Stelling en zien twiede vrouw
Weeromme naor Verhaelen
Weeromme naor Stellingwarfs
Home
Stelling en zien twiede vrouw
Veurige maond mos Stelling van zien twiede vrouw de oolde kraanten van
een week-mennig naost zien stoel mar es oprumen. Doe hi'j een kneup in
't touwgien leggen wol vul zien oge op een eupenteerde bladziede en zag
hi'j nog krek dat de sSr nog es weer een ienmaolige subsidie van 11.704
euro veur et Tael Onderzuuk Projekt (TOS) van de beide Gemienten Oost-
en Westaende krigt. Gewoonlik legt de Perveensie datzelde be-drag d'r
ok nog es op toe. Hoolt zoks now nooit op, pruttelde Stelling tegen de
katte die an de aandere kaante naost him lag! Is zoe'n taelonderzuuk
now warkelik van groter belang as bi'jglieks wat meer zorg veur oonze
oolden van daegen of veur et belang van de jeugd? Stelling en zien
twiede vrouw vienen van niet. Tael moej' gewoon bruken. Dat d'r
doedestieds een peer centen bruukt binnen veur et Stellingwarfs
Woordeboek is nog daor an toe, mar now moet et ok es oflopen wezen.
Neffens Stelling zien twiede vrouw is et krek as mit de rookvri'je
kefés; as daor zoe'n verlet van wezen zol dan moe'n ze toch zels de
broek opholen kunnen? Veur de Bloemhoffies is 't vanzels wel een mooie
opstikker veur zoe'n goedbetaelde hobby...
Een peer bladzieden veerder gong et in een aander bericht niet over
hobbyen mar over et lobbyen, mar dan van de Friezen. Die willen heur
tael eins in de Nederlaanse Grond-wet vaastelegd zien. Een mooie
gedaachte mar daor moe'n ze toch mit oppassen neffens Stelling. Hi'j
wet niet zo hiel vule van wetten en zo mar hi'j wet wel dat d'r vaeks
in een wet staot "Gij zult niet..." of "In naam der Koning(in) zijt gij
verplicht...". En zoks kon veur de Friezen wel es op 'e kop verkeerd
uutpakken. Friezen bin eins krek as Stelling-warvers en bi'jglieks
Tukkers en Aachterhoekers, wat een vri'jvochten volkien en hoe meer
wetten aj' die opleggen hoe meer ze heur d'r tegen ofzetten. En zo'k
lobbyen kost grif ok weer een protte centen. Mar niet doen dus...
Ni'jsgierig wodden, leup Stelling nog wat oolde kraanten deur en las in
een stokkien et bericht dat d'r in Nederlaand zoe'n miljoen
hobbyschrievers wonen. Neffens datzelde stokkien bin d'r liekwels niet
genoeg leermeensken om al die hobbyschrievers veerder op pad te helpen
as et stokkien in de buurtkraante of een dagboekstokkien. Doe Stelling
dit an zien twiede vrouw veurlas reageerde Stelling zien twiede vrouw
as volgt: Zokke meensken hoeven ok hielemaole niet hulpen te wodden.
Laot ze mar gewoon op-schrieven wat ze zeggen of zeggen wat ze
opschreven hebben. Al dat zonuumde lite-raire wark dat slao'we ommes
toch altied over. Nee, die stokkies in de buurtkraante en de
overliedensberichten van hiere, daor hewwe meer as genoeg an.
Amsterdam, Rotter-dam en Den Haag ligt ja haost in 't butenlaand en
daor bin ze altied zo haostig. Laot dat ni'js en die
overliedensadverteensies mar mooi blieven waor ze heuren.
En hool now mar es op mit dat oolde ni'js, neem je pillegies mar es in,
breng die oolde kraanteboel now mar naor 't hokke en doe die piepe es
uut te stinken! Vrouwluden, bromde Stelling, pakte zien piepe, de oolde
kraanten en leup naor aachteren. De katte kwam him votdaolik nao, in 't
hokke gongen ze d'r nog es bried veur zitten en stak Stelling de piepe
nog mar es op. Vrouwluden, zol dat now nooit es beteren…
© Piet/er Bult