Vri'jhied

Weeromme naor Gedichten
Weeromme naor Stellingwarfs
Home


Vri'jhied

As vri'j wezen is: hool ie je stille
want ik hebbe wat te zeggen

As vri'j wezen is: ie aachter tralies, want
dan hoeven wi'j niet bange te wezen
veur al jow aanders wezen en doen en aanders laoten

As vri'j wezen is: de dag van morgen
strak bepaolen deur de dag vandaege
wat minder dag wezen te laoten

As vri'j wezen is: de deuren dichte doen
en op et bieldscharm vri'j bekieken
wat veilig uut de buurt wezen moet

As vri'j wezen is: de hieltied rustig slaopen
omreden de aanderen heur de tonge moedwillig
ontneumen is

As vri'j wezen is: eten wat en wanneer aj' willen
mar de schellen valen laoten in de kranten
waar de honger verzwegen wodt

As vri'j wezen is: niet weten hoeven wat mi'j
vri'jmaekt het, mi'j vri'j hoolt, mi'j
in vri'jhied iedere dag gevangen nemt

As vri'jhied is: waachten tot de aander
mi'j bevri'jdet van aangsten waor 'k
heilig op vertrouw

As vri'jhied mien gedaachten pleistert
As vri'jhied om mi'j henne overal rondomme
en in mi'j wi'jt,
mar veur jow niet te vangen is

As vri'jhied mi'j beschaarmt
tegen jow idenen die veur mi'j te
aanders binnen

As vri'jhied veur mi'j vandaege zo
vanzelssprekend liekt, en ie niet
weten wat dat betekent

Dan is vri'jhied munt veur mi'j
en kop d'r of veur jow
Dan is vri'jhied locht en willekeurig

Mar staot et mi'j lichtkaans wel vri'j
om wat van mien rejaole vri'jhied - mit
goedvienen van weerskaanten vanzels -
tiedelik of veur langere duur
of te staon om jow
van mien verstikkende vri'jhied
te verlossen


© Piet/er Bult

Vertaeling uut et Nederlaans: Vrijheid van Marion Bloem