Koekiesfebriek

Weeromme naor Verhaelen
Weeromme naor Stellingwarfs
Home


Koekiesfebriek

Sprokien?

D'r was es...
D'r was es een goedlopend febriekien dat koekies maekte. Op een dag zag de altied drokke direkteur deur et raem in zien kantoortien boven, dat et niet goed gong an de lopende baand. Wellicht was iene van de inpaksters even an 't donderjaegen mit een mannegien van de technische dienst of zo. D'r was een hiele staepel deuzen ommevalen en de eerste koekies roegelden al van de baand over de grond. Vlogge leup oonze direkteur naor beneden en perbeerde te redden wat d'r te redden was, deur zels vlogge wat deuzen op te pakken en allerhaande koekies van de lopende baand daor in te stoppen. Nao een posien kreeg hi'j d'r zuver aorighied an. Gewoon es even lekker staon in te pakken in stee van altied mar op 'e ti'jen te lopen veur zien raod van kommesaorissen, de belastinginspekteur en de meensken van de vakbond de hieltied mar te vriend zien te holen.

Liekewel hi'jzels as een protte aanderen, vunnen dat hi'j ok vule beter inpakken kon as die maegies die meerstal an de lopende baand stonnen te inpakken. De hieltied vaeker en de hieltied langer bleef oonze man op de warkvloer drok doende. Iederiene leek dik tevreden zoas et now an de lopende baand gong. Hi'j dee et wark van wel twie of drie van die inpakmaegies. An 't begin van de baand en an 't aende stonnen hoe langer hoe meer mit de hanen in de buse toe te kieken hoe goed of de inpakkeri'je now wel niet leup. Gieniene had bliekber deur dat de inkopers niet meer anstuurd wodden en dat de verkopers d'r ok mar een pottien van maekten de laeste tied. Et kwam uutaendelik zoveer dat d'r daegs haost gien meenske nog naor de febriek toe gong omreden de direkteur et haost allemaole wel allienig of kon.

Nao nog een posien en nog een posien stoekte et opiens wat op de inpakkeri'je. D'r was haost niks meer in te pakken want d'r kwammen haost gien koekies meer uut de ovend over de lopende baand. Doe oonze inpakker zien ogen eupen dee en es goed om him henne keek, bleek dat de maelveurraod haost op was, de ovend haost niet meer braande en dat et pakhuus haost an de kop toe vol ston mit onverkochte en zuver al wat beschimmelde koekies. Doe de inpakdirekteur vlogge naor boven, naor zien kantoor toe leup, schrok hi'j slim van de staepels en nog es staepels post en allerhaande aandere papperassen. Hi'j was hielendal opgaon in zien inpakwark zodat een protte wark waor hi'j eins veur inhuurd was, liggen bleven was.

Mit et zwiet drie laogen dik op 't veurheufd biesde de man deur zien bedrief. Waor is iederiene? Waor bin de inpakmaegies? Waor bin de kommesaorissen? Waorom het gieniene mi'j waorschouwd?
(...)
't Zal nog een hiele toer wodden om d'r weer die goeddri'jende febriek van te maeken die et eerder was!


© Piet/er Bult