Wil 't niet tot mien gewoonte rekenen om te laete op een ofspraoke
te kommen, mar soms is 't niet aanders. Zoas vandaege. As kleine
zelsstandige weren wi'j, mien Monique en ikke, vandaege naor een -veur
oons slim belangrieke- klus in Ermelo op 'e Veluwe west. Doe wi'j om
goed zes ure daor weg gongen raekten wi'j nogal vertiesd in langrekte
riegel van auto's bi'j Zwolle. Jaoren leden was dat allienig nog mar
een perbleem in et westen van 't laand. Tegenwoordig koj' 't hier in
oonze kontri'jen ok hoe langer hoe vaeker tegen. 't Hul wel in da'k
krek om halveaachten thuus kwam. Nao da'k gauw nog wat spullegies
uutlaeded hadde, bin'k vlogge naor Berkoop reizigd. Iedereiene was d'r
vanzels al en Henk Bloemhoff hadde 't hoogste woord. Dat zol disse
aovend ok zo blieven.
An de haand van een pepieren schema over de germaanse indielings van
taelen en dialekten het Henk oons perbeerd uut te leggen hoe as wi'j an
oons Stellingwarver spraoke kommen. Hi'j begon zoe'n twie tot
drieduzend jaor veur Christus mit 't Oerindoëuropees. Tot die groep
beheuren o.e. et Letien, Grieks, Sanskrit, Keltisch en zo meer. Rond
ongeveer 500 veur Christus nuumt hi'j 't Oergermaans as een bekende
tael. An et begin van oonze jaortelling hiet et Oergermaans dan, et
Gemiengermaans. Alweer zoe'n 500 jaor veerder ontstaon daorvan dan et
Oeroostgermaans mit et Gotisch as veurbield. Et Oernoordgermaans mit de
Oldnoorse taelen die heur veerder ontwikkelden tot de tegenwoordige
skandinavische taelen. Wi'j volgden et Oerwestgermaans dat even laeter
et Ooldwestgermaans nuumt wodde.
Dit Ooldwestgermaans bleef in de binnelanen bestaon as niet-ingweoons
Westgermaans. Deur invloeden van kustbewoners en deur stammevorming
ontston d'r ok een ingweoons Westgermaans. Zo tussen vuufhonderd en
duzend jaor nao Christus is et niet-ingweoons Wgm. verwodden tot de
Ooldhoogduutse en de Ooldnederfrankische dialekten. Uut et
Ooldhoogduuts komt laeter et Ni'jhoogduuts en et nowdaegse
Standerdduuts. De Ooldnederfrankische dialekten splissen zich dan op in
twie stomings. Et Oost mit et Rijnlaans en Limburgs, en et West mit
Braobaans en Utrechts as dialekten. Wi'j, as Stellingwarvers, vervolgen
oons pad mit de ingweoons Westgermaanse stroming die in diezelde tied
oppat wodt in: Ingweoonskust-, Ooldsaksich-, Ooldfries- en
Angelsaksisch dialekt.
Uut et Ingweoonskustdialekt is laeter et Zeeuws-Hollaans en et Vlaams
ontstaon. Rond die tied -et jaor 1600- is ok et Algemien Beschaafd
Nederlaans ontstaon. Ooldfries is verwodden tot de Ni'jfriese
dialekten, en et Angelsaksisch tot et Standerd Ingels mit heur
verschillende dialekten. Et Stellingwarfs ten slotte komt as
Noordoostelik dialekt vot uut et Ooldsaksich. Van 't begin tot an et
aende koj' an Henk vernemen dat dit terrein zien wark, en meer nog, ok
zien grote hobby was. Tussen de opsommings deur, hadde Henk soms mooie
anekdotes die veulal begonnen mit "Jow moe'n je veurstellen dat in die
tied.....".
