Jehannes Passie
Weeromme naor Lieten
Weeromme naor Stellingwarfs
Home
Jehannes Passie
Diel 1
Koor:
Heer oonze keuning, wie zien roem
in alle lanen bekend is!
Laot oons deur jow lieden
zien dat jow, zeune van God
altied en altied,
ok in de uterste groothied,
uutkeuzen binnen.
Jezus zien gevangenneming (Jehannes 18, 1-11)
Nr. 2a Recitatief
Evangelist:
Jezus gong mit zien discipels naor de overkaante van de laek Kedron,
waor een tuun was, die hi'j mit zien discipels binnengong. En ok Judas,
zien verrraoder, wus dat plak, omdat Jezus daor vaeke bi'jmekeerkommen
was mit zien discipels. Judas doe kwam daor, die een ofdieling
soldaoten tot zien beschikking kregen had en dieners van de
overpriesters en de Farizeeën, veurzien van lanteerns, fakkels en
waopens. Jezus doe, alles wetende, wat over him kommen zol, kwam naor
veuren en zee tegen heur:
Jezus: Wie zuken jim?
Evangelist: Zi'j zeden doe tegen him:
Nr. 2b Koor:
Jezus van Nazareth!
Nr. 2c Recitatief
Evangelist: Jezus zee doe tegen heur:
Jezus: Dat bin ik.
Evangelist: En ok Judas, zien
verraoder, ston bi'j heur. Doe hi'j tegen heur zee: Ik bin Jezus,
vullen zi'j omme van de schrik. Opni'j vrueg hi'j dezelde vraoge:
Jezus: Wie zuken jim?
Evangelist: En zi'j zeden doe:
Nr. 2d Koor:
Jezus van Nazareth!
Nr. 2e Recitatief
Evangelist: Jezus zee doe:
Jezus: Ik zee jim al, dat ik et bin. Aj'm mi'j dan hebben moeten, laot die aanderen dan gaon;
Nr. 3 Koraal:
O grote liefde, o liefde zonder maote
die jow op disse liedensweg brocht het!
Ik leefde in een wereld vol lust en bliedschop,
wiels jow zo lieden mossen!
Nr. 4 Recitatief
Evangelist: Zodat et woord
uutkommen zol, zo hi'j dat zegd hadde: Wie jow mi'j geven hebben, uut
heur he'k gieniene verleuren gaon laoten. Simon Petrus, die een zwaord
had, nam et, en hi'j raekte de slaaf van de hogepriester en houwde him
et rechteroor of; de naeme van die slaaf was Malchus. Jezus zee doe
tegen Petrus:
Jezus: Stik et zwaord weer bi'j je; de beker, die mien vader mi'j geven het, zo'k die niet leegdrinken?
Nr. 4 Koraal:
Jow wil zal wezen, Here God, geliek
op de eerde as in et hemelse riek.
Geef oons wat tied now in dit lieden,
geheurzemhied in lief en in leed;
Verzet je en vecht tegen vleis en bloed,
dat tegen jow wille doet.
Jezus veur de hogepriesters (Jehannes 18, 12-;27; Mattheus 26, 75)
Nr. 6 Recitatief
Evangelist: De ofdieling
soldaoten en de overste en de dieners van de Joden namen Jezus
gevangen, sleugen him in de kettens, en brochten him eerst veur Annas,
want hi'j was de schoonvader van Kajafas, die dat jaor hogepriester
was; en Kajafas was et, die de Joden de raod geven had: Et is beter,
dat d'r iéne meenske ommebrocht wodt ten behoeve van et hiele volk.
Nr. 7 Aria (alt)
Om mi'j uut de klute van al mien zunden
los te maeken,
wodt mien Heiland vaastebunnen.
Om mi'j van alle lasterzwölderi'je
hielendal te beteren,
laot hi'j him verwonden.
Nr. 8 Recitatief
Evangelist: En Simon Petrus en een aandere discipel volgden Jezus.
Nr. 9 Aria (sopraan).
Ik volge jow mit vreugdevolle stappen
en verlaot jow niet,
mien leven, mien locht.
Begeunstig mien pad
en hool niet op
zels an mi'j te trekken,
mi'j op te drokken, mi'j an te vieteren.
