Boertien in de hemel

Weeromme naor Verhaelen
Weeromme naor Stellingwarfs
Home


Boertien in de hemel

D'r was es een aarm mar slim geleuvig Stellingwarfs boertien wegraekt en die kwam bi'j de poort van de hemel. Krek etzelde overkwam een stinkend rieke meneer en die wol ók tot de hemel in. Mit zien beidend stonnen ze daor een posien te waachten. Et duurde alderdeegst een hiel schoft, mar eindelik kwam Sunt Pieter mit de sleutel, hi'j dot eupen en lat de rieke meneer binnen. Et boertien hadde hi'j - naor et leek - niet iens staon zien, en vot-en-daolik gong de hemelpoort ok weer dichte.

Now kon oons boertien van buten wel heuren hoe die meneer mit alle meugelike wille in de hemel opneumen wodde en hoe ze daorbinnen veur him meziek maekten, zongen en daansten. Nao een hiel schoft wodde et weer stille en kwam Sunt Pieter weer naor poort toe. Hi'j dee de zwaore deure weer eupen en leut et Stellingwarfse boertien now ok binnen. Now hadde et boertien docht dat d'r now ok wel meziek en zang en zo wat henne wezen zol, as hi'j daor binnenkwam, mar alles was en bleef lieke stille. Ze neumen him trouwens wel mit alle meugelike liefde op, en de engels kwammen him integen, mar zingen en daansen dee gieniene.

Doe vreug et boertien toch mar es an Sunt Pieter waoromme ze bi'j him niet krekliek zongen en daansten as bi'j die rieke stinkerd. Et gong d'r dan toch - vun hi'j - in de hemel ok niet altied lieke eerlik an toe, et was al krek as op de eerde. Doe zee de heilige Petrus: "Nee vrund, ie bin oons lieke lief as al die aanderen en ie zullen krek as die rieke meneer van alle hemelse vreugden genieten kunnen. Mar kiek es an, et zit eins zo: aarme Stellingwarver boerties zoas ieje, die kommen hier in de hemel haost iedere dag wel binnen mar zoe'n rieke schieterd as die meneer, die komt hierboven mar iens in de honderd jaor!"


© Piet/er Bult