Butergebied

Weeromme naor Essays
Weeromme naor Stellingwarfs
Home


Butergebied

Onder anvoering van de tegenwoordige minister van ruumtelike oddering -vrouw Dekker-, heuren en zien we laeste tied rondomme in de media dat d’r weer meer gelegenhied kommen moet veur bebouwing in ’t butergebied. En ze hebben geliek vanzels. Een eerste veurweerde veur oons meenskelik ras, is et bestaon van ruumte en tied. Die tied wodt oons deur hogere haand gund mar die ruumte, die hewwe as gemienschop zels veur een groot pat in de haand.

Et is de laeste jaoren al in verschillende onderzuken antoond dat meensken op et plattelaand heur et meerst gelokkig vulen. Et opsluten van meensken in van die oolderwetse kezerne-achtige blokkedeuzen of in ni’jmoderige Vinex- of witte schimmelwieken het een misse zet west, zo dee al pattie keren blieken. Veur jong en oold is d’r op die plakken hielendal gien ruumte en locht om fesoenlik te leven. Daegelikse frustraosies deur o.e. bureruzies en relaosieperblemen staepelen heur op en daor komt op de duur allienig mar rottighied van. Veurbielden te over staon daegeliks in alle kraanten.

’t Is eins jammer dat oons gemientebestuur now krek een peer jaor drok doende west het mit et - neffens de oolde riegels - bedaenken van een ni’j bestemmingsplan veur et butergebied waor juust hielendal niet die bedoelde leefruumte in veurkomt. Nee, et parool was om de meensken huttien bi’j muttien in Oosterwoolde te stoppen en dan een peer hiele grote megaboereplaetsen d’r omhenne en de rest in staand holen as netuurlik gruun (mit een bottien ‘verbeuden toegaank’ d’r bi’j vanzels). Dat zol dan veur roegweg de ankem dattig jaor gellen moeten. Ik wil et heur graeg nog es ofraoden: beter te halven keerd dan te hielen dwaeld; doe et niet! Stel dat bestemmingsplan asjeblief niet vaaste mar bekiek et nog es. As ze et d’r wel deurdrokken dan zuwwe zien dawwe in et ni’je daenken now votdaoliks al beginnen mit aachteroplopen en dat de kommende dattig jaor ok doen zullen blieven. As ze tot et ni’je inzicht kommen, dan zuwwe zien dawwe de kommende jaoren vaeke as een medelgemiente nuumd wodden zullen krek as doe des tieds mit et verkeersboddenvri’je Makkinge.

En awwe dan tot dit ni’je inzicht kommen binnen - en daor gao‘k mar vanuut - dan he’k wel een aorig veurstel om alvaaste es wat mit te expirementeren. Lao’we es beginnen mit bevobbeld eerst es iene straote in de gemiente an te wiezen waor zo vri’j as mar meugelik is bouwd wodden mag. De oolde weg van Makkinge naor Berkoop geft neffens mi’j wel zoe’n meugelikhied. Et is een laankrekte en now al dunnegies bebouwde weg waor dat hiel goed passen zol. Et stikt daor van de lappies grond die nog wel gauw es te koop kommen en et laeste ni’je huus wat daor kotleden bouwd is (bi’j de krusing Delleburen – Oosterwooldseweg), is een hiel goed veurbield van de meugelikheden waor ik op doel. In ’t aandere geval dan zuwwe zien dat de vri’jkommen huzen deur ‘rieke Hollaanders(*)‘ opkocht wodden, drie keer jaors veertien daegen bewoond wodden en veur de rest staon te verpauperen. Et dorpsleven wodt daor niks wiezer van.

Awwe now es vlot van besluut binnen dan zowwe d’r mit et anleggen van et riool in dat gebied straks alvaaste reken mit holen kunnen.

(*): Hier wodt niks negatiefs over Hollaanders bedoeld; allienig  mar een begrip bruukt.


© Piet/er Bult