Brandaan

Weeromme naor Klassiekers
Weeromme naor Stellingwarfs
Home


Brandaan

De reize van Sint Brandaan (Eerste 100 vassen)

01   Luuster, et verhael zal uut aende gaon:
       in Ierlaand daor het een man bestaon
       die mennig wonder zien moch.
04   Aj'm goed van vertrouwen binnen,
       heur dan naor een protte wonderen, heren!
       De Heilige Geest mag mi'j inspireren:
       Die gaf alderdeegst de ezelinne
08   opiens eigen woorden in,
       et biest waor Balaam op ree,
       een heidense man, zoaj'm weten,
       zodat ze as een meenske praotte,
12   doe ze de engel van God zag,
       die tegenover heur staon kwam,
       zodat ze niet meer votgaon kon.
       De engel mit zien vurig zweerd
16   wodde Balaam eupenbaord
       deurdat hi'j et dier verston.
       Die Geest ontsleut doe ok mien mond,
       die alderdeegst een ezelinne ienkeer
20   macht gaf over de meensketael.

       Ongetwiefeld een heilig man
       was de man, genaemt Brandaan.
       Abt was hi'j, ok regent
24   van 3000 monniken of daoromtrent.
       Van ofkomst was Brandaan een Ier.
       Hi'j diende God mit veul plezier.
       Disse man, bi'j et onderzuken
28   van oolde en geleerde boeken,
       leesde daor een protte wonderen van Oonze Here
       - Luusster, meensken! Hier kuj'm leren
       uut de reize van die wieze! -
32   dat d'r twie parrediezen
       op de eerde weren.
       Hi'j leesde van wonderlike
       dingen in dat verbaand
36   en van mennig groot eilaand.
       Ok het de wieze heer leesd
       dat d'r een wereld wezen zol
       die onder disse eerde lag,
40   en wodde et hier dag,
       dan zol daor iederkeer et duuster kommen.
       Van de drie hemels het hi'j verneumen
       en dat d'r een soorte van vis beston
44   waorop een bos op vaaste grond
       gruuid was, boven op zien rogge.
       Mar dit ontkende Brandaan stiems,
       omreden et zo ongeleufweerdig was.
48   Ok leesde hi'j nog hoe Judas
       diel hadde an God zien baarmhattighied
       en hoe him troost toebereid wodde
       op alle zaoterdagnaachten.
52   Brandaan, hi'j was niet bi'j machte
       om zoks iens ok mar te geleuven
       as hi'j et niet zag mit eigen ogen.
       Uut lelkens verbraande hi'j et boek
56   en hi'j het die et schreef vervluukt.
       Dat bekocht hi'j sund die tied duur,
       want hi'j ston nog bi'j et vuur
       waor et boek te branen lag,
60   doe God zien engel tegen him sprak:
       "O, lieve vrund Brandaan,
       ie hebben een zundige daod begaon,
       ten gevolge van jow argernis
64   is de waorhied now verleuren.
       Laot et vuur et boek now mar vreten,
       ie kommen grif nog wel te weten
       wat echt waor is en wat niet.
68   Et is Christus, die jow zegt
       dat ie veren gaon moeten
       de hieltied mar deur, over de baoren
       van hot naor her, negen jaor.
72   Ie zullen naogaan: wat waor is
       en wat alliend mar leugens wezen kunnen."
       Dit zol mit piene en muuite gaon,
       en zo boette hi'j veur 't boek
76   en dat hi'j de schriever vervluukt hadde
       en kwam in zorgen zonder tal,
       reizende waor God him kommandeerde.

       Doe Brandaan, de heilige man,
80   op die meniere te weten kwam
       wat God him zels gebeud,
       weren zien zorgen wel hiel groot.
       Hi'j reup Oonze Here an
84   as hi'j om Maria heur naeme,
       wat dingen ok kommen zollen,
       toch zien ziel mar beholen, moch
       dat, wat him ok overkommen moch,
88   de hemel him niet ontneumen wodde.
       Brandaan is daorweg
       naor de kust toe gaon
       en leut him een schip bouwen
92   waor hi'j op vertrouwen kon:
       een vurehoolten mast,
       een zeil dat hiel goed sneden was
       en mit touw omzeumd.
96   Rondom de romp toe, zo et heurt,
       klinknaegels van stark iezer,
       dan ok op dezelde wijze
       as de ark die Noach maekte
100 doe de zundvloed him iens raekte.
       Et anker maekte hi'j van staol,
       dan gong et schip niet an de hael
       as et blieven mos waor et lag.


© Piet/er Bult