Exodus

Weeromme naor Gedichten
Weeromme naor Stellingwarfs
Home


Exodus

Een illegaol geboren kientien
Grootbrocht an een koningshof
Wodde leider van een groot volk
Een volk in vremdte, niet te plak.

In dit laand konnen ze niet blieven
Dus wollen ze naor ’t beloofde gaon
Een laand van melk en van hunning
Mar zo ienvooldig gong dat niet.

Kikkerts en sprinkhaenen weren neudig
Gien peer of een betien mar mennig in getal
Stof en haegel veul bi’j bakken en tot teken
Mar votgaon mochten zi’j nog altiedd niet.

Een protte stried was d’r veur neudig
Zonder braand een vuur in ’t brummelbos
Een staf  veraanderde in ’n slange en draek
Maekte bi’j nood een pad in ’t natte waeter.

Uut de locht kwam as vanzels ‘t manna valen
Veur alle meensken en dieren meer dan zat
Mar nao drie daegen van dreugte in et zaand
Et reizend volk kon ‘t niet meer geleuven

Eerst nog daansend om et kalf van goold
Laeter de tien geboden anrikt op wat stienen
Dat wodde leidraod in heur leven
En alles zol van goold en zulver wezen.

Van laekens, linnen en purperen gedienen
Wodde een soort van karke bouwd
Daor wodde offerd, en je de voeten wosken.
In 't Stellingwarfs: een tempeltente.

(wodt vervolgd)


© Piet/er Bult