Fiewerd
Weeromme naor Gedichten
Weeromme naor Stellingwarfs
Home
Een ‘Fiewerd’
Hoe zo een fiewerd, now luuster
Zeune van een rietmeubelmaeker
en zien vrouw vanzels
dan kan et haost niet mis
Noordwoolde, Weemstraote
woond in de 'Triangel'
klinkt as meziek
Eierzuken op ‘e Miente
eende-eier rond de petgatten
bi'j de brogge van de batten
zwemmen leren bi'j ome Karst
gewoon bloot in een plasse waeter
Togido mit punten tussen de letters
weej' waor dat veur staot
't is gimmestiek en turnen
van een hoog nivo krek as bi'j
Leonidas, mar dat kan toch haost niet
dat is al te lange leden
keuning van Sparta rond et jaor 500
mar dan veur Christus
Fredriksoord, de Tuunbouwschoele
kesteel 'De Haar', Haarzuilens
Aalsmeer en doe Kockengen
veurgoed naor 't Westen
veur Nortipee verleuren
De Aanpakken naostuurd kriegen
dus kraanteknipsels ommeraek
en ansichtkaorten gadderen
van hiele mooie streken
streken van een fiewerd
vaalt seins zomar veur dood daele
as Lotusman veur EHBO en braandwacht
mar komt de hieltied ok weer overaende
en meerstal binnen drie daegen
hewwe krek nog vierd mit Paosken
Ja, biebelvaaste en interesse holen in
de Stellingwarven, de Historische Kring
ja, ok de Stellingwarver Biebel in de maek
want ok al woont hi'j dan in 't Westen
hi'j hoolt Stellingwarf hiel goed in de smiezen
© Piet/er Bult
Veur: RWC, Huus & Hiem
(Wijnand Smit Kzn)