Benjamin op zoolder
Weeromme naor Gedichten
Weeromme naor Stellingwarfs
Home
Benjamin op zoolder
Op 'e zoolder van oons oolde huus
lagen we mit oons tienen
kienderties van groot tot klein
Vader en moeke lagen beneden
de bedstee boven de kelder
dat was naachs heur speulterrein
De oolde juffers tegen et dakbeschot
vermolmd en kraekerig
mar mit echte spiekers vaaste zet
De pakken dikke dekens op mien bedde
ik roek et muffe nog
en toch he'k daor best slaopen
Et geluud van de koenen op 'e stal
dat koj' op bedde heuren
eins lag ie daor gewoon wat tussen
Kriskras laggen wi'j deurmekeer
de jonges en de maegies
meerst eigen, soms ok wel een vremde
De kaemerties weren maekt van klieden
mit punaisies vaastezet
niks radio of tillevisie op je kaemer
In elke ruumte daor ston wel een pot
veur et naachtelik verlet
'n kraante, knipt in rechte stokkies
Je winteraosem, morgens bevreuren tot ies
speulgoed bi'j et wakker wodden
waachtend op moeke onder an de trappe
Elk ketier wodde d'r wel iene reupen
en ik was vaeks de laeste
dat hi'j' zo, aj' de kleinste binnen
© Piet/er Bult