Overleven zonder subsidie
Weeromme naor Essays
Weeromme naor Stellingwarfs
Home
Overleven zonder subsidie
Stoomkursus 'Hoe te overleven zonder subsidie'…
Aj' d'r as willekeurige instelling zoe'n vuvendattig jaor waarmpies
bi'jzitten, en an alle kaanten mooi in de watten onder de infra-rooie
subsidielaampen liggen, en aj' as bestuurder van zoe’n in-stelling een
goed traktement hebben, en as d'r dan een protte vri'jwilligers veur je
in 't spier binnen dan..., juust dan wodt et tied om over de toekomst,
over mindere tieden nao te daenken: Wat as...
1) Wat as…: d'r een protte vri'jwilligers staorigan niet meer mitdoen..?
Vri'jwillegers moej' altied anvieteren blieven. Dat kan mit een giepse
of mit een paantien koffie mit zo now en dan wat lekkers d'r bi'j. Mar
wat, as die vri'jwilliger gewoon deur de leeftied niet meer kan of -
slimmer nog - et deurkrigt dat de iene et wark dot veur dikke munten,
mit zicht op een goed pensioen, en de vri'jwilliger in etzelde wark
altied mar veur niks klaorstaon moet? Ja, dan...
2) Wat as…: d'r gien centen meer in de pot zitten om dat mooie traktement iedere maond uut te betaelen..?
Rekenties en lonen wodden altied vol automatisch betaeld of
deurscheuven naor hogerop. Dat kan vandaege-de-dag mit een peer
moesklikken regeld wodden. Mar wat as d'r opiens tiedinge komt dat d'r
deur een tekot op de lopende rekinge gien ofschrieving west het en daj'
vrundelik mar dringend vraogd wodden om dat asnog even recht te zetten?
Dan kuj' et nog wel ien- of twiekeer rekken deur mit de haand wat over
te maeken, mar as dat dan ok niet meer lokt? Ja, dan...
3) Wat as…: de kachel een peer graoden leger moet..?
As de rekenties dan niet meer as vanzelssprekend voldaon wodden en mit
de haand wil et ok niet meer dan zal de schosstien wat minder roken
moet en zal d'r wat minder vaeke gebak bi'j de koffie wezen. Niet
alliend de kachel mar ok mit waeter, locht en tillefoon zuj' wat
zunigeran moeten. Dat gaot vanzels wel een posien goed, mar dat hool ie
vaeks niet zo lange vol, en dan? Ja, dan...
4) Wat as…: en gao zo mar deur…
Zo kuwwe vanzels nog vule meer veurbeelden numen waordeur de dingen
niet meer zo vanzels-sprekend binnen as dat et altied west het. Hier en
daor vaalt eerst nog wel wat bi'jenneer te schraopen mar dat hoolt ok
een keer gewoon op. Wat dan? Ja, dan...
Meugelike oplossings…
Begin al op 'e tied an oplossings te daenken. As de blokken ienkeer
weghaeld binnen is et schip vaeks niet meer te keren. Now ja, deur de
wal an ginne kaante van de briede sloot, eerst. Breng de sitewaosie van
hoe et d'r now om en toe gaot in kaorte. Zet de inkomsten an de iene
kaante op een briefien, en de uutgaoven (niet deur de warre te haelen
mit: uutgiftes) an de aandere kaante op dat-zelde briefien. Een streep
d'r onder en de boel optellen. As et ciefer an de goeie kaante groter
as an de aandere kaante, dan kuj’ gewoon veerder slaopen, mar aanders...
Lewaai, tam-tam
Laot de jeugd Loesje-achtige poster bedaenken, maek veurbeelden van
rouw-, trouw-, prente- en deupkaorten, kemissies instellen veur
ditte en veur datte. Kuj' die naotied altied de schuld geven. Bedaenk
et opzetten van een vrundenkring. Legge in ieder geval vanalles op et
rim klaor om et zo pakken te kunnen as 't wezen moet, en bedaenke
altied: als g’ in nood gezeten…
© Piet/er Bult