Dat zol mooi wezen
Weeromme naor Gedichten
Weeromme naor Stellingwarfs
Home
Dat zol mooi wezen
Koj' mit een gedichien mar
de honger stoppen laoten
aarmoede de waacht anzeggen
veur iens en veur altied
Koj' deur een gedichien mar
de waopens ommesmulten
de zunne schienen laoten
grif da'k dichter wodde
Dat zol mooi wezen
wat zol zoks mooi wezen
dat wodde een pracht gedicht
mit een prachtig begin
en een hiel mooi aende
mar zo mooi maek ik ze niet
Koj' mit een gedichien mar
et lieden de wereld uuthelpen
een aende maeken an oorlog
an hekel en an geweld
Daj' mit een gedichien weer
woestijnen beplaanten konnen
grote zenen hemmelen
de ozonlaoge beter maeken
Dat zol mooi wezen
wat zol zoks mooi wezen
dat wodde een pracht gedicht
mit een prachtig begin
en een hiel mooi aende
mar zo mooi maek ik ze niet
Koj' mit een gedichien mar
wonders doen liekas God
de lammen in de bienen
de blienden kieken laoten
Koj' mit een gedichien mar
veur altied vrede maeken
en alle karken slopen
ik maekte zomar tiene
Dat zol mooi wezen
wat zol zoks mooi wezen
et wodde een pracht gedicht
mit een prachtig begin
en een hiel mooi aende
mar zo mooi maek ik ze niet
© Piet/er Bult
(vri’j naor 'Dat zou mooi zijn' van De Dijk)