Veur Gregorius

Weeromme naor Gedichten
Weeromme naor Stellingwarfs
Home


Veur Gregorius…

Jow gongen es op vekaansie tegere mit iene doe ok nog niet zo wies
In een bestelauto van Exota hielemaole naor Paris
Jim sleupen in die auto op een bedde mit locht
En jim kregen in de Moulin Rouge gienertied jim nocht

Naachs slaopen in et Bois de Bologne en dat was me toch wat
Mar midden in de naacht ston daor opiens iene van de hermandad
Hi’j hul wat in de heugte en jow maot docht: hij wil munten ruilen
Mar hi’j leut zien pelisepenning zien en doe was et huilen

Ne pas dormir ici, zee de beste man en jim konnen gaon
Jim mochen niet langer in dat bos blieven staon
Eerst even tanken krek buten Paris en mit tussen jim in een 2-literse wienflesse
Gong de reize midden in de naacht in ’t duuster, dochten jim richting De Blesse.

Overmaand deur de slaop en de draank reden jim liekwels verkeerd
En hebben jim et vehikel doe an de kaante van de weg parkeerd
De aanderemorgens wodden jim wakker van geraos en getier
Jim keken et raem uut en zaggen allemaole volk van plezier

Op et straand parkeren, mar gien rekinge holen mit eb en mit vloed
Et waeter ston an de treeplaanke toe en dat kwam vanzels niet goed
Jim stonnen in Dieppe an een straand mit stienties
En doej'm uutstapten haj'm kletsnatte natte bienties

Alles waj’ in de jonkhied doen, dat is niet allemaole wies
Moej’ mar es vraogen an jow kammeraod Frank de Vries.


© Piet/er Bult

RWC, Huus en Hiem, 9 december 2007
Gaaste: Gregorius Halman
Et credo bi'j de bouweri'je an zien kesteel in Blesdieke, as meensken bi'jglieks zeggen: moej' dat nog allemaole doen?
Dan zegt hi'j: ie moe'n niet kieken waj' nog doen moeten mar ie moe'n kieken waj' allemaole al daon hebben.