Anansi - De slimste
Weeromme naor Anansi
Weeromme naor Klassiekers
Weeromme naor Stellingwarfs
Home
Anansi - De slimste
Meester Superspin Anansi zat es hiel diepe nao te daenken: Stel je now
toch es eventies veur dat d'r iene bestaot die lieper is as ikke... Dat
kon hi'j eins niet hebben en daoromme besleut hi'j om de wereld es in
te trekken en alle Slimhied op te kopen. Inderdaod kwam hi'j hier en
daor iene tegen die een hiel speciaole slimhied bezat, mar gieniene
lokte et om van Anansi zien slimmighied te winnen. Anansi troggelde
alle grote en kleine Slimhied van iederiene of en stopte ze goed vot op
in zien maantien dat maekt was van een kallebas.
Doe hi'j weer thuuskwam begon hi'j opni'j weer diepe nao te daenken:
Waor za'k alles votstoppen? Boven in de ketoenboom, de kankantri,
bedocht hi'j. Hi'j hong et kalebassen maantien an een touwgien om zien
nekke en begon te klimmen. Mar et maantien daanste op zien boek en zat
him wel zo in de wegens dat hi'j mar niet hogerop in de boom kwam.
Algedurig as hi'j halverwegens de stamme van de boom was, glee hi'j
hieltied weer een aende naor beneden. En wiels hi'j zo an et
ommefrosselen was, heurde hi'j opiens de stemme van zien zeuntien van
amper zeuven jaor: "Va, waorom hej' dat kalebassen maantien toch op je
boek hangen?
Spinne Anansi schrok allemachtig. "Verdikkeme nog an toe, hoe krigt die
jonge et in de plasse? De hiele wereld he'k ofreisd en mien eigen vleis
en bloed bliekt lieper te wezen as ikke!" Poer lelk smeet Anansi et
maantien op de grond. Die knapte in wel duzend stokken en alle grote en
kleine Slimhied vleug vot, de grote wereld in. Mar pas op, kiek uut...
een hiele protte Slimhied is ok bi'j Anansi bleven en Slimhied kuj'
overarven, zoas alleman wel wet.
© Piet/er Bult (vertaeling)