Nao dik een ure an't woord west te hebben, donkt mi'j dat Henk now wel
haost es een druge mond hebben zol; en zin hebben zol an koffie. Now,
dat mos dan mar vlogge even, mar aenliks was d'r gien tied veur. Al
onder de koffie pakte hi'j zien 'gele boekien' en begon op bladziede
vierentwintig mit zien uutleg over muuilike verbiendings en zo. Veerder
kwammen de verklein- en warkwoordsvormen an bod. De persoonsvormen
vleugen in zoewel de tegenwoordige tied as de verleden tied deur de
kaemer, krek as de gebiedende wieze en de deelwoorden. Gelokkig veur
oons is Henk zien 'gele boekien' niet al te dikke (dan zol 't vanzels
ok een 'geel boek' nuumd wezen), zodat hi'j ofsleut mit de heufdvormen
van de starke en onriegelmaotige warkwoorden.
As een echte schoelemeester mos d'r vanaovend toch ok nog even een
diktee an te pas kommen. Eerste zinnegien: D'r staot niet vule waeter
in de vaort, mar bi'j de sluus is et wel diepe, now? De volgende: Aj'
in de baarm staon en een lange stok in de hanen holen, kuj' de bojem
iens niet raeken. Zo gong dat nog een schoffien an. Bi'j een protte
woorties is't de bedoeling daj' d'r instinken mit et verkeerd schrieven
van de "ae" en de "ao" klaank. De dubbele punties op de "ö", "mi'jen",
"hujjen", "goenend", "zoenend" en "een wiefien die in de zunne ligt te
blaekeren"; allemaole instinkerties! Op 't zelde pepiertien stonnen nog
meer riegelties. Die mossen wi'j mar mitnemen naor huus, as huuswark.
En et huuswark van de veurige weke mossen wi'j mar op een staepeltien
leggen. Dat zol Henk dan gaondeweg de kommende weke wel even naokieken.
Wakker van Viene (HB)
04-04-2002 (10-de en laeste aovend)
'k Was, zo nao zeuvenen al, eins krek wat te laete uut Hollaand
weerommekommen vanaovend. Doe Michel mi'j ophaelen wol veur de laeste
kursusaovend, zat ik dan ok krek an mien eerste bakkien koffie. Vlogge
toogden wi'j naor Berkoop. De meersten weren d'r al en Henk Bloemhoff
was 'oonze man' vanaovend. Hi'j was al drok doende mit et weerommegeven
van et huuswark van veurige weke. Dat hadde hi'j thuus even naokeken.
Wi'j begonnen vanaovend mit et invullen van woorties in de verleden en
tegenwoordige tied in zinnegies as "Et maegien vul naor beneden" en "De
regen göt bi'j bakken vol uut de locht". Veerder mos d'r hier-en-daor
een riegeltien vertaeld wodden zoas van "Hij bood duizend gulden" naor
"Hi'j beud duzend gulden". Uut wat meer-keuze-vraogen mossen wi'j de
verkeerd spelde zinnegies wegstrepen. 'Ontvalen', 'anduden' en 'doen
kunnen' weren ok nog een paer woorties waor wi'j wel wat uutleg bi'j
bruken konnen.
Nao de koffie mossen wi'j een stok of 10 riegelties tekst ommezetten
van et Hollaans naor et Stellingwarfs. Zinnegies as "Ze snijdt zich in
haar vinger", "Konden jullie het niet uithouden?" en "Je had het kunnen
weten", mossen wi'j an de hand van et 'gele boekien' vertaelen. Bi'j
zien uutleg greep Henk graeg naor dat boekien en vertelde d'r
wiedwreidig bi'j, over et hoe en waoromme. 't Was al haost weer de
hoogste tied om d'r mit op te holen mar Henk kon 't niet naolaoten om
ok nog even een diktee te geven. Dat gong over "Wi'j hopen daj'm een
mooie dag hebben", "Een oolde karke in een klein dörpien", "Boeren die
in de hujjinge even piepschoft holen" en "Honnen mit kotte statten". An
zien gezichte koj' zien dat Henk eins nog wel even deurgaon wol, mar
hi'j begreep ok wel dat halftiene, halftiene is. Bi'j et uutgaon van de
schoele kregen wi'j nog een kevot mit, mit de speulriegels veur de
examendag op zaoterdag 13 april.
