Spiegelbeeld
Weeromme naor Verhaelen
Weeromme naor Stellingwarfs
Home
Spiegelbeeld
Et was in de naacht van oold op ni'j dat een maegien, zonder dat iene
hier weet van hadde, een verlaoten kaemer binnengong, waor ze op een
taofeltien een spiegel daelezette mit an de linker- en an rechterkaante
van de spiegel een kruke mit vuurwaeter. Ze bekeek de opstelling nog es
hiel percies, en kwam tot de slotsomme dat d'r zo niks an mekeerde en
gong doe recht veur de spiegel zitten, waor zi'j strak in keek om zo
een beeld van heur toekomstige breugeman op te roepen.
Doe heur starke ogen wat verwezens begonnen te kriegen, kwam d'r opiens
een soldaot veur heur in de spiegel op, die heur mit getrokken saobel
recht in de ogen steerde. Et maegien schrok heur een hoetien en sprong
van de veralderaosie overaende om heur uut de voeten te maeken. De
soldaot in de spiegel smeet heur zien saobel nao, die de jurk van et
maegien deurdemidden snee en in de zeum hangen bleef. Doe verdween et
beeld in de spiegel en bleef et maegien alliend mit de saobel aachter.
Ze gong deur de kni'jen om et scharpe waopen uut heur jurk te trekken
en stopte et vot op een veilige plak.
Een jaormennig naotied trouwde et maegien - hoe bestaot et zoj' zeggen
- inderdaod mit een ofdaankte soldaot, waor ze een tiedlaank slim
gelokkig en niet zonder risseltaot (ze kregen een zeune) mit
saemenwoonde.
Doe, op een kwaoje dag, vun de soldaot, die wat op 'e zoolder an 't
klunderen was, bi'j toeval de saobel die zien vrouw doedertieden daor
votstopt hadde. Hi'j vleug naor beneden en vreug heur mit een koolde
blik in zien ogen waor zi'j dat waopen weg hadde.
In 't eerst durfde ze et him niet te zeggen, mar doe hi'j spiekerhad
andringen bleef kwam ze bi'j slot van zaeke goelend mit et hiele
verhael veur de draod.
Now wodde de man eerst goed kwaod, en poer lelk raosde hi'j heur toe
dat et verlös van zien saobel him in zien hiele leven zovule ongemakken
bezorgd hadde, dat hi'j zweerd hadde om et meenske bi'j wie hi'j zien
waopen iens antreffen zol, op datzelde stuit en op datzelde plak, van
kaant maeken zol. Vot-en-daolik trok hi'j et saobel, reeg eerst zien
vrouw an et blaanke metaol, en sleug doe de haand an himzels.
© Piet/er Bult (vertaeling)
Een verhael mit zwatte toverderi'je uut Estlaand.