Et drama vrouw

Weeromme naor Verhaelen
Weeromme naor Stellingwarfs
Home



Et drama vrouw (van baoren tot an de baore...)

Poppien, bostkiend (eerste 3 maonden)

Nao een maond of drieje naodat ze onder de schölk wegkommen (et domvorrelsjaor) begint et gedonder al, de eerste en ok al haost wat verleidelike trekkies om 'e mond van et kleine dinkien. De eerste maond of drieje het ze eins alliend mar belangstelling veur eten - et meerst drinken eins - en veur waarmte van de moeke. Dit lachien wodde heur krek as et goelen, eten en drinken, ingeven deur et instinktmaotige wao'ze allemaole mit geboren wodden. Et ontwikkelen van et lachen ligt dan ok stief naost et kleine stokkien oerhassens en zal in heur veerdere bestaon dan ok et alderbeste ontwikkeld stokkien van die hassens wodden. Et maegien zal gaondeweg et goelen en et lachen te pas en vaeks ok te onpas as waorlik keunststokkien bruken. Alle centen en macht van de hiele wereld valen bi'j slot van zaeke in et niet, bi'j et goelen en et lachen van et drama vrouw.

Ukkien (zoe'n 3 tot 4 jaor)

Bi'j de eerste eigenwieze stappies rond om taofel toe brengt ze heur pake - as ze d'r te minste flink bi'j lacht - tot de uutspraoke "Kiek es an, wat lopt ze al een aende!". As d'r gien glimkien bi'j heur om de mond komt dan komt pake vaeks ok niet vule veerder as "Now kiek es an, et lopen zal ok haost wezen." As ze laeter mitgaot naor de slager krigt ze mit heur schaeterende lach altied een stokkien wost en al krekkengeliek een stokkien koeke of een lekker snupien bi'j de bakker. Ja, die komt d'r wel.

Kiend (tot 8 jaor)

Op et schoeleplein staon de meerste joongies om et maegien henne dat et mooiste lachen kan. As ze dan ok nog lange glaanzende krullen in 't haor het dan is ze warkelik de topper van et plein, de straote, de buurt, et dörp. Een al wat oolder drama vrouw vietert et kleine ding nog graeg wat an: "Ja lach ie mar wat mien maegien, dan koj' d'r wel!" Waor ze dan komt, zal ze gaondeweg zels nog leren moeten. Mar dat leren gaot heur trouwens ok een stok makkeliker of mit die iewige lach om heur mond. Ja, ie kommen d'r wel.

Maegien (tot een jaor of 13)

As ze niet op de goeie mementen lacht dan is ze iene van de zovule, een aorig maegien. Mar as ze precies op de goeie mementen wat lacht en as 't neudig even an de lippe trekt dan is et ankommende drama vrouw aorig meer maans, o zoe'n lief ding. En ze helpt moeke al zo flink mit ofwasken en laekens opteren. Mit een lach om de mond mag ze veuran in de klasse zitten en mag ze veurdoen hoe et heurt. Ja, die komt d'r wel.

Puber (tot zoe'n 17 jaor)

Bi'jtieden wat lastig mar ja, alles wodt ok o zo spannend. Mit een lachien of mit daelesleugen ogen, dan weer veuran of even niet in 't locht, de lach die wint et altied. Uren veur de spiegel staon te bekketrekken, de aksenten schilderen as een klown. Kriebels, bossies, piene en vlinders in de boek, kan niet waachten, komt d'r nog wat van? Zonder is ze et muurbloempien mar mit een gulle lach et middelpunt op ieder feest. Ja, die zal et nog veer schoppen.

Maegd (tot rond 21)

Ja, ja, maegd. As sterrebield dan misschien. Et kleine maegien is groot, groot wodden mit heur briede lach. Et gong vanzels, en vusen te hadde eins, mar wat was 't mooi. De buurt, et dörp onveilig, pake vint et best zo, moeke daenkt et heurend: kiend, kiend, kiek toch uut. De jonges kun niet waachten. Mit je glimlach hoej' gien smerig wark te doen, de direkteur verwaacht je om vier ure. Ja, mit him komt ze d'r wel.

Vrommes (tot 35)

Ze numen et hadde warken en dat vien ie ok, mar aanderen vienen dat niet. Aj' op 'e tied wat lachen blieven, gaon deuren veur je eupen. Van et iene feest naor et aander, de halve wereld rond, gien tied, gien tied, want die bestaot now even niet. Et drama vrouw in je is wakker. Kerels laoj' veur je draeven, an iedere haand wel tiene. Ze sturen jow veuruut om dan heur weenst te haelen, ie wienen ze om je vinger. En o ja, kiender, dat wodt now wel tied. Och ja, zo komme ik d'r wel.

Vrouw (tot 60)

Et wodt rustig rond et drama vrouw, wat stillegies eins. Waor is iederiene bleven, wat is ieder eins an et doen. Et lachien wodt d'r ok niet beter op, de eerste groeten tekenen et gezichte. D'r is meer zalve neudig of zwaorder ingreep alderdeegst. Mar dit hool ie niet vol, ok al kuj' et riekelik doen. Och ja, dat is waor ok, daor en daor moe'k ok neudig weer es henne. Je dochter nemt heur twiede vrund al mit. Je dochter, ok al drama-kampioen. Och, et zal mien tied wel duren.

Beppe (tot de baore)

Dit drama vrouw dot niet meer mit, heur beste tied het west. Ze hoeft et drama niet meer uut te hangen, alderdeegst niet iens et beest. Et is goed zo. Dochter en kleinkiend nemen et stokkien over, vraogen beppe goeie raod: ik wil graeg ditte en ik wil graeg datte. Lachen maegien, lachen en zo now en dan een betien goelen, dat is 't recept. Ik zie et wel, gao now naor ginne kaante mar... mit een lach om 'e mond: wat hewwe ze te pakken neumen. Et drama vrouw, et is volbrocht.

© Piet/er Bult