Fietstocht

Weeromme naor Verhaelen
Weeromme naor Stellingwarfs
Home


Fietstocht

Now las ik eerdaegs in de kraante dat op zundag de achtste juli de jaorlikse fietstocht weer verreden wodt.

Wat ha'k graeg mitfietsen wild mar ja, mien fiets staot mit twie platte banen in de schure. Doe 'k de fiets van de kaante kriegen wol bleek d'r nog meer niet goed meer meer an te wezen. Wat wi'j' ok aj' dat ding de laeste vuuf jaor niet bruukt hebben, laot staon op aandere wieze ok mar een betien onderholen hebben.

Wat ha'k graeg mitfietsen wild mar ja, ik geleuf da'k krek wat grieperig begin te wodden. Al een dag of wat he'k et koold en dan weer waarm, gien nocht an 't eten en even laeter weer ropperig in 'e huud. Ik daenk da'k morgen mar even naor dokter lope en die zal wel zeggen da'k mar een peer daegen onder de dekens blieven moet.

Wat ha'k graeg mitfietsen wild mar ja, we zullen die dag krek naor mien zuster in Hollaand. Et is niet dawwe daor de deure platlopen mar dit hewwe een peer maond leden al steld. Et is me ok wat aj' daor zoas zi'j mit twie kiender zitten bleven is. Dan staoj' d'r mar hielemaole alliend veur en wi'j' ok wel es weer wat femilie om je henne hebben.

Wat ha'k graeg mitfietsen wild mar ja, oonze ooldste is de veurige weke krek slaegd veur heur examen en mos neudig een weke op vekaansie naor Griekelaand. Now zollen wi'j zolange op heur katte, et gooldvissien en de hamster passen. Nao de vekaansie zal ze wel bi'j de 'soos' terechte kommen en dan hej' vanzels gien tied meer veur vekaansies.

Wat ha'k graeg mitfietsen wild mar ja, aovens d'r veur hewwe de laeste aovend van de kaortklup en dan wodt et vaeks wat laete. Now kan 'k grif wel een naacht mit wat minder slaop toe mar we hebben de gewoonte dat et vat dan ok leeg moet omreden we een hiel schoft niet weer bi'jenneer kommen. En ik kan zo min tegen draank, dat ik weet now al da'k dan mit heufdzeerte op bedde raek.

Wat ha'k graeg mitfietsen wild mar ja, we verwaachten die dag krek een tillefoontien van mien zwaoger uut Kannede. Hi'j zol daor in de vremte now al veur de dadde keer trouwd wezen en zol oons daor zundag briedvoerig bescheid van doen. Dat ja, we moe'n eins bi'j de tillefoon blieven.

Wat ha'k graeg mitfietsen wild mar ja, ik vien zels eins da'k al genoeg beweeg. Vandemorgen bin 'k al drie keer de trappe op west. Eerst ha'k de buusdoek vergeten, doe he'k boven stofzeugen en even laeter he'k een schoon boezeroen kregen want ik hadde aorig griemd mit de koffie.

Wat ha'k graeg mitfietsen wild mar ja...

Zo kan 'k vanzels nog wel even deurgaon mit et bedaenken van allemaole smoesies om mar niet mit te hoeven. Allemaole lul-verhaelen vanzels. Aj' een betien 'kerel' dan verzet ie alles om now krek wel mit te gaon. Krek as aandere jaoren een prachtige fietstocht deur oons eigen laandschop en ie kommen vaeks op plakkies daoj' et bestaon niet van wussen.

Alleman die as wel mitdot weensk ik uut mien luie stoel een hiele noflike en gezonde tocht toe.


© Piet/er Bult