Anansi - Wedden dat
Weeromme naor Anansi
Weeromme naor Klassiekers
Weeromme naor Stellingwarfs
Home
Anansi - Wedden dat
Iens was d'r een tied dat et Schildpad iene van de vlogste dieren van
et bos was en hul hi'j mit alleman weddenschoppen. Zo weddede hi'j een
keer mit Tapir: Wie et eerst bi'j de katoenboom kankantri is en
weeromme. Ze trokken een streep in et zaand veur de start en Anansi
Superspinne, die as scheidsrechter optrad, reup: "Op jim plakken, iene,
twieje, drieje, klaor? Of!" Schildpad Sekrepatoe steuf d'r vandeur en
wun glaansriek.
"Et ligt an mien schoenen," klaegde Tapir Bofroe.
"Onzin," zee Schildpad Sekrepatoe, "ik bin now ienkeer altied eerst." -
"Ik hebbe staodige schoenen an," hul Tapir Bofroe vol. "A'k zokke
snelle schoenen as ie hadde, wun ik ok iedere wedstried. Wi'j't zien?"
-
"Hoe dan?" wol Schildpad Sekrepatoe weten.
"Awwe ruilen, kan 'k et bewiezen." Schildpad Sekrepatoe twiefelde.
"Kom, Sekrepatoe," zee Anansi, "lien him jow schoenen, ie bin toch de
vlogste." Mit tegenzin trok Schildpad Sekrepatoe zien race-schoenen
uut.
"Ie meugen ze vuuf menuten anholen, dan wi'k ze weeromme hebben." -
"Ik hebbe ze mar een menuut neudig om te winnen," zee Tapir Bofroe en
hi'j stapte in de schoenen van Schildpad Sekrepatoe en racete vot. Mar
bi'j de ketoenboom kankantri dri'jde hi'j niet omme, hi'j rende mar
deur.
"Hé! Stop!" reup Schildpad Sekrepatoe die amper veuruut kwam in Tapir
zien staodige schoenen. "Kom weeromme, geef mi'j mien schoenen
weeromme." Mar Tapir Bofroe was zomar uut et gezicht verdwenen en hi'j
is vandaege-de-dag nog altied iene van de vlogste dieren.
"Et is jow schuld," mopperde Schildpad tegen Anansi, "ie zeden da'k et doen mos." -
"Mar ie weren toch altied eerst," smeet Anansi tegen. "Kniene Konkoni
en ie bin de vlogsten." Dat is zo, docht Schildpad Sekrepatoe en hi'j
schoevelde naor et huus van Knien en reup:
"Konkoni, zuwwe weer es hadlopen? Wedden da'k van je winne!" -
"Ik wedde niet weer mit jow," zee Knien Konkoni. "Ik hebbe lessend van je wunnen, mar ie wollen mi'j niet betaelen." -
"Dan wedden we toch om ni'je schoenen!, " zee Schildpad Sekrepatoe. Mar
jammer... Kniene Konkoni wol beslist niet. Zodoende moest Schildpad
Sekrepatoe veur altied zien snelle schoenen missen.
© Piet/er Bult (vertaeling)