Gemientelik taelbeleid

Weeromme naor Essays
Weeromme naor Stellingwarfs
Home


Gemientelik taelbeleid

Veurzitter, leden van disse vergeerdering,

Graeg maek ik van disse gelegenhied gebruuk, om jim an te spreken op jim verantwoordelikhied mit betrekking tot et “Gemientelik taelbeleid”.

Et Stellingwarfs (Nedersaksisch) het al sund 1996 een erkenning onder diel twie van et Europese haandvest veur minderhiedstaelen. Et zol -donkt mi’j- toch een kleine muuite wezen moeten om oonze mooie tael onder diel drie van dat zelde haandvest te kriegen. Waorom dat zo neudig is? zuj’ vraogen.

D’r is bi’j mien beste weten gien enkele volsstamme van omdebi’j 50.000 meensken op disse hiele wereld te vienen die zo drok doende is mit heur tael -toch een eerste cultuurbehoefte-, as de volksstamme waor jim en ikzels toe beheure, de Stellingwarvers. Mit een kompleet eigen en wetenschoppelik verantwoord woordeboek, dat dikker is as de Nederlaanse Van Dale! D’r bin -naost een protte eigen initiatieven- inmiddels al vule meer as 100 Stellingwarver boektitels uutgeven deur de Schrieversronte, en d’r bestaot een bried verscheid an ere uterings van kultuurgevuul onder de meensken. De meensken, de kultuur en de neudige middels (vnl. geld)  waoras jim wat over te zeggen hebben.

Et behoold van oonze kultuur -die veur zoe’n grote klofte meensken slim belangriek is- is een groot goed. Jim kun mitmekeer -en dat geldt ok veur jim kollega’s van ’t Westaende vanzels- veur een groot pat bi’jdregen an dat behoold. Jim meugen jim dan ok slim anspreuken vulen as ik een dringend beroep op jim doe om een dudelik gemientelik taelbeleid te ontwikkelen -en vaaste te leggen vanzels- as belangriek hooldvaaste veur de verschillende warkgroepen in disse gemiente die zich mit oonze kultuur drok doende holen zoas de verschillende schrievers, dichters, bieldhouwers, dorpsarchiefgroepen, manifestaosies as Eupen Stal en misschien wel de belangriekste andriever in dit gehiel, de Stellingwarver Schrieversronte.

Kotleden nog, bin d’r o.e. in de L.C. al een peer keer, somstieden wat cynische mar wis-en-waorachtig goedbedoelde stokkies verschenen waor jim in dit verbaand ok al es hiel fienegies op jim verantwoordelikheden wezen binnen. Elk naor zienes kan al op zien meenst een bi’jdri’jge leveren deur es wat vaeker et Stellingwarfs in disse vergeerderings te bruken, in naovolging van de fraktieveurzitter van de PvdA. Om jim op veurhaand de smoes te ontnemen “ik bin et Stellingwarfs niet machtig”, he’k veur elke fraktie van de perti’jen een kedoogien mitneumen. Een deur mi’jzels saemensteld en uutgeven haanzem boekien, mit meer as 17.000 Stellingwarver woorden die in disse omkrieten daegeliks bruukt wodden.

In een wat groter verbaand dan et zels bruken van oonze tael, wi’k an ’t aende van mien betoog nog es een vrundelik mar toch ok een dringend beroep op jim doen, om dat slim belangrieke gemientelike taelbeleid now aendeliks es een keer op pepier te zetten. Et staot veur mi’j vaaste daj’m d’r een protte meensken van disse volksstamme “de Stellingwarvers” een boel plezier mit doen zullen. Bi’j de eerste-de-beste keer dawwe weer raodsleden -en veur ‘t eerst ok een borgemeister- kiezen meugen, zal ik in elk geval reken holen mit jim persoonlike staandpunten over, -en meer nog- mit jim uutvoering van et taelbeleid.

Ik daanke jim hattelik veur jim aandachtig luusteren en hope daj’m nog vaeke gebruuk maeken zullen van mien Stellingwarver Woordeliesten.


© Piet/er Bult