Winterhaast

Weeromme naor Gedichten
Weeromme naor Stellingwarfs
Home


Winterhaast

Et lochte zoemerklied maekt opni'j weer plak
veur winterse daegen, zo vuul ik et vandaege.
Dikke witte sni'jbujjen bewegen heur now nog
as schaopewolkies in een lochtig grauwe locht.
't Wodt haastig disse 't winter.

De dikke duffelse jasse rokt naor stomeri'je
et ere goed mos et doen mit keenferballen.
Een laeste veurraod roomies maekt plak veur
grote stronken boeremoes, Hemawost, geil spek.
't Wodt haastig disse 't winter.

Et gröslaand allemaol verwodden tot koeiekuil
mit kruderig mooie bloempies, past in balen.
Klaor mit et wark butenomme blieven we binnen
en ankem jaor mit gelok, weer etzelde ritueel.
't Wodt haastig disse 't winter.

Vol ongeduld mar al te haostig tachtig wodden
nooit gien tied, de hieltied deurgaon, deur.
En now weer oftellen willen, in jonkhied
opni'j beginnen, et nog es hielendal overdoen.
't Wodt haastig disse 't winter.

Tussen witte laekens, femilie rond et bedde
ogen dichte en zo now en dan nog even eupen.
't Wodt stillegiesan duuster mar ie zien ok locht
en bi'j je laeste oogopslag wodt fluusterd:
't Wodt haastig disse 't winter.


© Piet/er Bult