Slotten en sleutels

Weeromme naor Verhaelen
Weeromme naor Stellingwarfs
Home


Slotten en sleutels

Slotten en sleutels weren zien grote liefhebberi'je. Niet as inbreker mar gewoon vanwegens de technische kaante van die dingen. Want ja, 't was toch machtig aj' wat opbargen konnen aachter slot en grundel waor as giniene aanders dan ie allienig mar bi'j kommen konnen. 't Gaf him haost wat een gevuul van macht. Hi'j was nog mar krek een jaor of zesse doe hi'j zels zien eerste slottien kocht had mit wel drie sleutels. As de aandere kiender an 't slotienspringen weren dan was hi'j mit zien slottien in de weer. Doe hi'j laeter al wat groter was en zien buisies mit heur eerste brommertien en mit maegies ommeprutsten was hi'j nog de hieltied de man van de slotten en sleutels. Al een peer keer had hi'j de buurvrouw hulpen die heur huussleutel kwietraekt was. Ze was wel vaeker heur sleutels kwiet. 't Mooiste was die keer doe de sleutel van heur auto wegraekt was. In een ommezien had hi'j doe de auto toch an de praot kregen zodat buurvrouw naor de gerage rieden kon om d'r een ni'j slot in zetten te laoten. En now had de pelisie him oppakt en zat hi'j de hiele naacht al in de cel opsleuten. Zo sleutelman, hadden ze nog zegd, zie daor mar es uut te kommen. Ie bin toch zo goed mit slotten en sleutels?

Gisteraovend laete was hi'j deur de winkelstraote lopen doe d'r bi'j de jewelier een man an et slot van winkeldeure te priegelen ston. De man was een betien schrokken doe hi'j d'r langes leup. Doe ze mekeer zaggen hadde die man zegd dat hi'j de baos van de winkel was en dat hi'j zien sleutel vergeten hadde. Hi'j mos eins nog even wat belangrieks uut de winkel haelen mar now kon hi'j d'r niet inkommen. En om now hielendal henneweer naor huus te gaon en de sleutel ophaelen, dat was nog al wat. Mit et stokkien iezerdraod wat oonze slotteman altied wel in de buse had maekte hi'j in een ommezien de deure veur de man eupen. Die hadde him nog slim overdreven wel drie keer daankjewel zegd.

Krek veurdat hi'j thuus was, wodde hi'j aachterop reden deur een pelisieauto. Die was vlak veur him staon bleven en ze hadden him zonder wat te zeggen aachter in heur auto zet. Op et buro hadden ze 'm laeter wel drie keer uutheurd over wat hi'j daon hadde. Die man bi'j de winkeldeure was de baos hielendal niet, zeden ze. Et was geoon een inbreker! Die hadden ze ok al bi'j zien kladden mar die hadde zegd dat hi'j de deure veur him eupendaon hadde.


© Piet/er Bult