Veurdeure
Weeromme naor Verhaelen
Weeromme naor Stellingwarfs
Home
Veurdeure
De veurdeure bleef d'r een klein aentien van eupenstaon. Dat kon ok
haost niet aanders want de aarm van een dooie man steuk d'r een aentien
tot uut wiels et grootste pat van et dooie lief van de man die niet
meer leefde in de gang lag. Ik schrok mal. Dat kon ok haost niet
aanders want ik ston mit een bossien bloemen in de hanen veur die
veurdeure en d'r lag een dooie man aachter die deure en zien iene aarm
steuk haost wat naor buten. Waoromme bi’j' dan ok niet op bedde dood
gaon te liggen, docht ik zo bi’j mezels, want ja, wat veur benul hebbe
ik now over doodgaon, mar ja, zoks kan je zo mar overkommen heurde ik
naotied iene uutstokken. Et plak waore en et tiedstip waorop aj'
doodgaon bepaol ie gewoonlik niet zels, zee de man. Now ja, et kon wel,
mar dat was niet gebrukelik en dan hiette et ok aanders en dan kwaj'
meerstal ok niet aachter de veurdeure te liggen mit iene aarm haost wat
naor buten.
Toeval bestaot niet, zee de doomnee, et het zien tied west. Tja, die
man het d'r veur deurleerd mar ik zag wel deur een ooghoekien van mien
iene oge dat de dooie man aachter de veurdeure die zien iene haand
haost wat buten die veurdeure steuk gien gelosie omme hadde - te
meenste niet om die haand, misschien wel om die aandere haand, mar dat
kon 'k zo van butenof niet zien, en dan zo'k eerst naor binnen moeten,
mar dat kon eins niet want d'r lag een dooie man stief aachter de deure
mit zien iene aarm haost wat naor buten wao'k dan deur mos - dat ja,
dan kon hi'j ok niet zomar weten as et zien tied al haost was, now?
Now, daor ston ik dan mar mooi mit mien bossien bloemen in de haand
veur de deure waoraachter een dooie man lag die zien iene aarm haost
wat buten de deure steuk...
© Piet/er Bult