Dat examen, dat zal mi'j nog wat wodden! Et staot onder toezicht van et
Nedersaksich Instituut van Rieks Universiteit Grunningen (naor ik
verwaachte een bi'jbaentien van Henk?) en et begint al om tien ure
morgens. Zi'j willen beginnen mit et schriftelik examen. Dat zal
bestaon uut een diktee van een stok of tien riegelties en et schrieven
van een opdracht. Bi'j die opdracht meugen wi'j gebruuk maeken van et
materiaol dawwe van de kursusleiding kregen hebben. Dan holen wi'j even
piepschoft en gaon dan veerder mit een stokkien kreatief schrieven. Dat
kreatief schrieven holt in dawwe uut een lissien mit onderwarpen, iene
uutzuken meugen, en daor dan een verhaeltien of een gedichien over
schrieven meugen. (Meugen? Moeten zullen ze bedoelen!)
Middags wodt et mondeling examen ofneumen. Zi'j gaon d'r vanuut dawwe
de vier boeken, die wi'j an et begin van de kursus mitkregen hebben,
dan uutlezen hebben en dawwe de "Historische opdracht" van Geert maekt
hebben. Et mondelinge examen is in twie stokken knipt. Et iene pat gaot
over de geschiedenis van de Stellingwarven en et aandere pat gaot over
de Stellingwarver schrievers en heur boeken, de Taelfemilie en de
erkenning van et Stellingwarfs. Daornao is d'r een half ure beraod op
hoog nivo. Aj' gelok hebben dan zuj' om een ure of drie henne et
diploma anrikt kriegen deur de veurzitter van de Schrieversronte, dhr.
Simon ter Heide uut Berkoop. Wi'j moe'n mar es kieken hjoe 't komt ...
Bemarkings mit 'Man en Peerd' van 'Wakker van Viene'
Mit de verkiezings veur de leden van de gemeenteraod nog vasse in de
grieze masse, kwam et volgende bi'j mi'j op. D'r wodt tegenwoordig van
iene as Ad Melkert wel es zegt dat hi'j, en ok zien perti'j -toch de
perti'j van et volk- te veer van 't volk ofstiet. Dat zie'k bi'j disse
klub ok wel es veurkommen in ... bevobbeld de ledenwarfaktie in
Ni'jeberkoop. Oons dorpsblattien 'De dorpsomroeper' het altied verlet
van een stokkien schrievri'je. Wat is d'r now mooier as een peer weken
veur et holen van een ledenwerfaktie, alvast een stokkien promosie te
maeken in zoe'n dörpskraantien. Et kost niks en de redaktie van et
kraantien is d'r stikwies mit. Mar nee heur, ie heuren ze (de
Schrieversronte) d'r niet over. Now ja, een makkelik inlegvellegien
mitgeven op et laeste mement. Dat kon nog krek.
In disse kursus is mi'j wel een peer keer bleken dat de 'Ronte' een
groepien meensken is die bar antoesiast argens an beginnen mar al rap
heurzels isoleren van et aandere pat van et volk. Zo vun ik bevobbeld
dat (nao de eerste) de zesde en de negende aovend et kennismaeken mit
de tael en kultuur, gelokkig toch nog wat brieder belocht wodde as de
hieltied alliennig mar dat gedoe over de preciese schriefwieze van
punties, kommagies en epestrofen. Dat precies goed schrieven dat komt
laeter wel, daenke ik dan. Laot mi'j asjeblieft eerst mar es
'kennismaeken'. As wi'j -as kursisten- dat verleden, heden en toekomst
intressant genoeg vienen, dan kommen wi'j vanzels wel weer veur een
vervolgkursus.
As jim oons al te vule ofschrikken mit (te vroeg) de naodrok te leggen
op de preciese schriefwieze, dan bin'k zoe bange daj'm een groot pat
van de meensken wat te bange maeken veur een naodere kennismaeking. In
dit verbaand wi'k zeker Grietje nog even naor veuren haelen as mien
bovenste-beste kursus-juffer. Daor kun' al die manlu (Geert, Henk en
Pieter) lang niet tegenop! Grietje is -veur wat mi'j anbelangt- de
ienige die bi'j mi'j et gevuul overbracht dat ze et veur óóns dee. De
manlu-kursus-leiders, mit Geert en Henk veurop lieden een betien -zo
liekt et wel- an et eerdernuumde 'Melkert-syndroom'.
