Riegelties en winkelkarregies

Weeromme naor Verhaelen
Weeromme naor Stellingwarfs
Home


Riegelties en winkelkarregies

Hej’m ok zoe’n hekel an al die riegelties vandaege-de-dag? En dan bedoel ik nog niet iens die kleine riegelties in de polissen van verzekeringsmaotschoppi’jen. Die bin vanzels ok vaeke slim genoeg, mar ik doele now op van die kleine riegelties die bedoeld binnen veurdaj’ wat meugen of juust niet meugen. Veurige weke ston d’r weer zoe’n riegeltien in de kraante. Een man was deur de pelisie oppakt wodden omreden hi’j gien winkelkarregien bruukt har veur een kleine bosschop. Dat vun’k vremd, want ik doe mien kleine boschoppies altied zonder winkelwaegentien. Een hiel inkelde keer doe’k et wel es in een flessien veur de dokter mar ik hebbe et nog nooit in een winkelkarre daon. Hielendal misbegrepen dus. Et gong gewoon om een pak melk of sokswat. En die man hadde dat pak eerst niet in zoe’n winkelwaegen legd mar zo in de haand mitneumen naor de kassa om of te rekenen. Dat kan vanzels niet want in haost elke winkel hangt wel een bod mit et kleine riegeltien: “Winkelwaegen of -maantien verplicht”.

Aj’ now bi’j toeval es niet meer as veertig centen in de buse hebbe dan kuj’ bi’j pattie winkels dus gien rollegien drop kopen veur die veertig centen want ie moe’n eerst een muntien van vuuftig centen bruken veur ‘n winkelwaegen. Da’s toch mal? Ie kun mit gemak zoe’n rollegien drop betaelen veurwat de pries angaot en ie kun ‘t rollegien zat in iene haand holen en toch kuj’ et niet in zoe’n winkel kopen. Bi’j een bezinepompe lokt et meerstal nog wel krek as bi’j een protte kleine winkelties. Mar butendat is et vanzels gien gezicht om mit een winkelwaegen of een maantien et hiele winkelpad deur te lopen mit allienig mar ien rollegien drop d’r in vanzels. Misschien is dat ok wel de diepere gedaachte d’r aachter. Mit ien zoe’n rollegien drop in zoe’n grote winkelkarre loop ie vanzels beheurlik veur gek. As winkelman zo’k dan altemet ok bedocht hebben, laot ze daor mar mit in zoe’n grote karre veur gek deur de hiele winkel sjouwen. ’t Is dan wel haost wis dat ze d’r onderwegens nog wat bi’j ingooien.

Zo bin d’r vandaegededag vule meer van dat soorte van - in mien ogen - onneuzele riegelties. Bi’j een hiele protte zaeken kuj’ niks meer kopen aj’ niet mitdoen willen an heur systeem van automaotische incasso. Now, ‘k wil best wel betaelen veur van alles en nog wat en ‘k bin ok nog nooit betrapt as wanbetaeler, en toch kan’k daor dan niet terechte. Omda’k bi’jtieden nogal dwas anlegd bin as ’t om riegelties gaot, kan’k haost nargens meer terechte, zo komt et nog. ’t Is nog niet iens zo hiel lange leden dat ze je veur een riek man hullen aj’ mit een briefien van twiehonderd gulden betaelen wollen. Now kuj’ haost nargens meer terechte aj’ mit een briefien van honderd euro betaelen willen. Dat wodt niet meer anneumen want d’r staot dan argens een riegeltien: “Daor hebben wi’j niet van weeromme.”

En dan al die verschillende passies! Veur haost elke winkel een aander passien mit een slim geheime pinkode. En weer zoe’n riegeltien: “Passien klaorholen bi’j et ofrekenen.” Op zoe’n passien wodden dan ok drekt de zegelties bi’jteld die je toekommen. Niet daj’ daor wat van vernemen heur. As d’r now tien zegelties tegoed op staon of d’r staon zeshonderdtachtig op, et vuult niks aanders an op zoe’n passien. En daor zit now krek mien grootste perbleem. Ik vien et now ienkeer noflik om te vulen waor et over giet. Et verschil in een stokmennig zegelties wi’k tussen de vingers vulen krek as een staepeltien van drie tienties. Now maekt geld niet altied gelokkig - zeggen die meensken die al genoeg hebben -  mar et tastbere gevuul van een protte, mar ok van een betien dreegt bi’j mi’j wis-en-waorachtig een stokkien bi’j an mien daegeliks gevuul van gelok.


© Piet/er Bult