Monkey Mountain

Weeromme naor Verhaelen
Weeromme naor Stellingwarfs
Home


Monkey Mountain


Et was tegen twaelf ure dawwe op bedde raekten mar et wol mar min slaopen. Goed ien ure he'k mi'j wat kleren anstruupt en kuierde et huus mar es rond. Doe 'k bi'j de weg even staon bleef te kieken za'k opiens de grune mannegies vlak veur mi'j in 't laand daelekom-men. Et UFO-ding ston nog mar krek an de grond of de inloopkleppe klapte uut en d'r kwam een gruun mannegien op mi'j toelopen. Hi'j nam mi'j bi'j de aarm en we leupen zonder wat te zeggen naor zien zoefschip. Doe we et trappien nog mar krek opgaon weren wodde dat ding inhaeld en in minder as twie sekonden wawwe los van de grond. Een licht goezen was eins et ienigste wa'k heurde, krek a'k sleup mit een sni'jschaarm op 'e tillevisie. Nog gien twie tellen laeter zette et grune mannegien oons argens an de grond. Op zoe’n drieduzend meter boven de zeespiegel ston ik opiens in China, "Welkom in Shidu op de Monkey Mountain" ston op een bod. We stapten uut en et grune mannegien leup veur mi'j uut een smal weggien of. Ik daenk dawwe zoe'n dattig menuten lopen hebben doe de weg aorig smal wodde, nao nog een posien alderdeegst niet brieder as drie plaanken. An de iene kaante een steile rotswaand omhogens en an de aandere kaante een diepe ofgrond. Zeg mar gerust: een hiele diepe ofgrond, zo diepe aj' mar kieken konnen.

Et grune mannegien hadde nog mar krek tegen mi'j zegd da'k de hanen mar wat in de buse holen mos want et kon wel es wat geveerlik wodden. Doe 'k de haand in de buse steuk vuulde ik een benaan. Dat leek me wel even lekker toe dat ik begon votdaolik et vellegien d'r of te strupen om 'm op te eten. Doe gebeurde waor et grune mannegien mi'j veur waor-schouwd hadde. Opiens ston d'r een aep vlak veur me. Niet zoe'n gewoon klein aepien zoas hier in de dieretuun van Emmen mar een alderverschrikkelikste groteniene, haost lieke groot as da'k zels was. Veurda'k goed en wel deur hadde wat d'r gaonde was wa'k de benaan vot al kwiet. De smiesterd had 'm mi'j onthaeld en scheut liekehadde as hi'j teveurschien kommen was ok weer de slim steile rotswaand omhogens. Doe 'k mien haand weer in de buse dee vuulde 'k een fototoestellegien. Ik hael et ding uut de buse en wil een foto maeken van die malle aep. Mar veur da'k et wus ston d'r weer zoe'n grote oerang-oetang vlak veur mi'j en griste mi'j et toestellegien uut de hanen. Ik hadde onderhaand zels niet iens deur da'k een bruun spoor aachterleut wao'k leup. 'k Was letterlik schietende benauwd. Ik zag nog krek dat et grune mannegien him ommedri'jde naor mi'j toe en zee...

Doe leup de wekker of, et was halfachte, maendagmorgen in de Stellingwarven...

© Piet/er Bult