Ienakter
Weeromme naor Verhaelen
Weeromme naor Stellingwarfs
Home
Ienakter
A: Ambtener + baentiesman
G: Grietje de koffiejuffer
D: Dure-meneer
J: Jan-mit-de-Pette
De lekaosie is et buro van een Ambtener van Bouw- en Woningtoezicht op
et Gemientehuus, op een woensdagmorgen rond een uur of tiene. Et giet
d'r uutaendelik omme dat et verschil uutbielded wodt in et geval d'r
een Dure-meneer wat bouwen wil, een Jan-mit-de-pette of dat de
Baentiesman ze allemaole de baos is. Gaondeweg wodt d’r dan ok een
groot verschil zichtber in sociaole klassen.
D'r is een oolde klinkte mit een aorig lappien grond vri'jkommen op et
mooiste plakkien van 't dörp deurdat oolde Triensje, die daor
jaorenlange woond het, opiens (onder verdochte omstaandigheden?)
wegraekt is. In et begin ligt et d'r doemendikke bovenop dat de
Dure-meneer (kammeraod van de Burgemeester) an de winnende haand is.
Halverwege komt d'r toch een lichte veursprong veur Jan-mit-de-Pette
mar nemt de Dure-meneer 'zien maotregels' en an 't aende is et dan toch
Jan-mit-de-Pette die d'r mit de 'buit' vandeur giet of zol et de
Baentiesman toch nog lokken om himzels te verrieken? Gelokkig bliekt
d’r nog een een oold stok bi’j de netaoris te liggen waoruut bliekt dat
de femilie een oold eerste kooprecht op et onroerend goed het. Mar hoe
zit et dan mit de dörpsrattels? Was et wegraeken van oolde Triensje dan
eins wel een ‘netuurlike dood’?
[ Ambtener zit aachter zien buro en is drok an ’t papperassen en an ‘t komputeren.]
[ Et doek giet op.]
[ Jan Pette komt deur de deure. ]
J: Goeie morgen. (meneer Klooster)
A: [ wat schaopachtig ] Morgen (Jan), gao zitten. Wat kan 'k veur jow doen?
J: Now, et is ziezo meneer, now oolde Triensje wegraekt is heb ik bi'j
heur aachterkleinzeune een bod daon op et oolde husien mit die
aanderhalf bunder grond. Daor wo’k veur mien vrouw (Hendrikkien) en
mi’j eins een mooi ienvooldig ni’j huus op zetten laoten. Wi’j hebben
al zo vaeke tegen mekeer zegd dat as dat plakkien nog es vri’jkomt dan
zowwe daor mar wat graeg oonze laeste jaoren slieten. D’r is mooi
ruumte veur een peer peerden, wat schaop en wat kiepen om ‘e deure. Mar
doe zee dat rotjoonk, o pardon meneer heur, die aachterkleinzeune van
Triensje da’k eerst mar es op et Gemientehuus vraogen mos a'k daor
zomar een ni’j huus zetten laoten moch.
A: Ie doelen op dat oolde stee an de Binnerstebutenlaene, dat van oolde vrouw Diekstra?
J: Krek, ja, dat plakkien. Jaoren leden het mien vader al es zegd:
“Jonge daenk d’r omme, as dat plakkien van Triensje nog es vri’jkomt
dan is dat veur jow.”
A: Ja mar ho es even, dat giet zomar niet en ik kan vanzels niet in jow
pottemenee kieken mar dat is wel zo ongeveer et mooiste plakkien van
oons hiele dörp. Daenk ie niet dat dat wat een dure grap wodt veur jow?
J: Now ja, et zal wel een peer centen kosten moeten meneer, mar wi’j
bin altied slim zunig west. Niet overdreven mar we hebben wel een roege
cent op ‘e baank en d’r zit grif ok nog wel wat in de oolde sokke.
A: Ja, mar vergisse je niet. Zokke plakkies bin d’r mar zunig meer en
daor is vaaste wel meer belangstelling veur. En d’r bin vandaege-de-dag
ok nog al wat riegelties daor aj’ an voldoen moeten veurdaj’ bouwen
meugen zoas, grondverontreinigingsonderzuuk, archelogisch onderzuuk,
milieuwetten, flora- en fauna en de ni’je voegelrichtlijnen,
grondwaeteronderzuuk, de vestigingswet, lewaaioverlastwet, en gao zo
mar deur. Ik weet niet, ik weet niet… [ trekt een slim naodaenkend
gezichte ] mar ik zol zeggen, stap es naor een architectenburo en dien
dan mar es een plan in. Dan moe’we mar es kieken.
