Lao'we 'God' vervangen deur 'Allah'...
Bisschop Muskens van Breda (die van: aj' honger hebben maj' wel een brood stelen) vint Allah een mooi woord veur God. "Zowwe niet allemaole saemen zeggen: we numen God in 't vervolg Allah", zee de geestelik leider in et aktualiteitenpergramme Netwark. "Waoromme kuwwe dat niet saemen doen gaon?"In de islamitische theologie is God uniek, almachtig, rondomme tegenwoordig, onzicht-ber. Liekas in et kristendom wodt Hi’j beschouwd as de Schepper van al wat leeft. Hi’j beschikt liekewel over levengevende as vernietigende eigenschoppen. Disse God wodt beschouwd as dezelde te wezen as de God van et jodendom en kristendom, omreden moslims de God anbidden van Adam, Noach, Abraham, Mozes, David en Jezus. De zienswieze en invulling van de geloofsbeleving om disse God te berieken verschilt bi’j de drie godsdiensten. Omreden men God binnen de islam as alomvaemend zicht, komt liekewel et goeie as et slechte van Him, mar niks zonder reden.
Moslims meugen heur niet een veurstelling van God maeken, aanders as deur et anhaelen van Zien eigenschoppen of manifestaosies, verwoord in de 99 Schone Naemen van God die ofleided binnen uut de Koran. Et is dan ok niet toestaon om ofbelings te maeken die God veurstellen moeten zollen. God kan niet as mannelik of as vrouwelik beschouwd wodden, hoewel et Arabisch gien onziedige woorden kent.
Een moslim zal vaeke Allah volgen laoten deur ta'ala, wat de Verhevene betekent, en him deurgaons uutgebreider Allah soebhanoehoe wata'ala numen, meerstal ofkot tot: Allah (swt), wat vertaeld wodden kan as God, geprezen en verheven is hi’j.
In westerse taelen zoas et Nederlaans wodt de term bruukt om specifiek de God van de islam an te geven. In moslimlanen mit een kristelike minderhied bruken kristenen et woord 'Allah' of 'cenab-i-allah' ok veur God. Ok Arabisch praotende joden bruken et woord 'Allah'. Op Malta bruken de kattelieken ok Allah.