Ladys finest

Weeromme naor Verhaelen
Weeromme naor Stellingwarfs
Home


Lady's Finest...

Alle jaoren etzelde gedonder: wat moe'k heur now weer op 'e jaorig geven. Ze het ommes alles al, wat ze niet het hoeft ze ok niet te bruken en as ze wat tekot komt, dan haelt ze et mar. Ik gong toch mar even naor de winkel, al was 't alliend mar veur et idee da'k mien best daon hadde. Now, zo...

A'k even een ni'je batteri'je mitnemen wol.
- Hoe'n iene?
- Now, zoe'n iene, zoe'n grote, weej' wel?
- Waorveur dan?
- Dat zeg ik je niet.
Et duurde even ... mar doe vul et kwattien en wus ik genoeg.

Ikke naor de winkel en zegge tegen et winkelmaegien:
- De vrouw het de batteri'je leeg, hej' ok een ni'jen iene.
- Hoe'n iene?
- Now, zoe'n iene, zoe'n grote, weej' wel?
- Waorveur dan?
- Dat zeg ik je niet.
Et duurde even ... mar doe vul et kwattien en wus ze genoeg.

- Nee, die maote die he'k niet meer op veurraod, die moe'k bestellen. Wanneer het ze 'm neudig?
- Now ja, eins niet eerder as woensdag want dan gao ik weer veur een peer weken vot en zoe'n groot schip waacht niet op mi'j.
- Hè, wat vervelend now, ik zal nog es aachter kieken.
  (...)
- Nee heur, gien iene meer. Wa'k wel vun is disse, een hiele naegelni'je mit 'n goeie batteri'je d'r in, mar dat zal heur wel wat te grof wodden, bin 'k bange.
- Tja, mar ie moe'n wel es wat en ie doen wel es wat, om je vrouw te plezieren.
- Dat is vanzels wel zo.
- Wat mark is 't?
- Een mark zie 'k zo gauw niet, mar dit staot d'r wel 'Lady's Finest' in zwierige letters.
- Wat kost die?
- Even kieken, 'k zie et zo gauw niet staon.
- Is 't wat?
- Een hiele beste. 'k Bruuk 'm zels ok wel. Ah, hier staot et, 't is gien hiele dure 34,95 mar.
- Now, a'k heur daor een plezier mit doen kan, dan moet dat mar wezen.
- Is 't een kedogien?
- Ja, hoe raod 'ie et zo, of kennen jim mekeer?
- Niet da'k wete, mar vrouwluden weten wat vrouwluden willen.
- Ja, ja, dat zal et wezen.
- Dat is dan 34,95. Woj' et bonnegien ok mitnemen veur de administraosie?
- Nee, dat hoeft niet, en laot die stuver ok mar zitten. Ik bin al lange bliede dat ze now heur tanen weer elektrisch poetsen kan, a'k een goeie weke van huus bin.

© Piet/er Bult