Nr. 10 Recitatief
Evangelist: En die volgeling
was een bekende van de hogepriester en hi'j gong mit Jezus et peleis
van de hogepriester in, mar Petrus ston buten an de poort. De
volgeling, die bekende van de hogepriester, kwam naor buten, praotte
mit et maegien die portier was en brocht Petrus binnen. De slavin, dat
maegien, zee tegen Petrus:
Maegd: Heuren jow ok niet tot de leerlingen van die man?
Evangelist: Hi'j zee doe:
Petrus: Ikke niet!
Evangelist: De slaven en de
dieners stonnen heur te waarmen bi'j een kolevuur, dat zi'j anlegd
hadden want et was koold, en Petrus ston him ok bi'j heur te waarmen.
De hogepriester vreug Jezus naor zien leerlingen en naor zien leer.
Jezus zee doe tegen him:
Jezus: Ik heb vri'juut tot de
wereld preekt; Ik heb altied in de synagoge leerd en ok in de tempel,
waor alle Joden bi'jmekeerkommen, en in et duuster he'k nooit wat zegd.
Waorom vraogen jow mi'j? Vraog heur, die heurd hebben, wat ik tegen
heur zegd heb; kiek, disse meensken weten, wat ik zegd heb.
Evangelist: En doe hi'j dit zee, gaf iene van de dieners, die d'r bi'j ston, Jezus een klap in zien gezicht en zee:
Jezus: A'k wat verkeerds zegd hebbe, geef dan an wat d'r verkeerd was, mar as 't goed was waorom slaoj' mi'j dan?
Nr. 11 Koraal
Wie het jow zo sleugen,
mien Heiland, en jow mit plaogen
zovule kwaod daon?
Jow bin toch ommes niet zundig,
zoas wi'j en oonze kiender;
van slechte daoden weten jow niks.
Ik, ik en mien zunden
die zich as de korrels van et zaand
an zee vienen laoten,
díe hebben jow toch
de ellende brocht, die jow treft,
en de droeve schare mattelaors.
Nr. 12a Recitatief
Evangelist: Annas zund him doe ketend naor Kajafas, de hogepriester. En
Simon Petrus ston him te waarmen. Zi'j zeden doe tegen him:
Nr. 12b Koor
Heuren jow ok niet tot de leerlingen van die man?
Nr. 12c Recitatief
Evangelist: Hi'j ontkende et en zee:
Petrus: Ikke niet!
Evangelist: Iene van de slaven van de hogepriester, femilie van him, van wie Petrus et oor ofsleugen had, zee:
Diener: Zag ik jow niet mit him in de tuun?
Evangelist: Petrus ontkende et veur de dadde keer en op dat mement
kri'jde een haene. Doe heugde Petrus him de woorden van Jezus, gong
naor buten en begon hiel slim te goelen.
Nr. 13 Aria (tenor)
Och, mien geest,
waor wi'j' eins henne,
waor za'k mi'j verfrissen?
Blief ik hier,
of weenske ik mi'j
bargen en heuvels op mien rogge?
In de wereld is hielendal gien raod
en in mien hat
staon et zeerte
van mien ondocht,
omdat de knecht zien heer niet kend het.
Nr. 14 Koraal
Petrus, die et him niet heugt,
en zien God ontkent,
mar die bi'j een eernstige blik
slim goelen moet.
Jezus, kiek mi'j ok zo an,
as ik niet boeten wil;
a'k kwaod daon heb,
raek dan mien geweten an!
Diel 2
Nr. 15 Koraal
Christus, die oons zalig maekt,
die gieniene kwaod daon het,
die wodde veur oons in de naacht
as een dief gevangen neumen.
Leided veur een goddeloos volk
en gemeen beschuldigd,
bespot, beschimpt en bespi'jd,
krek as et woord et oons zegt.
Jezus en Pilatus (Jehannes 18,28-40; 19,1-22)
Nr. 16a Recitatief
Evangelist: Zi'j brochten Jezus doe van Kajafas naor et gerechtsgebouw.
Et was nog vroeg in de morgen; mar zels gongen zi'j et gerechtsgebouw
niet in, om heur niet smerig te maeken, mar om et Pascha eten te
kunnen. Pilatus kwam doe naor buten en zee:
Pilatus: Wat anklacht brengen jim tegen disse man in?
