Ilias

Weeromme naor Klassiekers
Weeromme naor Stellingwarfs
Home


Homerus

Homerus was een Grieks dichter en zinger die leefde van ongeveer 800 v.Chr. - 750 v.Chr. Hi'j schreef veural epische gedichten, waor hi'j een groot tal overleverings, godeverhalen en mythische vertellings uut zien kultuur in verwarkte. Twie van die epische gedichten, de Ilias en de Odyssee, de ooldst bekende en beweerd bleven literaire warken van de Griekse letterkunde, wodden an him toeschreven. Daor bestaot liekwels al lange tied grote onzekerhied over. Et wodt alderdeegst ok wel betwist as beide warken wel deur iéne en dezelde auteur schreven binnen...


Ilias

Pest en wrok

Een vas van de wrok wil zingen, godinne, van Peliden Achilles,
Die verdoembere wrok, die d' Achaeën brocht in een aendeloos
Ach en wee, die hennezund naor Hades de starke zielen
Veul helden en maekte heur lieflike zels tot een prooi van
Honnen en aosvoegels al, vervullend wat Zeus beraoden hadde -
Al van dat eerste begin, doe gekilster kwam en d' iendracht verbreuken
Atreus zien zeune, van de heerscharen vost, en de straolende Achilles.

Wie dan van de goden dreef heur deur twist tot de foele twiespalt?

Zeus en Leto heur zeune! Die hadde, op de keuning verbolgen,
Ziekte verwekt in et schipskaamp, een pest! en et kriegsvolk krepeerde -
Daor zien priester Chryses mit krenking en belediging bejegend hadde
Atreus zien zeune. Want kiek: bi'j de schippen van de Grieken verscheen hi'j,
Loskopen wol hi'j zien dochter, onmeetlike tol nam hi'j mit,
Heffend de kraanze van Apollo, de schotvaaste schutter, mit beide
Hanen omhogens, an zien gulden staf, en hi'j smeekte d' Achaeën
Alle en veural de beide zeunen van Atreus, de leiders van et leger:

"Zeunen van Atreus en jim allemaole die stevig gescheenweerde Grieken,
Jim meugen de geunst van de goden in et weids verblief van Olympus
Schinken verdelging van Priamus zien stad en beholen thuuskomst,
Mar gunne mi'j, daj' mien kiend vri'jgeven en anvere disse lospries,
Om et ontzag veur de zeune van Zeus, de Schutter Apollo."

(...)


© Piet/er Bult (vertaeling)

Een eerste anzet om de Ilias van Homerus te vertaelen