Pillegies en aander snobbersgoed

Weeromme naor Verhaelen
Weeromme naor Stellingwarfs
Home


Pillegies en aander snobbersgoed

Oons moeke het de laeste jaoren van heur leven een protte pillegies opeten. Zo now en dan had ze wat starkers neudig mar meerstentieds kon ze et aorig in de bienen holen mit Chefarine-4. Die pillegies tegen heufdzeerte en ere ongesteldheden zatten doedestieds nog in een prachtig mooi glaezen buisien mit een hiel klein mooi rood doppien d’r op. Een hiele lange tied he’k die glaezen dingen doe speerd. ’t Begreute mi’j vanzels wel es veur oons moeke mar ‘k was ok vaeke weer wies mit een ni’je anwinst in mien deusien met glaswark. In mien dreumeri’je zo’k daor laeter a’k groot was wel een hiel labberetorium mit opzetten kunnen. Zo now en dan dee’k doe in die kleine flessies verschillende soorten waeter veur mien o zo belangriek onderzuukswark. Slootwaeter, waeter uut de regenwaeterputte, uut de pompe bi’j ‘t stap, wat jarre uut de gruppe, stiekem wat thee uut de theepot en nog vule stiekemer ok wel es een peer druppelties ooldeklonie uut oons moeke heur zundagse tassien. Jim moe’n et mar niet veerder vertellen mar ik hebbe ok wel es een betien in zoe’n buisien pist.

Op mien vri’je woensdagmiddag kon ik uren aachter ’t huus in de li’jte en in de zunne mit mien flessies ommepielen. De hieltied mar overgieten van et iene in ’t aander buisien, soms es een betien mixen van verschillende soorten in ien buisien. D’r mos vaeks ok vuur an te pas kommen vanzels. Daor he’k trouwes nooit een protte gelok mit had. Of de glaezen Chefarinebuisies knapten mi’j iene veur iene of et hiel veurzichtig begonnen vuurtien leup verschrikkelik uut de haand. En de hieltied slim stinken vanzels. Hiel slim stinken bi’jtieden. A’k dan nao een peer uren tied weer gien zulver of goold maekt had, dan spuulde ik mien flessies weer mooi schone en dee d’r weer allerhaande aandere vieze nattighied in. ’t Is mi’j ok wel es overkommen dat d’r van zoe’n flessien een dag laeter de doppe ofgaon was omreden de inhoold d’r van - vaeks uut de gruppe - nog wat naogistte. D’r bin vandaege-de-dag vule meer soorten van pillen en poeiers as doe mar d’r is gieniene die nog in zoe’n mooi glaezen buisien zit. Nee, die mederne pillen zitten in van die onogelike deurdrokstrips.

Now die verpakking niet meer zo mooi is as doedestieds, gao’k mi’j meer en meer op de inhoold toeleggen. Zo is d’r now al weer een peer jaor een pillegien dat speciaol uutvunnen is veur manluden die et (of beter zegd: him) op et juuste mement even niet vienen kunnen. Dat vun ik doe een mooie uutviening. Niet da’k d’r now drekt om verlegen zat vanzels mar gewoon op kommando wat onderdielen van je lichem wat extra’s doen laoten kunnen mit zoe’n pillegien..... Aj’ es een aende te fietsen willen dan neem ie even zoe’n fietspillegien en dan kuj’ wel zes uren aachtermekeer te fietsen. Veur een stevige kuier hej’ een looppillegien. Een ure of zesse lopen is je dan de muuite niet. Ze hebben now weer een ni’j medel van die pille uutvunnen. Die eerste die warkte mar zoe’n zes uren. Dit ni’je medel hoolt et wel zes-en-dattig uren vol ston in de kraante. Now zoveer wil ik eins niet iens lopen. Zes-en-dattig uren! Stel je veur daj’ een hiel aende veur de wiend uutlopen en dat et pillegien dan opiens uutwarkt is. Dan moej’ dus ok nog een hiel aende op eigen kracht weeromme lopen.

Nee, ik geleuve, die pillerommel is an mi’j niet besteded. Nog niet! Ik bin toch liever een keer flink aachter de poest zonder da’k mit zoe’n mal ding, an niks aanders meer daenken kan, dan dat dat pillegien toch aendelik es uutwarkt wezen zal. En tegen de tied da’k d’r warkelik niet meer zonder kan dan he’k et liefst zoe’n oold medel pillegien van zes uren of liever nog minder. Hoe koj’ aanders nog an je acht uren naachtruste toe?

© Piet/er Bult