J: Dus meneer daenkt dawwe dat wel klaor kriegen?
A: Beloven doe’we hier nooit wat mar, wie wet.
J: Now, dan eerst mar daankjewel veur jow tied meneer heur, en dan gao
ik eerst even naor de timmerbaos om een tekening. Dan kom ik mit een
weke-of-wat wel es even weer.
A: Dat zo’k mar doen.
J: Now, dag meneer.
A: Dag eh…
[ Ambtener schuddekopt wat en giet weer ‘drok’ an ’t wark…]
[ Dure-meneer komt mit een zwierigezwaai binnenstappen. ]
D: Goeiemorgen. Ik komme hier krek van boven bi’j mien kammeraod Carel
weg en wi’j moe’n et es even hebben over dat stee van oolde Triensje.
Carel zegt dat ie dat wel even veur mi’j regelen kunnen om die oolde
klinte plat te smieten en d’r een geweldig kesteel veur mi’j daele te
zetten.
A: Ok goeie morgen meneer … hoe was de naeme, zeden jow?
D: Hoezo, hoe was de naeme, hoe was de naeme. Ken ie mi’j dan niet.
Advekaot Janszen van Janszen, Janszen en Janszen is de naeme, en ie
zeggen wat is de name, ik zegge Janszen is de naeme.
A: O … ja .., now goed, eeh… meneer Jansen dan…
D: Janszen mit ‘sz’, dat begriep ie wel.
A: O … ja.., now goed, meneer Janszen dan. En jow kwammen krek van boven zeden jow…
D: Ja, dat zee ik ja, ik kom krek bi’j jow g r o t e
b a o s weg en we hebben ofpraot dawwe vandemiddag tegere naor de
golfbaene gaon om een ballegien te slaon dat ik hebbe now niet al te
vule tied meer.
A: Jow bedoelen te zeggen dat jow boven bi’j de Burgemeester van de kaemer kommen?…
D: Ja, dat zee ik ja, ik kom krek bi’j jow g r o t e
b a o s weg en die zee dat ie wel even wat veur mi’j regelen
kunnen omtrent dat oolde stee van Triensje an de Binnerstebutenlaene.
Dat ik zol zeggen, leg al je aandere wark – wat dat ok veur onzin wezen
mag – mar even an kaante en bel mien goeie vrund Joost van Diekman, die
van Diekman en Diekman architecten mar gauw even op en maek tegere mit
him een strak plan. Ik hebbe boven krek al even mit Joost beld en hi’j
had nog wel een standerd anvraoge in zesvoold in de kaaste liggen. Aj’m
die straks even mit jim beidend deurnemen dan kuwwe morgenvroeg de
stokken wel tekenen. Aj’m beslist nog wat van mi’j weten moeten dan
hej’ hier et kaortien van mien sekretaoresse. Now moe’k neudig vot, en
ik rekene d’r op dat et goed komt. Goeiemorgen.
[ D: giet of en A: veegt him et zwiet veur van ‘e kop …]
[ G: de koffiejuffer komt d’r mit et koffiekarregien in. ]
G: Och, wat kieken jow mal toe, is ’t wel goed? [ Begint mit een schotteldoek ok op et heufd van A: omme te poetsen. ]
A: Och, vertel et mar an gieniene, mar ie weten toch wel dat oolde
Triensje laestdaegs wegraekt is? En now lopen ze mi’j hiere de deure
plat om dat plakkien. Mar et slimste is dat mien vrouw en ikke daor ok
graeg henne wollen te wonen. En now lopt die droktemaeker van Janszen
d’r krek uut en die het wat bekonkelfoest mit de Burgemeester en now
wee ‘k eins niet meer hoe ‘k et hebben zal. Krieg ik t’aovend van mien
Hennie op ‘e kop vanzels, da’k zoe’n sloegerd bin en Jan Pette krigt et
niet mar now giet die dikkop van Janszen d’r vaaste mit an ‘e hael. Et
is mi’j toch wat.
G: Toch mar een paantien koffie doen of hej’ liever een slop bakkien thee?
A: Hej’ niet wat starkers?
G: Now nee, mar ik hebbe d’r wel een gevulde koeke bi’j. Weej’ wat,
schink ik mi’jzels ok even iene in en blief ik dat hier even opdrinken.
Kuwwe d’r nog wel even over praoten. Zuwwe dat dan mar doen?
A: Ja dat is goed mar niet te lange heur want ik moet drekt an ‘t bellen en doen veur die malle kerel.
[ Beidend drinken heur koffie en d’r wodt -mit naodrok- niks zegd.]
