Pommeraant
Weeromme naor Etymologie
Weeromme naor Stellingwarfs
Home
Pommeraant
Et woord pommeraant mag dan Fraans klinken mar warschienlik is et van
oorsprong een Italiaanse naeme veur et streekprodukt, de oranje-appel.
Veur de oorsprong van de pommeraant moe'we weeromme naor de apostel
Paulus. Op iene van zien reizen het Paulus de pommeraanteboom mitneumen
van Achaje in et oolde Griekelaand naor et eilaand Sardinië in Italië,
naor de streek Aranzos (arancione = oranje) en hiet sund doe: Pomo d'
Aranzos (oranje-appel). Disse slim speciaole appelboom (ok wel:
oranjeboom of keuningsboom) dreug lekkere vruchten (gooldappel of
keuningsappel), wel een betien te vergelieken mit de sisnaasappel. De
sinaasappel komt liekwels uut China (verbastering van: Chinese appel;
Lat.: citrus sinesis). De pompelmoes (ok wel: pampelmoes; Lat.: citrus
maxima; Nl.: grote citrus) komt uut Oost- en Westindië. De grapefruit
is bi'j slot van zaeke een krusing tussen de pompelmoes en de
sinaasappel.
An de pommeraant (Lat.: malum aurantium) wodde een slim geneeskrachtige
warking toeschreven en woddde dan ok bi'j een protte kwaolen inzet.
Eins hadden onze pommeraanten (veuranstaonde personen, Stell.:
blispoters) van vandaege de dag pompelmoezen hieten moeten omreden de
pompelmoes neffens Johan Wilhelm Weinmann (1683-1741) de grootste en
lieflikste vrucht nuumd wodde. In zien matissa stokt hi'j disse boom
uut as de boom van kennis die oonze veuroolden Adam en Eva deur God
verbeuden wodde om van te snupen.
© Piet/er Bult