Kastverhaeltien

Weeromme naor Verhaelen
Weeromme naor Stellingwarfs
Home


Kastverhaeltien

Moeke, moeke, wanneer gao'we ni'je kleren kopen? We zollen toch wat ni'js hebben veur de kastdaegen, reupen Jan en Hennie in koor. Ae toe now moeke, zeg now even wanneer? 't Is now deensdag..., now..., dan moe'n we dat ankem zaoterdag mar doen, zee moeke. Kan 't morgenmiddag niet, dan biwwe toch vri'j en de winkels bin dan wel eupen. Nee, morgen he'k wel wat aanders te doen. We holen et op ankem zaoterdag en dan gaon we morgens niet te laete. Dan nemen we de bus van vuuf over negen. Is dat goed?

Wat duurden die peer daegen nog laank. Et wol die weke mar gien zaoterdag wodden. Op schoele hadde Hennie et al tegen de juffer verteld  en Jan har et ok al tegen meester zegt, dat ze ankem zaoterdag mit de bus naor de stad gaon zollen om ni'je kleren te kopen. Op heur vri'je woensdagmiddag gongen de kiender naor de briede sloot van de buurman te scheuvelen. Daor weren nog vule meer kiender van de buurt en d'r weren ok een peer oolders. De buurman zels was mit een oolderwetse lange bessem -zoe'n bessem van een hekse-, wat sni'j an 't rumen op de sloot, zodat d'r een mooie baene in lag om te scheuvelen. De donderdag en de vri'jdag kreupen mar hiel langzem veurbi'j.

Aendelik was 't dan zoveer, zaoterdag. Al veur zeuven ure wodde Jan wakker en hi'j maekte Hennie ok votdaoliks wakker. Kom, vlogge wassen en kleren antrekken, want dan gaon we daolik om ni'je kleren. Al veur achten hadden ze een stokkien bolle en een beker melk op.

(...)


© Piet/er Bult

Iene van de anzetties veur een bundeltien kastverhaelties veur kiender...