Niet in et laeste plak verwaachtte ik niet allienig een kennismaeken
mit de Stellingwarver tael en disse klub, mar veural ok mit aandere
culurele utings zoas bevobbeld schilderkeunst, holtfieken, beeldwark en
zo.
Ledenwinaktie in Ni'jeberkoop op 16 meert 2002.
Zoemar op een morgen in 't laeste van februari wodde d'r bi'j oons
anbeld. D'r ston een man veur de deure die himzels veurstelde as Ate
Mulder en hi'j zee dat hi'j in de promosie- en publiciteits-kommisie
van de Schrieversronte zat. Ik zegge "man kom d'r in". Mit een peer
koemegies koffie en een plakkien koeke hebben wi'j doe een gezellig
uurtien kletst (mit recht 'kletst') over de Schrieversronte en de
bedoelings van zien bezuuk. Uutaendelik wol hi'j mi'j vraogen a'k
mithelpen wol mit een ledenwin-aktie in Ni'jeberkoop. Die zol holen
wodden op zaoterdag 16 meert. Tegen disse man en zien veurstel veur dit
goeie doel, kon ik vanzels gien 'nee' zeggen.
Op die zaoterdag biwwe om een ure of negen 's morgens bi'jmekaer kommen
in 't cafe "Boszicht" van Ni'jeberkoop. Een man/vrouw of tiene kwammen
achtermekaere binnenroegelen. Tiedens een bakkien koffie mit koeke
biwwe indield wodden in groepies van twieman/vouw en kregen daorbi'j
een routeplan anrikt. Ik wodde mit Henk de Vries (de veurzitter van
disse kommisie en al jaoren verkoper van volksauto's) opzaedeld en
speulde veerders een thuuswedstried op de Grindweg. Al bi'j et eerste
huus was 't geliek raek. Nao dawwe oons netties veursteld hadden an een
mooi vrommesien (Henk is bi'jtieden een echte 'heer'), wodden wi'j
binnenvraogd. In huus leup een klein mannegien van een jaor of vieve.
De mevrouw praotte et honderduut over "hoe mooiwonen ze et hier wel vun
as import-Stellingwarver" en dat zi'j "van oorsprong uut Tynaarlo
kwam". Een taelgebied, een betien vergeliekber mit dat hier in de
Stellingwarven vun ze. Zi'j wol graeg lid wodden van disse klub. Mit et
uutzuken van een stok of vier boekies had ze wat meer muuite. Daor
hebben wi'j heur dan ok mar even mit hulpen deur een kienderboekien
("Et maonetreintien" van Wil Vening) ommeraek an te priezen veur et
kleine kereltien. Et boek "Op zoek naar de Stellingwarver identiteit"
van Henk Bloemhoff leek oons wel aordig veur heur, om uut te vienen
waoras zi'j now aendelik terechtekommen weren. Een romannegien en een
muziek Cee-Dee maekten heur keuze uut vier boeken kompleet. Nao dat de
haandtekening op pepier ston hebben wi'j heur -en zi'j oons- nog een
goeie votzetting van disse dag toeweensked.
Van alle details van oonze bezuken za'k jim hier gien kond doen, mar ik
kan jim wel zeggen dat wi'j ommeraek scoort hebben. Soms wel twie ni'je
leden mit de daorbi'jheurende haandtekenings op ien adresse. Et hoeft
donkt mi'j dan veerder ok gien betoog dat et tussen Henk, mi'j en et
doel waoras wi'j veur stonnen, wel aordig 'klikte'. Mit oonze
wiespraoteri'je kregen wi'j mennig man/vrouw antoesiast veur et
lidmaotschop van oonze klub. Halverwegens de rit hadden wi'j de
invulformulieren zels op. Doe bin wi'j dan mar gauw even naor mien
Monique op nommer 18 gaon, om d'r een peer bi'j drokken te laoten.