Evangelist: Zi'j zeden doe tegen him:
Nr. 16b Koor
As hi'j gien kwaod in 't zin had, dan zollen wi'j him jow niet te haand stellen!
Nr. 16c Recitatief
Evangelist: Pilatus zee doe tegen heur:
Pilatus: Nemen jim him mar mit en oordele him naor jim wetten.
Evangelist: De Joden zeden doe tegen him:
Nr 16d Koor
Wi'j hebben et recht niet om iene om te brengen.
Nr 16e Recitatief
Evangelist: Opdat et woord van Jezus uutvoerd wodde, zoas hi'j zegd
had, dudende, wat veur dood hi'j starven zol. Pilatus gong doe weeromme
et gerechtsgebouw in, reup Jezus en zee tegen him:
Pilatus: Bin jow de keuning van de Joden;
Evangelist: Jezus zee doe:
Jezus: Zeggen jow dit uut jezels of hebben jow mit aanderen over mi'j praot?
Evangelist: Pilatus zee doe:
Pilatus: Bin ik soms een Jood? Jow volk en de overpriesters hebben jow an mi'j te haand steld; wat hebben jow daon?
Evangelist: Jezus zee doe:
Jezus: Mien keuninkriek is niet van disse wereld; as mien keuninkriek
van disse wereld west was zollen mien dieners stried leverd hebben
zoda'k niet an de Joden uutleverd wodden zol; mien keuninkriek is
liekewel niet van disse eerde.
Nr. 17 Koraal
O grote Keuning, groot veur altied,
hoe kan ik disse trouw genoeg uutstri'jen?
Gien meenskehat kan toch bedenken,
wat jow te geven.
Ik kan d'r mit mien verstaand niet bi'j
waormit jow medelieden te vergelieken is.
Hoe kan ik jow grote daoden van liefde
mit mien warken weeromme betaelen?
Nr. 18a Recitatief
Evangelist: Pilatus zee doe tegen him:
Pilatus: Bin jow dan toch een keuning?
Evangelist: Jezus zee doe:
Jezus: Jow zeggen dat ik een keuning bin. Daorveur bin ik geboren en
daorveur bin ik op de wereld kommen, zoda'k veur de waorhied getugen
zol; en elk, die uut die waorheid is, luustert naor mien stemme.
Evangelist: Pilatus zee doe tegen him:
Pilatus: Wat is waorhied?
Evangelist: En doe hi'j dat zegd had, kwam hi'j weer naor buten en zee tegen de Joden:
Pilatus: Ik vien gien schuld in him. Mar bi'j jim bestaot et gebruuk,
da'k op Pascha iene vri'jlaot: willen jim dan da'k de keuning van de
Joden loslaot?
Evangelist: Zi'j raosden doe opni'j en zeden:
Nr. 18b Koor
Him niet, mar Barabbas!
Nr. 18c Recitatief
Evangelist: Barabbas was een moordener. Doe nam Pilatus Jezus en leut him slaon en schoppen.
Nr. 19 Arioso (bas)
Beschouw, mien ziel, mit aangstig plezier,
mit bittere vreugde en half beklemd hatte,
je hoogste goed in Jezus zien smatten,
hoe veur jow op de stiekels, die him stikken
de hemelsgele primula's bluuien!
Ie kun een protte zuuite vruchten van zien bitterhied plokken,
hool him daorom zonder onderbreking in et oge.
Nr. 20 Aria (tenor)
Bedaenk, hoe zien deur bloed kleurde rogge
in alle opzichten
op de hemel liekt,
waoran, naodat de waetergolven
van oonze zundvloed zich weerommetrokken hebben,
de allermooiste regenboge
as God zien genadeteken staot!
Nr. 21a Recitatief
Evangelist: En de soldaoten vlochten een kroon van stiekels, zetten die
op zien heufd en deden him een purperen klied omme, en zi'j leupen op
him toe en zeden:
Nr. 21b Koor
Gegroet, Keuning van de Joden!
Nr. 21c Recitatief
Evangelist: En zi'j gavven him klappen in 't gezicht. Pilatus kwam opni'j naor buten en zee doe tegen heur:
Pilatus: Kiek, ik breng him veur jim naor buten, zodaj'm weten, da'k gien schuld in him vien.
