Juli

Weeromme naor Rilke
Weeromme naor Klassiekers
Weeromme naor Stellingwarfs
Home


Juli

Et huus dao’we dommiet uut gaon
wodt zo stille as
de straoten waor et leven
alle daegen stiller wodt.

Disse maond is een gat
in et jaor, vertellen
de dieren plat en uut
mekeer spatterd langs
de kaante van de straote.

Veurbi’j de horizon now, velden
de hieltied blonder, oranje vliegies
in een beginnende aovend;
veer van huus, mar in mien slaop
sloep ik weeromme naor de stad.

Naor een roezend grösveld
in de middag, langs donkere
veensters laete in de naacht,
over waarme tegels vol
weegbree verschruuid
in een vuur van azoer.

Zo is et d’r dus as
ik vot bin en zo
zal et ok blieven
a’k niet weeromme komme.

De zunne braant een gat
in de tied, dat zeggen
de dieren. Wie d’r in kikt
kikt in zien ziel
en schrikt van wat
de zoemer oons geft.


© Piet/er Bult (vertaeling)