Dodemis

Weeromme naor Gedichten
Weeromme naor Stellingwarfs
Home


Dodemis (Requiem aeternam)

Introïtus
Een leven lang te leven
et beste dat he'k geven
ik kon et niet iens helpen
et leven wodde mi'j mar geven

Kyrie
Da'k nao al mien hadde warken
mien schrippen hier van alledag
Heer now veur altied ja
veur altied bi'j jow wonen mag

Sequentia
Mien leven was as iene dag
iene tel in jow bestaon
Jow maekten alle dingen
zonder jow kon ik niet gaon

Offertorium
Van jow bin alle dingen
je naeme kend te hebben
et was mi'j tot een zegen
neem mien lichem now

Sanctus
In jow heilighied daor wil ik wezen
jow glaans jow majesteit en luuster
et heiligste van alle heiligens
jow heilig huus maek dat mien thuus

Benedictus
Bliede da'k je naeme kende
bliede in jow naeme deupd
dat jow zegen op mi'j rustte
ik wezen moch die 'k was

Agnus Dei
Jow hebben je leven veur mi'j geven
ik laot mientes now veur jow
ik daank dat ik hier even wezen moch
en vraog je now ja hael me now

Communio
Laot oons kommen in jow ieuwig rust
laot jow locht oonze ziel mar raeken
laot oons nog ienkeer zingen van jow liefde
laot dan oonze lippen zwiegen as et graf


© Piet/er Bult