Evangelist: Jezus kwam doe naor buten mit de stiekelkroon op zien heufd en et purperen klied an. En hi'j zee tegen heur:
Pilatus: Kiek, de meenske!
Evangelist: Doe de overpriesters en heur dieners him zaggen, raosden zi'j en zeden:
Nr. 21d Koor
Krusig him, hang him an et kruus!
Nr. 21e Recitatief
Evangelist: Pilatus zee tegen heur:
Pilatus: Nemen jim him mar mit en krusig him mar want ik vien gien schuld in him.
Evangelist: De Joden zeden doe tegen him:
Nr. 21f Koor
Wi'j hebben een wet en naor die wet moet hi'j ommebrocht wodden, want hi'j het himzels zeune van God maekt.
Nr. 21g Recitatief
Evangelist: Doe Pilatus dit heurde, wodde hi'j nog vule banger, en hi'j gong et gerechtsgebouw weer in en zee tegen Jezus:
Pilatus: Waor kom ie eins weg?
Evangelist: Mar Jezus gaf him gien bescheid. Pilatus zee doe tegen him:
Pilatus: Woj' niet tegen mi'j praoten? Weten jow dan niet, dat ik de
macht heb om jow gaon te laoten, mar ok de macht heb om jow an et kruus
te hangen?
Evangelist: Jezus zee doe:
Jezus: Jow zollen gien macht tegen mi'j hebben as jow dat niet van
boven geven was: daorom dot hi'j, die mi'j an jow overleverd het een
grotere zunde.
Evangelist: Van doe of perbeerde Pilatus him gaon te laoten.
Nr. 22 Koraal
Deur jow gevangenschop, zeune van God,
moet veur oons de vri'jhied kommen;
Jow gevang is de genaodetroon,
et vri'jplak veur alle vromen;
Want as jow niet onderdrokt west weren,
had oonze onderdrokking ieuwig duren moeten.
Nr. 23a Recitatief
Evangelist: Mar de Joden raosden en zeden:
Nr. 23b Koor
Aj' disse man gaonlaoten, bin ie gien vrund van de keizer meer;
iederiene, die zichzels keuning maekt, verzet him tegen de keizer.
Nr. 23c Recitatief
Evangelist: Pilatus heurde disse woorden en hi'j leut Jezus naor buten
brengen en gong zels op de rechterstoel zitten, op et plak, dat
Litostrótos nuumd wodde, in et Hebreeuws Gabbata. Et was de
veurbereidingsdag veur et Pascha, omdebi'j zes ure, en hi'j zee tegen
de Joden:
Pilatus: Kiek, hier is jim keuning!
Evangelist: Zi'j raosden:
Nr. 23d Koor
Vot mit him! Vot mit him! An 't kruus mit him!
Nr. 23e Recitatief
Evangelist: Pilatus zee tegen heur:
Pilatus: Moet ik jim keuning an et kruus hangen?
Evangelist: De overpriesters zeden doe:
Nr. 23f Koor
Wi'j hebben gien keuning, allienig de keizer!
Nr. 23g Recitatief
Evangelist: Doe gaf hi'j him an heur over om an een kruus ophongen te
wodden. Zi'j nammen Jezus mit en voerden him weg, en hi'j gong, mit
zels zien kruus op 'e rogge, naor et Schedelplak, in et Hebreeuws hiet
dat plak Golgota.
Nr. 24 Aria (bas) mit koor
Haost jim, zwaor bepruufde zielen,
verlaot jim mattelaorshollen.
Haost jim - Waorhenne? - naor Golgotha!
Gebruuk de vleugels van je geleuf,
vlieg - Waorhenne? - naor de heuvel van et kruus,
jow goedgevuul bluuit daore.
