Opgelaserd

Weeromme naor Verhaelen
Weeromme naor Stellingwarfs
Home


Opgelaserd

Riede ik vandemorgen al op 'e tied naor mien wark, en ja heur... staot d'r weer een pelisiemannegien mit zoe'n 'laserpistool' langs de kaante van de weg van Wolvege naor Oosterwoolde. Now ree ik op dat stuit lao'k mar bi'j benaodering zeggen zoe'n dattig kilemeter te hadde en mos dan ok aorig op de ho-hoolder om nog op 'e tied veur de man te stoppen. En a'k meneer et rie- en kentekenbewies mar even zienlaoten wol. Now, dat wo'k vanzels wel en wiels hi'j daor wat in ommesnuuide vreug hi'j kwaanskwies waor a'k zo hadde van doel was om henne.

"Ik komme krek van bedde en bin onderwegens naor de baos", zee 'k de man in al mien eerlikhied.
"En wat doej' dan veur wark?" vreug de beste man.
"Ik bin penisverlenger" zee 'k.
"Penisverlenger?" zee de man, slim veraldereerd, "daor he'k gienertied van heurd! Hoe doej' zoks?"
"Och," zeg ik, "daor bin verschillende menieren veur en ik bruuk d'r ok verschillend ark bi'j en we hangen zoe'n kerel ok wel es an zien gemachte op, krek zolange tot dat zien pissertien zoveer uutrekt is tot seins wel iene-meter-tachtig."
"Iene-meter-tachtig!" reup de beste man, "wat moej' toch in hemelsnaeme mit een lul van ien-tachtig?!"
"Now, zoe'n lul geven we dan meerstal een laserpistool en zetten we langs de kaante van de weg van Wolvege naor Oosterwoolde en ..."

Et risseltaot: Een boete veur krap 30 kilemeter te hadde rieden: 185 euro en
een boete veur de affrontering van een baentiesman in 't wark: 80 euro.
Mar zo as de man mi'j ankeek: niet te betaelen…!!!


© Piet/er Bult