Oene Adieu!
Weeromme naor Gedichten
Weeromme naor Stellingwarfs
Home
----------------------------------------------------
Een 'Collect Call' ? Interhemeliair
Wat kost dat wel niet ? Kan 't ok veur wat minder ?
Mit Petrus ? An de hemeldeur ?
Oh, God. Eh sorry... 't Is mit Piet, zien breur.
Awwe even mitluust'ren willen ?
Tussen jow, en die d'r over gaot ...
----------------------------------------------------
Oene Adieu!
Wie is dat toch
Die man daor, die daor staot
Wie is dat toch
Die man daor mit die baord
Za'k em hier binnenlaoten
Of moet hi'j naor de hel
Woj' eerst nog mit him praoten
En zien wi'j laeter wel
Eerst mar es zien doopceel lichten
Wiespraot, oenismen, een roman
Wel dartien boekies mit gedichten
Wat een pro, produktieve man
Wiesheden as Stelling schreef hi'j op
Zien kollum wekeliks in De Koerier
Over karke, tael of de gemienschop
Kot, warachtig, soms gewoon gemier
Aj' een aentien mit him leupen
Hi'j, deur piene meerst een betien briek
Dee hi'j jow de ogen vaeks aanders eupen
Niet altied, mar vaeke hadde hi'j geliek
Zien verhaelen, bi’j 't stok of bi’j de meter
De inhoold, 't meerste niet verkeerd
De verpakking, die kon vaeks wel beter
Mar nooit het hi'j dat beteren leerd
Veur kloften van oons meenskenvolk
Daorbi'j ok hiele, hiele lepen
Was hi'j bi'jtieden een betien tolk
In zien begrip zo vaeke onbegrepen
Veur 't Fries, 't Stellingwarfs nog meer
Op zien eigen, simpele menier
Was Oene hiel zien leven in de weer
Verni’jend, aorig, seins een vreselike klier
Meenselik gedrag as kuddedier
Daor hadde Oene 't niet zo op
Te striede mos'ie, en mit plezier
Leup hi'jzels wat-graeg veurop
Je niet te vlogge konfermeren
Zels niet in 't daegeliks gevrot
Ofstand holen van hoge heren
Zo as een echte anarchist dat dot
Hiel eupen, mar vaeke ok niet
Zee hi'j de dingen, wat dat ok weren
In ’n schieve-schriffien of in een lied
En altied koj' d'r wat van leren
Ontginnen, zo as in 't lange leden
De Veneburen, 't Surhuster- en 't Heerenveen
‘t Aanders doen, niet zo as aand'ren 't deden
Dat was zien wark, zien gelok, zien ween
Mit 'n knapzak deur zien Stellingwarven
Euforisch veur zien radio Centraol
De hieltied weer mos Oene zwarven
En waor hi'j was, daor was kebaol
Zien paorse toga, zien mussien, al zien kleren
D’iene keer wat té, d’ere keer wat minder
Och, ie mossen him even kennen leren
Dan vun ie 'm goed, of d'r was gien minder
(...)
Nao da'k dit zo alles heure
Zette zien fiets mar naost et huus
Zet zien klompen naost de deure
Laot'em d’r mar in, hael'em now mar thuus.
© Piet/er Bult
16 december 2002, bi'j et wegraeken van breur Oene