Oonze 'snelste score' hadden wi'j bi'j een femielie die we nog krek
thuustroffen, mar op et punt stonnen om vot te gaon. Zi'j weren nog an
et verbouwen en woonden hier ok nog niet warkelik. Binnen twie tellen
hadden we ze op pepier staon. Et meerste wark hadden wi'j van iene die
vreug of wi'j even weromme kommen wollen as "de vrouw" thuus was, want
"die gaot over dat soorte van dingen". Dat hewwe doe mar toezegd. 's
Aovens he'k er nog wel een ure gezellig zitten keuvelen over de
MKZ-krisis, de gemeenteraodverkiezings tot an de daegelikse gaank van
zaeken. Mar ok hier kreeg'k wel een haandtekening op pepier mit
weeromme.
Jammer dat Henk beslist om ien ure in Butenpost wezen mos. Wi'j kwamen
krek zoe'n betien op dreef. Mar wi'j hadden mitmekaer ofpraot dawwe om
twelf ure weer in 't cafe weden zollen. Daor dee blieken dat de hiele
aktie van die zaoterdagmorgen een dikke twintig ni'je leden opsmeten
hadde. As 'topscoorders', ha'k dat nog graeg even mit Henk beklinken
wild, mar hi'j mos beslist vot. Mit Ate he'k doe nog even waacht tot
iederiene weer binnen was. Om een ure of iene bin'k mit een hiel goed
gevuul weer thuuskommen nao disse opperbest slaegde aktie.
Opmarking.
Et is mi'j opvalen dat bi'j pattie meensken de name van Stellingwarver
Schrieversronte wel bekend is mar dat zi'j over 't generaol niet al te
vule weten over et wark en de daegelikse gaank van zaeken bi'j de
Ronte. Zo gong et mi'jzels aenliks ok trouwes. Ik bin dan ok van
gedachten dat d'r wel wat meer daon wodden mag an de kommunikaosie naor
et volk toe (zie in dit vebaand ok mien opmarkings over et 'Melkert
sydroom'). Et liekt mi'j bevobbeld een aordig idee om et wark van de
Schrieversronte in elke uutgaove van de plaetselike dörpskraanties
(iens in de maond of twie maonden) toe te lochten. Zoe'n dörpskraantien
het haost elk dörp wel (Ni'jeberkoop de "Dorpsomroeper"; (Olde)Berkoop
de "Dreyer") en zi'j bin meerstal slim bliede mit wat hapklaore
brokkies ni'jsgierige/leesgraege tekst. Ik daenke d'r stark over
om mar mit mi'jzels te beginnen. In oonze Dorpsomroeper wi'k mien
schrieversloopbaene wel beginnen. 'k Waachte vanzels et examen eerst
nog wel even of. Stel da'k ..... ie weten mar nooit, now?
Woord van daank.
Veur zoeveer as ik heur now mitmaekt hebbe, vien ik de Stellingwarver
Schrieversronte een beheurlik antoesiaste klub van meensken. Elk op
zien of heur eigen terrein, wet een protte en maekt d'r een hieleboel
wark van. Veurnaemelik vri'jwilligerswark, he'k begrepen. De
kennismaeking is mi'j goed genoeg bevalen om d'r nog een posien bi'j
betrokken te willen blieven. Nao disse kursus en et examen hebben jim
oons as echte schoelemeesters en juffer vanzels rappotciefers geven.
Zonder daj'm daor omme vraogd hebben heb ik dat ok daon, mar dan
ciefers over jim doen en laoten. Diplemaotiek zegd kriegen Geert, Henk
en Pieter van mi'j een dikke voldoende en bin alledrieje aendigd op een
dielde twiede plak. Mien grote winnaor as leidster van disse kursus is
Grietje wodden. Veer veuruut komt zi'j op 't aldereerste plak. Mien
oprecht miend 'dank-je-wel' is vanzels veur allemaole. Niet in 't
laeste plak veur mien mede-kursisten. Zi'j hebben zorgd veur een hiel
angenaem behangegien van de kursusruumte op de tieden dat ik daor ok
was. En de kursusleiders Henk Bloemhoff, Pieter Jonker, Geert Lantinga
en as laetste mar bovenal Grietje Bosma - Dijkstra; dank-je-wel
allemaole.
© Piet/er Bult