Ofstaansbedienings
Weeromme naor Verhaelen
Weeromme naor Stellingwarfs
Home
Ofstaansbedienings
Now las ik eerdaegs in de kraante dat d'r in Amerike illigaole
ofstaansbedienings te koop binnen waor aj' op ofstaand de
verkeerslochten wat mit regelen kunnen. Zie, dat vien'k now mooi. Zoe'n
ding liekt mi'j ok wel wat. Ie kommen op een drokke krusing toerieden
en dan een meter of wat veur de stopstreep drok ie vanuut je auto even
op et grune knoppien en votendaolik springt et stoplocht veur jow op
gruun en kuj' gewoon deurrieden. Zol 't niet mooi wezen as elkeniene
zoe'n knoppedeusien in de auto hebben zol? Neffens mi'j zollen die
aand're beide laampen d'r dan ok wel uutsloopt wodden kunnen. Ik
geleuve grif dat d'r gien inkeld verkeerslocht nog es weer geel- of
roodbranen zol. Dé oplossing veur et file-perbleem. Elkeniene kan te
alle tiede gewoon deurrieden.
En zo liekt et mi'j ok wel es mooi toe om een ofstaansbediening te
hebben waora'k de auto van mien buurman mit besturen kan. Of liever
zegd, de auto van mien veurman. Die auto die al de hieltied veur me
ridt en mar niet an de kaante gaon wil. Op de hiele rechterhelte van
oonze dubbele baene is gien auto of moter te bekennen en toch blift
mien veurman mit de oogkleppen op stief op de linkerbaene deurtoffelen.
Op zoe'n mement zo'k graeg een ‘joystok’ hebben om die man/vrouw
aachter et stuurrad een zwieperd naor rechts te verkopen. Een hiele
inkelde keer he'k ok wel es hiel stiekem de biestelik agressieve
gedaachte om him/heur niet naor rechts mar juust nog een meter of wat
veerder naor links opschoeven te laoten. Zoe’n gedaachte daenk ik
trouwes nooit hadde-op.
En zo docht ik lessend ok al es een posien over dat pliesiemannegien
die je de snelhied konterleerd. Zol hi'j zels wel es een flippe
kriegen? En hoe laank zol een dag duren veur zoe'n baentiesman? Ik
bedoel, niet op de klokke vanzels mar veur zien gevuul. Laot him mit et
daelezetten van dat flitsding een stief ketier kalmpiesan doende wezen.
Dan het hi'j de hieltied nog drie ketier in 't ure dat hi'j in zien
auto zit te kraantelezen. Zeuven keer drie ketier is meer as vuuf uren
daegs de kraantelezen! Ik leuf da'k mar es op dat baentien solseteren
moete. Now niet drekt lelk op mi'j wodden. Ik belove jim da'k de
batteri'jen d'r dan eerst uuthaele of ik dri'je de laampe wel wat
lossies a'k dat ding argens aachter een pollegien gruun daelezette.
Misschien kan'k et ding ok wel zo now en dan even veur de aorighied
flitsen laoten mit krek zoe’n ofstaansbedien(d)ing.
Zoe'n zapper haj' neffens mi’j eerst allienig mar veur de tillevisie
mar tegenwoordig hej' ze haost overal veur. Eerlik is eerlik, die veur
oonze geragedeure vien'k wel es makkelik mar om de lochten in huus now
mit zoe'n ding te regelen, dat giet mi'j haost te veer. 'k Was lessend
ok al es bi'j iene over de vloer die de eupenheerd d'r mit bestuurde.
'k Har de man of de vrouw van ’t huus hielendal niet mit hooltblokken
en lucifes in de weer zien en toch begon de eupenheerd iniens bliede
naor mi'j te flonkeren. Et knisperende geluud van branend hoolt kwam
uut een luudsprekertien en om de vuuf menuten blaosde de nepkachel een
betien rookstinkeri'je uut een flessien de kaemer in. Technisch
prachtig mooi vanzels, mar 'k moet d'r niks van hebben. Ik kan d’r wel
van griezen!
En now dus zoe'n ding veur die verkeerslochten. Ze bin d'r ok al veur
elektrische honties en veur een grösmi'jmesienegien. Veur je eerste
paantien koffie of thee en zels veur een vas stokkien bolle morgens,
hej' niet iens een ofstaansbediening meer neudig. Die kuj' aovends
teveur al bestellen. Wat zol de volgende uutviening wodden op dit
gebied? Et op ofroep haelen van de fiets uut de schure of et op
ofstaand opblaozen van belonnen? Allemaole onnutte dingen vanzels. Ik
kan mi'j mar iene warkelik zinnige ofstaansbediening bedaenken. Ik hoef
eins allienig mar ien klein knoppien. Ien zoe'n knoppien om op ofstaand
de vrouw es in de bienen te kriegen. Dat zo'k nog wel es makkelik
vienen.
© Piet/er Bult