[ G: komt in de bienen en wil weer veerder mit heur koffiekarregien.]
G: Now dat locht aorig op is ’t niet? Even bi’jpraoten wil nog wel es
helpen. Mar now moe’k d’r weer vandeur heur. D’r zitten meer op mi’j te
waachten.
[ G: giet of en verget heur koffiekarre.]
[ G: komt weeromme om heur koffiekarre op te haelen.]
G: Ik binne hielendal veraldereerd, ‘k zol mien koffiekarre al haost vergeten. Wat lopt et seins mal toe in de wereld!
[ A: verslat in de papperassen en de komputer. An de tillefoon wodt iederiene ofsnauwd totdat….]
A: Mit bouwbedrief Van Dellen, zeg ie? (…) Ja, dat zol wel kunnen, mar
zol ’t niet beter wezen awwe even wat kalman doen? (…) Nee, dat is wel
zo, mar Jan Pette het gien haost he’k begrepen en ik hebbe ok wel meer
te doen, ziej’. (…) Jaowel, ’t is wel een gaedelik plakkien mar ik
geleuf niet dat ze d’r veur in de riegel staon om daor wat te bouwen
heur. Nee, dat is trouwens veur de meersten ok niet weglegd, dat doe
mar kalmpiesan. (…) Is goed, tot kiek es.
[A: veegt him alweer et zwiet veur van ‘e kop … en alweer giet die verrekte tillefoon ]
A: Dag meneer Diekman. (…) Ja daor he’k wel es van heurd heur. Van
Diekman en Diekman architecten bedoel ie toch? (…) Nee, ik zol wel
graeg willen mar ik hebbe now wat heufdzeerte dat ik gao vandemiddag
mar naor huus geleuf ik. Even een peer ure op bedde en dan kan ‘k d’r
wel weer tegenan. (…) Nee, morgen bin ‘k de hiele dag op een
bi’jschoelingskursus en vri’jdag he’k een ATV, dat et wodt ‘m disse
weke niet meer bin ‘k bange. (…!@#$%^&…) Ja, dat begriep ik wel mar
jow moe’n et ok es van oonze kaante bekieken. Wi’j kun ok gien iezer
mit de hanen bugen! (…!@#$%^&…) Ok dag, meneer Diekman…
[A: En hi’j veegt him alweer et zwiet van ‘e kop …]
A: Now moe’k as de weerlocht mien vrouw mar es even bellen. Es kieken wat de vrouw d’r van daenkt…
Ja, mit mi’j. Moej’ es luusteren. Now staon ze hier in de riegel om dat
plakkien van oolde Triensje mar daor wol ie toch ok zo graeg henne? (…)
Ja, vanzels bin ik de man die d’r uutaenlik over giet mar in disse
sietewaosie bin ‘k zo bange dat ze d’r aachter kommen en dat kan mi’j
hier de kop wel es kosten. (…) Dat begriep ik ok wel vanzels, mar hoe
zullen oonze jongen now studeren, as heit in de bak zit? (…) Now ik
heur et wel, ik hebbe an jow ok niks. [ Smit wat kribbig de haoke op et
toestel. ]
[ En weer giet die smerige tillefoon. …]
A: Ja, dat kun jow now wel zeggen Diekman mar et is niet oonze gewoonte
om hier zo hadde te warken. Nee.., now, veur twaelf ure is beslist
onmeugelik. (…) Ja, ik begriep wel dat jow opdrachtgever haost het mar
ik zee jow vandemorgen al eerder: we kun hier ok gien iezer mit hanen
en voeten ... (…!@#…) Dat heur ik dan wel. Dag meneer Diekman.
[ En alweer die smerige tillefoon. …]
A: Dag, meneer de netaoris. (…) Ja daor he’k van heurd… ja. (…) Ooh,
het die jow al beld. Wat zeg ie, was d’r een testement? En wat stiet
daor dan in? (…) Meuj’ dat niet zeggen. Mar we bin toch beide
ambteners, za’k mar zeggen. Ie begriepen toch wel dat ze van mi’j niks
te weten kommen zullen. (…) Ja, ja..., ja, Jan Pette, die ken ik wel,
mar die zal zoks toch in giendertied bestuveren kunnen, zol ’t wel? (…)
Oh, het die Dure-meneer jow ok al beld. (…) Ja jong.., is ’t echt
neudig dat d’r eerst een pelisie an te pas komt. Mar zol hi’j dat dan
daoromme daon hebben? Dan moej’ toch wel bikkelhadde wezen, aj’ zoks
andurven!
© Piet/er Bult
En dit is et begin nog mar...