Leergeld

Weeromme naor Verhaelen
Weeromme naor Stellingwarfs
Home


Leergeld op zien Fraans

Aj' as joongien veur et eerste naor een ni'je baos gaon, woj' deur je ni'je kammeraoden nog wel es beheurlik te vieter neumen. Dat is mien ni'je kammeraod in Frankriek ok overkommen. Sund die tied zit hi'jzels ok vol van dat soorte van grappies...

Doe 'k mien kammeraod Jean-Pierre vertelde da'k een middag mit mien buurman vot west hadde en van mien onverwaachte mar slim plezierige kennismaeking mit 'Jeu de boules', kwam hi' j twie daegen laeter naor mi'j toe mit een mooi hoolten kissien. Krek zoe'n kissien a'k de buurman ok al es mit lopen zien hadde. Geheimzinnig tilde Jean-Pierre et deksel wat op en kiek es an, daor laggen ze, zesse mi'j toelachende glimmende Jeu-ballen mit twie vrolik kleurde ballegies (butties) daor tussenin. "Dit is een settien hiele dure wedstriedballen, die ik lange leden al es in Frankriek kocht hebbe" zee Jean-Pierre.

Now, inderdaod, alderdeegst as ni'jkommer in disse takke van sport koj' wel zien dat dit een hiele dure set wezen mos. De boules glommen as een gladde ekkel waor de ofragde ballen van mien buurman lange niet an tippen konnen. Veurzichtig nam mien kammeraod, tussen zien doeme en middelvinger, iene balle uut et fluwielen hollegien en legde die in mien al graopig uutsteken haand. "Ie vulen geliek de kwaliteit, is zo niet?" zee Jean-Pierre. As een kiend, mit alliend oge veur de glimmende ballen, ha'k de twinkeling in zien ogen mist...

"Wat kost zoe'n settien ongeveer?" was mien oerhollandse eerste vraoge. "Now, ik mien dat ik d'r doe rond de honderdvuuftig euro veur betaeld hebbe. Vanwegens oonze protte vekaansiereisies naor Frankriek wo'k doe per se een goed settien hebben om zo now en dan mit speulen te kunnen op de dörpspleinties daore. Et is d'r jammergenoeg nooit van kommen. Ik gao jow dit dure settien anbieden veur een speciaole vrundenpries. As goeie kammeraod meug ie ze veur honderd euro van me overnemen."
Dit mos wel een kopien wezen, leek mi'j zo toe...

Doe 'k veur de eerste keer mitspeulen zol bi'j oonze club, kwa'k dan ok groots anlopen mit mien slim goedkoop op 'e kop tikt mar hatstikke dure 'wedstried ballen'. De clubleden die d'r al weren keken haost allemaole mit een begerige blik naor de zes glimmende ballen in mien al lieke glimmend beukehoolten kissien. "Toe mar, toe mar," zee de man die laeter de wedstriedleider bleek te wezen, "nog gienertied een boule gooid mar wel al drekt de duurste ballen die d'r mar bestaon!"

Op anraoden van een clublid bin 'k de aandere daegs nog even naor de winkel vlakbi'j kammeraod Jean-Pierre in et dörp west om nog wat anvullende dingies an te tugen, zoas een doekien, een ruulmaote, enz. In et schap van de petanque-spullegies zag ik krek zoe'n zelde kissien as dat ik veur een zaacht priesien van mien beste vrund Jean-Pierre overneumen hadde. Toch even stiekem et deksel optilt. En kiek, precies de zelde zes superglimmende ballen en de twie vrolik kleurde butties daor tussenin veur de all-in pries van € 14,95...


© Piet/er Bult