Twie hanen

Weeromme naor Gedichten
Weeromme naor Stellingwarfs
Home


Twie hanen

Vraogende hanen van Da Vinci
hanen die zeggen willen
kom bi'j mi'j en
hool mi'j vaaste
die zeggen willen
gao mit mi'j en
helpe mi'j een betien.

Twie hanen van twie meensken
die de gelegenhied angriepen
die tegen mekeer zeggen
ik komme bi'j jow
ik hool je vaaste
die zeggen willen
ik gao mit jow en
ik helpe jow een betien.

Twie kienderhanen
een moeke en een kiend
twie oolde meensken
een jong stellegien
twie tieners smoorverliefd
vraogende hanen
vraogende hanen.

Och weren d'r meer meensken
die de vraoge van die hanen
begrepen en deurkregen dat
saemen beter is as alliend
bi'j mekeer kommen
mekeer vaasteholen
mit mekeer gaon
mekeer een betien helpen
… van mekeer holen.


© Piet/er Bult