Moeke, waoromme goel ie
Weeromme naor Verhaelen
Weeromme naor Stellingwarfs
Home
Moeke, waoromme goel ie ?
"Waorom goel ie, moeke?" vreug een klein joongien an zien moeke.
"Omreden ik een vrouw bin." gaf ze as bescheid. "Dat begriep ik niet."
zee et joongien. Zien moeke troedelde him en zee mit een glimpien om de
mond: "En dat zuj' ok gienertied begriepen lief kiend, mar dat geft
niks, heur."
Laeter vreug et joongien an zien vader: "Va, waorom goelt moeke seins zomar?"
Zien vader kon alliend mar zeggen: "Alle vrouwluden goelen seins zomar."
Et kleine joongien kwam tot wasdom en wodde een jongkerel, mar hi'j
vreug himzels nog de hieltied of waorom vrouwluden seins zomar goelen.
Bi'j slot van zaeke reup hi'j de hulpe van God en vreug him: “God,
waoromme goelen vrouwluden?”
God gaf doe dit bescheid:
"Doe 'k de vrouw maekte nam ik mi'j veur da'k wat hiel speciaols maeken
wol. Ik gaf heur schoolders, stark genoeg om alle piene van de hiele
wereld te dregen. Mar ik gaf heur ok zaachte aarms om troost te geven.
Ik gaf heur de kracht om et kraombedde deur te kommen en om tegen
ofwiezings te kunnen, waor ze pattietoeren heur diel van kriegen zol,
seins alderdeegst van heur eigen kiender. Ik gaf heur de hadhied en et
deurzettingsvermogen om veur heur vrunden en femilie te zorgen,
alderdeegst as iederiene et opgeft. Ziekte en vermuuidhied holen heur
dan niet tegen en zi'j klaegt gienertied...
Ik gaf heur gevulighied, zodat zi'j van heur kiender hoolt, onder wat
omstanighied dat ok wezen mag en om kiender te helpen mit heur twiefels
en heur aangsten. Ze het een speciaole gaove om kiender weer lachen te
laoten. Ik gaf heur de kracht om veur heur man te zorgen, ondaanks zien
protte fouten. Ik maekte heur uut een ribbe van de man om zien hatte te
huden. Ik gaf heur de wieshied om te weten dat een goeie man zien vrouw
gienertied hatzeerte andoen zal en ok om heur te helpen deur goeie en
ok minder goeie tieden. Veur al dit hadde warken gaf ik heur ok traonen
om te laoten. Die bin van heurzels, ze kan ze bruken as ze die
vanneuden het. Dit is heur ienige zwakte...
Aj' heur goelen zien, zegge heur dan hoevule aj' wel niet van heur
holen en hoe goed al de dingen binnen die zi'j veur jow en al die
aanderen dot. En as ze dan nog de hieltied goelt, weet dan dat ze heur
grif een betien beter vuult."
© Piet/er Bult (vertaeling)