Nr. 25a Recitatief
Evangelist: Daor wodde hi'j doe an et kruus hongen, tegere mit twie
aanderen, an weerskaanten iene, en Jezus in et midden.En Pilatus leut
ok een opschrift maeken en op et kruus timmeren; daor ston op schreven:
«Jezus, de Nazoreeër, de Keuning van de Joden». Dit opschrift wodde
deur een hiele protte Joden lezen; want et plak, waor Jezus krusigd
wodde, was dichtebi'j de stad, en et was schreven in et Hebreeuws, in
et Latien en in et Grieks. De overpriesters van de Joden zeden doe
tegen Pilatus:
Nr. 25b Koor
Schrief niet: De keuning van de Joden, mar dat hi'j zegd het: Ik bin de keuning van de Joden.
Nr. 25c Recitatief
Evangelist: Pilatus zee doe:
Pilatus: Wat ik schreven heb, dat he'k schreven.
Nr. 26 Koraal
In de grond van mien hat
gleenstert elke tied en elk ure
jow naeme en kruus allienig,
daorom kan ik bliede wezen.
Kom bi'j mi'j in mien droom,
tot troost in mien nood
hoe jow, Here Christus, zo mild
jowzels doodbloeden laoten hebben.
Jezus an et kruus (Jehannes 19, 23-37; Mattheüs 27, 51-52).
Nr. 27a Recitatief
Evangelist: Doe de soldaoten Jezus an et kruus hongen hadden, nammen
zi'j zien kleren en maekten daor vier patten van, veur elke soldaot ién
pat, en zien onderklied. Dit onderklied was zonder naod, uut ién stok
weven. Zi'j zeden doe tegen mekeer:
Nr. 27b Koor
Lao'we dit niet verscheuren, mar d'r omme lotten, veur wie et kriegen zal;
Nr. 27c Recitatief
Evangelist: zodat et schriftwoord uutkommen zol: «Zi'j hebben mien
kleren onder mekeer verpat en veur mien kleren hebben zi'j et lot
gooid». Dit hebben de soldaoten doe daon. En bi'j et kruus van Jezus
stonnen zien moeke en de zuster van zien moeke, Maria van Klopas en
Maria van Magdala. Doe Jezus zien moeke zag en een leerling, die hi'j
liefhad, en die bi'j heur ston, zee hi'j tegen zien moeke:
Jezus: Vrouw, kiek, jow zeune.
Evangelist: Doe zee hi'j tegen de leerling:
Jezus: Kiek, jow moeke.
Nr. 28 Koraal
Hi'j zorgde veur alles
tot an et laeste mement,
Zo bedocht hi'j zien moeke,
en gaf hi'j heur oppas.
Och meenske, breng alles op odder,
heb God en meensken lief,
starf dan zonder lieden
en wees niet verdrietig!
Nr. 29 Recitatief
Evangelist: En van dat ure of nam de leerling heur bi'j him in huus.
Doe zee Jezus, omdat hi'j wus, dat alles now volbrocht was, zodat et
schriftwoord uutkommen zol:
Jezus: Ik hebbe dust!
Evangelist: Daor ston een kruke vol mit zoere wien; zi'j stakken doe
een spoonze, sopt in de zoere wien, op een hysopstengel en brochten die
naor zien mond. Doe Jezus van de zoere wien pruufd had zee hi'j:
Jezus: Et is volbrocht!
Nr. 30 Aria (alt)
Et is volbrocht!
Och troost veur de prangde zielen!
De naacht van treurnis
laot et laeste ure slaon.
De Held uut Juda zegeviert mit macht
en besluut de stried.
Et is volbrocht!
Nr. 31 Recitatief
Evangelist: Doe beug hi'j et heufd en gaf de geest.
Nr. 32 Aria (bas) mit koraal
Mien dierbere Heiland, laot ik jow vraogen,
Jezus, jow die now doodgaon weren,
Nu jow daor an et kruus sleugen binnen
en zels zegd hebben: Et is volbrocht,
leeft now zonder aende.
Bin ik van starfelikhied bevri'jded?
In de laeste doodsnood
keer ik mi'j nargens aanders henne.
Kan ik deur jow piene en starven
et hemelriek ingaon?
Is d'r verlossing veur de hiele wereld?
Dan tot jow, die vrede mit mi'j sluut,
och, jow lieve Heer!
Jow kunnen van de piene vaaste ok niks zeggen,
Geef mi'j allienig, waj' verdiend hebben
mar jow bugen et heufd
en zeggen stillezwiegend: Ja.
Meer weenske ik niet!
