DomDom

Weeromme naor Verhaelen
Weeromme naor Stellingwarfs
Home


DomDom

Al een keermennig hadde de buurman mien TomTom liend. Een poze leden was 't ok weer raek.
"Ma'k him nog een even een keer mitnemen?" vreug buurman
"we zullen een dag naor oolde kunde in Zwolle."
Now ja, en wat doej' dan...
Mar ik geleuf dat hi'j mi'j now niet nog es vraogen zal want ik hebbe d'r wat op vunnen. Luuster...

Ik hadde al een peer keer lezen daj' de stemme van dat ding veraanderen kunnen. Ie kun alderdeegst je eigen 'Carin' maeken! De laeste tied as de buren bi'j oons over de heerd weren ha'k een klein mikrefoontien op 'e taofel tussen een prottien bloemen hongen. De keren dawwe naor heur huus toe gongen ha'k dat mikrefoontien ok mar in de buse stopt. Ikke en de vrouw hadden tussendeur wat appatte vraogen veur de buurvrouw bedocht waor ze wel haost bescheid op geven mos in woorden die we bruken konnen veur de TomTom. Alderhaande vraogen zoas
"Waor zit die-en-die winkel ok alweer, krek over 't spoor an de rechterkaante, now?"
"Ae nee okse," zee de buurvrouw "over et spoor linksof".
"Hoe lange bin jim eins trouwd?" was een aandere vraoge.
"Krapan vuuftig jaor" zee ze dan. Op disse meniere ha'k haost alle 256 woorden en kotte zinnegies van de buurvrouw bi'jenneer gadderd. Mit wat jat-, knip- en plakwark op de komputer ha'k de stemme van de buurvrouw klaor veur alle meugelike anwiezings die TomTom wel es geft. Now ha'k mi'j gien tied gund om alle woorden en riegelties precies op et goeie plak te zetten dat et ding reup eins te pas en vule vaeker te onpas mar wat. Waor 'Carin' eerst nog zee
"Na tweehonderd meter rechts afslaan" zee ze now
"Kiek uut sufferd, over 't spoor linksof."
En bi'j een rotonde
"Nao vuuftig jaor, over de sloot en dan naor et knienehokke."

Inderdaod, et is now al even leden dat buurman mi'j weer vraogd het om TomTom nog es van me te lienen. Now is zoe'n ding prachtig vanzels aj' de hiele dag zo wat in de vremde bi'j 't pad binnen. Laestdaegs he'k nog een stemme maekt die 'k stiekem van mien maegien opneumen hebbe. Allemaole lieve woorties zoas "Ik hool van jow", "Ik vien jow hiel lief" en zo veerder. De vaaste tekst van "Probeer om te keren" he'k veraanderd deur een riegel hiele sensuele teksten <censuur>. A'k now van Berkoop naor Amsterdam gao dan stel ik mien TomTom niet in da'k van Berkoop naor Amsterdam moete - dat pad ken ik onderhaand wel - nee, dan stel ik 'm zo in da'k de aandere kaante uut wil, mar ik riede vanzels gewoon naor Amsterdam. De hieltied en bi'j iedere krusing van Berkoop naor Amsterdam zegt mien lieve maegien dan onderwegens tegen mi'j "... ... ..." (censuur). 'n Pracht van een Ding-Ding mar o zo DomDom. Ja, die DomDom dus...


© Piet/er Bult