Klein steerntien

Weeromme naor Verhaelen
Weeromme naor Stellingwarfs
Home


Klein steerntien

Roem twintig jaor was hi'j al een mannegien-van-alles bi'j de klub, zien klub! De hieltied zorgd dat de kliedkaemers schone en netties weren. Aovends invalen veur de bardienst, ni'je leden maeken en (soms alderdeegst in de regen) mit lotties langs de deuren te sutelen om et saldo in de kas een betien an te dikken. Altied ston hi’j klaor. Niks was him tevule west. 't Hadde him (en zien vrouw) al-mit-al in die dikke twintig jaor een protte energie en nog vule meer tied kost. Nooit haj’m heurd. Hi'j har et altied graeg daon veur zien klub.

Een peer jaor leden was hi'j -nog mar aachter in de vuuftig- vervroegd mit pensioen gaon. Hi'j har doe aorig meer vri'je tied kregen en docht d'r over om nog wat aktiever te wodden veur zien klub. Zonder d'r al te vule woorden an smerig te maeken was hi'j uut 'm zels begonnen mit een treningsrontien veur de jeugd. De jeugd was d'r in zien ogen altied al een betien bi'jinscheuten. Middags om halfviere ston hi'j de jonges op te waachten bi'j schoele om lid te wodden en mit te doen. Elke woensdagmiddag was hi'j mit zien koppeltien jongen op 't veld in de weer.

"Hebben jow eins wel een trenersdiploma?" vreug d'r op een dag iene van 't heufdbestuur. Zoe’n kerel mit een strik veur, diej’ aanders nooit zaggen.
"Nee, moet dat dan? Zo geleerd biwwe hier trouwes niet doende. 't Gaot allienig mar om wat haddelopen en zo", zee oonze man.
"Kan wel wezen, mar dat kan vandaege-de-dag niet zonder diploma" was ’t kotte kommentaor.

(...)

't Is alweer een schoffien leden dat oonze man uut vervelings an een volkstunegien begonnen is. Ok wel aorig mar 't geft him niet de voldoening die hi'j eerder wel har, as hi'j mit zien jongen in et veld ommeheisterde. Mar och, wat kon't eins ok schelen. Zien donneteurskaorte mit vri’je toegaank har hi’j now al meer as een jaor niet meer bruukt en de klub har tegenwoordig toch ok haost gien jeugdleden meer.




Klein steerntien

Grote steerns zeggen vaeke
't meerste stiekem tegen heurzels
dat ze zonder al die kleine steernties kunnen.

Grote steerns begriepen niet
dat d'r gien grote steerns bestaon
as d'r ok gien kleine steernties weren zollen.


© Piet/er Bult