Klein steerntien
Weeromme naor Gedichten
Weeromme naor Stellingwarfs
Home
Klein steerntien
Roem twintig jaor was hi'j al een mannegien-van-alles bi'j de klub, zien klub!
De hielied zorgd dat de kliedkaemers schone en netties weren. Ni'je
leden maeken, mit lotties langs de deuren te sutelen; niks was him
tevule west. 't Hadde him (en zien vrouw) al-mit-al in die dikke
twintig jaor een protte energie en nog vule meer tied kost. Hi'j har et
altied graeg daon veur zien klub.
Een peer jaor leden was hi'j -nog mar krek in de zestig- mit vervroegd
pensioen gaon. Hi'j har now nog meer vri'je tied kregen en docht d'r
over om wat aktiever te wodden veur zien klub. Zonder d'r al te vule
woorden an smerig te maeken was hi'j uut 'm zels begonnen mit een
treningsrontien veur de jeugd. De jeugd was d'r in zien ogen altied al
een betien bi'jinscheuten. Middags om halfviere ston hi'j de jonges op
te waachten bi'j schoele om lid te wodden en mit te doen.
Elke woensdagmiddag was hi'j mit zien jongen op 't veld in de weer.
"Hebben jow eins wel een trenersdiploma?" vreug d'r op een dag iene van 't heufdbestuur.
"Nee, moet dat dan? Zo geleerd biwwe hier trouwes niet doende. 't Gaot allienig mar om wat haddelopen en zo", zee oonze man.
"Kan wel wezen, mar dat kan vandaege-de-dag niet zonder diploma" was 't kommentaor.
(...)
't Is alweer een schoffien leden dat oonze man uut vervelings an een
volkstuunegien begonnen is. Ok wel aorig mar 't geft him niet de
voldoening die hi'j eerder wel had as hi'j mit zien jongen in et veld
ommeleup. Mar och, wat kon't eins ok schelen. De klub har tegenwoordig
toch gien jeugdleden meer.
Klein steerntien
Grote steerns zeggen vaeke
't meerst stille tegen heurzels
dat ze zonder al die kleine steernties kunnen.
Grote steerns begriepen niet
dat d'r gien groten bestaon kunnen
as d'r ok gien kleine steernties weren zollen.
© Piet/er Bult