Lao'we es een auto kopen
Weeromme naor Verhaelen
Weeromme naor Stellingwarfs
Home
Lao'we es een auto kopen
Woj'm nog een paantien koffie hebben? zee 't maegien now al veur de
dadde keer. Now, om eerlik te wezen kwammen we eins veur een ni'je
auto, zo was oons bescheid. We bin hier henne stuurd omreden jim zokke
mooie en veural ok, zokke goeie auto's verkopen. Et maegien krege d'r
zuver wat blossies van op heur wangies want ja, we zatten daor al een
mooi posien mit allerhaande slim glimmende foolderties mit een protte
technische uutleg in 'e haand mar we wollen op de duur toch eins wel es
in ‘oonze ni'je auto' zitten. Gewoon es lekker weer die appatte locht
opsnoeven van krek oppoetst ni’j leer en van et rubber van de nog
pikzwatte banen. Op een kilemeterteller kieken daor nog een hieleboel
nullen op staon en hielendal aachteran een drieje of misschien toch al
een vieve.
Wi’j reden now al weer een jaor of wat in oons brikkien dat et wodde
tied en ruil him weer es omme veur een ni'je. 't Mos eins mar krek weer
zoe'niene wodden hawwe tegen mekeer zegd. Hi’j het oons altied nog van
A naor B brocht en och, de bi’jheurende gerage scheelde ok niet alles.
Overal is wel es wat en now wee’we wawwe hebben. Bi'j een aander is ’t
eerst altied even weer wennen en naotied ok nog mar ofwaachten. Doe de
verkoper de pries nuumde die we d'r optoe leggen mossen schrokken we
vanzels wel een betien mar ja, dan ried'ie ok weer ni'j en da's ok wat
weerd. Laot een aander straks die kepotte uutlaot en de ni’je akku d’r
mar inzetten, zo donkt oons.
Een goeie kunde brocht oons een dag of wat laeter even wat van de
wieze. We mossen toch beslist ok es even naor een gerage van zien mark
gaon te kieken. Veur mar een betien meer centen hej' vule meer
auto dan daj'm now hebben, zo was zien bescheid. Of 't now was om
him te plezieren of om dawwe zels toch wat ni'jschierig wodden weren,
dat wee'k niet meer mar aanderemorgens toogden wi'j al op 'e tied naor
zien gerage. En daor gebeurde et dus. Een protte mooie foolderties en
meer koffie as dawwe opkonnen mar een auto verkopen, ho mar. 'n Stief
ure laeter hewwe toch nog een briefien mit een pries van de - neffens
oons wat arregaante - verkoper mitkregen. Vule nocht had hi'j d'r
vandaege niet an, zo leek et wel. Now wol 't geval dawwe dezelde daegs
ok nog even in de stad wezen mossen. Lao'we daor now bi'j toeval langs
een gerage rieden mit krek datzelde mark.
Mit mien voete in ién keer op de ho-hoolder kowwe nog krek de briede
oprit van die grote en slim glimmende gerage oprieden. 'Oonze' ni'je
ston hielendal veuran in de pronkkaemer en ze hadden de deuren al
waegenwied veur oons eupen zet. Hier kregen we ok, deur alweer zoe'n
knap ding, opni'j een beker koffie anbeuden. Doe wi’j oons an de
verkoper daore veurstelden, legde ik him et briefien veur van zien
kollega van de gerage waor as wi'j morgens krek even west weren. Oei,
zegt ie, aj’m daor al bi'j mien kollega west binnen dan kuj’m hier now
gien auto kopen.Wi'j bin van ien en etzelde bedrief en wi'j hebben
onderling de stelriegel dawwe mekeer gien vlooien ofvangen en dawwe
oons niet tegen mekeer uutspeulen laoten, zee de man mit naodrok. En
daor bleef hi’j bi'j. Ok naoda’k wel drie keer tegen him zegd hadde
dawwe niet naor die veurige weeromme gaon zollen, beslist niet! Aj'
oons now gien auto verkopen willen dan gao'we toch wis en werachtig
naor een kollega van een hiel aander mark. Wi’j bin now al haost drie
daegen doende om een aandere auto en et mos en et zol vandaege
gebeuren, zo hawwe docht. Et kon niet! Hi’j hadde om disse reden al es
eerder drokte had mit zien baos en mit zien kollega en dat wol hi’j now
niet weer.
We bin doe drekt mar deurreden naor oonze oolde vertrouwde gerage en
hebben toch een betien veraldereerd over zokke onneuzele
autoverkopersriegelties, niet iens meer perbeerd om nog wat van de
pries of te kriegen die de man eerder al es nuumd had. Nao dawwe et al
iens weren gaf de verkoper oons d’r zomar een radio op toe. Ze zollen
‘m d’r dan ok wel even inzetten. Kiek, lao’k dan bi’jtieden mar wat
meer geven, mar zoe’n gerage mit zoe’n verkoper past mi’j vaeks toch
beter.
© Piet/er Bult