Nr. 33 Recitatief
Evangelist: En kiek, et veurhangsel van de tempel scheurde doe van
boven tot onder in twie helten, en de eerde trilde, de rotsen
scheurden, en de grafsteden gongen eupen en een protte lichems van
ontslaopen heiligen wodden opwekt.
Nr. 34 Arioso (tenor)
Mien hat, wiels de hiele wereld
bi'j et lieden van Jezus ok mit lieded,
de zunne heur in 't duuster klieded
et veurhangsel scheurt, de rots uutmekeer vaalt,
de eerde trilt, de grafsteden splissen,
omdat zi'j de schepper koold wodden zien,
wat zul ie in jow plak doen?
Nr. 35 Aria (sopraan)
Stroom uutmekeer, mien hat, in stromen van traonen
om de hoogste te eren!
Vertel hemel en eerde van je rampspoed:
jow Jezus is niet meer!
Nr. 36 Recitatief
Evangelist: De Joden, omdat et de veurbereidingsdag was en de lichems
niet op de sabbat an et kruus blieven mochten (want de dag van die
sabbat was groot) vreugen Pilatus, of heur bienen breuken en zi'j daor
weghaeld wodden mochten. De soldaoten kwammen en brakken de bienen van
de eerste en van de aandere, die mit him krusigd weren; mar doe zi'j
bi'j Jezus kommen weren en zaggen, dat hi'j al dood was, brakken zi'j
zien bienen niet, mar iene van de soldaoten stak mit een speer in zien
ziede en drekt kwam d'r bloed en waeter uut. En die et zien het, het
daorvan getuugd en zien getugenis is waorachtig en hi'j wet, dat hi'j
de waorheid zegt, zodat jim et ok geleuven. Want dit is gebeurd, zodat
et schriftwoord uutkommen zol: «Gien bien van him zal breuken wodden».
En een aander schriftwoord zegt: «Zi'j zullen op him zien, die zi'j
deursteuken hebben».
Nr. 37 Koraal
Och helpe oons, Christus, zeune van God,
deur jow bitter lieden
dat wi'j jow de hieltied onderdaonig
alle kwaod ontlopen.
Dawwe jow dood en de oorzaeke d'r van
vruchtber gedaenken,
en daorveur, hoewel wi'j aarm en wiek binnen,
jow daankoffers schinken.
Jezus zien graflegging (Jehannes 19, 38-42)
Nr. 38 Recitatief
Evangelist: En daornao vreug Jozef van Arimatea, een leerling van Jezus
(mar in stilte uut benauwdens veur de Joden) an Pilatus om et lichem
van Jezus ophaelen te meugen; en Pilatus vun et goed. Hi'j kwam doe en
nam et lichem daor weg. En ok Nikodemus kwam, die de eerste keer naachs
bi'j him kommen was, en hi'j nam een mingsel van mirre en aloë mit,
ongeveer honderd pond. Zi'j nammen doe et lichem van Jezus en wikkelden
et in linnen doeken mit speceri'jen, zoas et bi'j de Joden gebrukelik
is bi'j et begreven. En d'r was op dat plak, waor hi'j krusigd was, een
tuun en in die tuun een ni'je grafstee, waor nog nooit iene inlegd was;
daor legden zi'j Jezus henne vanwege de veurbereidingsdag van de Joden,
en omdat de grafstee dichtebi'j was.
Nr. 39 Koor
Rust zacht, jow heilig bonkerak
waor ik now niet meer om goelen zal.
Rust zacht en breng mi'j ok tot rust!
De grafstee, zoas et veur jow bestiet
en veerder gien rampspoed bevat,
maekt veur mi'j de hemel eupen
en sluut de ingaank van de hel.
Nr. 40 Koraal
Och Heer, laot jow lieve engels
an et aende mien ziel
naor Abraham zien schoot toebrengen!
Laot mien lichem in zien slaopkaemertien
hiel zaachies, zonder kwellings en piene
rusten tot an de jongste dag!
Maek mi'j dan wakker uut de dood,
zodat mien ogen jow zien zullen
in alle bliedschop, och zeune van God,
mien Heiland en genaodetroon!
Here Jezus Christus, verheur mi'j
en ik zal jow ieuwig priezen!
© Piet/er Bult