Mien dorp

Weeromme naor Verhaelen
Weeromme naor Stellingwarfs
Home


Mien dörp: Ni'jberkoop

Et kleinste dörpien van Stellingwarf-Oostaende. Dat is oons Ni'jberkoop. Een dörp zoas zoveule en toch zo hiel biezunder. Riek wodden deur heur aarmoede van zaand- en veengrond in een oold keliezen laandschop. Pattie zaandpaeden bin deur de jaoren verhadded wodden. Gelokkig krek niet allemaole. In 't oolde heideveld een echte pingo, een protte voegels, slangen en evertasken. Zels leeuwen en tijgers hebben we hier krek as oons eigen adderman.

En aj' nog es wat dromen willen, weet dan van oonze Kuunder. De Friezen numen heur vaeks: de Tsjonger. Van eer een wilde woeste stroom mar laeter schilderd deur et laandschop van et waeter. Aj' goed kieken, kuj' daor in je eigen diepste zien. Bi'j 't luust'ren zuj' allienig stilte heuren. Et gevuul zal je daor zuuite smaeken en roeken dot et daor naor lange leden.

Et alledaegs gerief van schoele, bakker en een winkeltien mit snuusteri’je het d'r ooit wel west mar dat is al weer laank veurbi’j. En 't is ok niet dawwe ’t de hieltied missen, wi’j numen et liever: inruild veur 'n riekdom meer van disse tied. Tillefoon, elektrisch, gas en waeter uut de kraene hebben we hier rondomme. 't Riool en internet dat geft nog wel es wat perblemen. Zonder de ogen te sluten veur de hiele wereld, hebben wi’j toch meerstentieds genoeg an de stokkies uut oons eigen dörpskraantien.

Waor vroeger veur pattie meensken de karke et middelpunt was van et daegeliks bestaon is now ‘t dörpshuus en een kroegien veur in de plak kommen. Meziek maeken, tenielspeulen, klaoverjassen en vergeerderen in naeme van et plaetselik belang doen we hier altied mitmekeer. Bi'j wegraeken en geboorte van ni'jleven liekt et bi’jtieden krek awwe allegere femilie van mekeer binnen. Wi'j hebben nog alle tied veur ‘een praotien over de hede' over et laeste ni'js of een beste rattel van de buurt. Van de karke is alliend et hof nog over. Da's veur de iene een draotien naor ’t verleden en veur een aander het zicht op de toekomst.

Gien versierde waegens of mederne gleensterlochies om oons dörp wat 'op te leuken' mar et tegere maeken van een frisse morgenkuijer en mit vaeker as iens in 't jaor een eigen kulturele aovend, maeken wi'j et oons hier naor de zin. Van puttienschepper tot keunstemaeker kuj' tegenkommen in oons dörp. Doeners en dromers wonen hier gemoedelik deurmekaander en zonder mekeer ok mar een strobried in de weg te leggen.

De drokte van ’t verkeer, de zonuumde kleine kriminaliteit, we hebben et allemaole. Daor hebben wi’j ’t soms best wel muuilik mit, mar we hebben d’r ok mit leren leven. Van poletiek moe’n we hier niet al te veule hebben. We gaon toch graeg en stillegies oons eigen gaank. Baank- en verzekeringswezen hebben hier niks te zuken. Geld en zekerhied daor hebben wi’j et niet zo op. ’n Betien vri’jhied en wat gemienschopszin, dat is oons grootste goed en daorin vienen wi’j oons gelok.


© Piet/er Bult