Lukas 10:25-37

Weeromme naor Verhaelen
Weeromme naor Stellingwarfs
Home


Lukas 10:25-37

Et ienigste wat van belang is

25 D’r kwam een wetgeleerde die him op de proef stellen wol.
     Hi’j vreug: "Meester, wat moe’k doen om pat an et iewige leven te kriegen?"
26 Jezus zee doe: "Wat staot d’r in de wet schreven? Wat lezen jow daore?"
27 De wetgeleerde zee: "Hebbe de Heer, jow God, lief mit hiel je hatte en mit hiel je ziel en mit hiel je kracht en mit hiel je verstaand, en je naoste as jezels."
28 "Dat hebben jow goed zegd," zee Jezus tegen him.
     "Doe dat en jow zullen leven."
29 Mar de wetgeleerde wol him rechtveerdigen en vreug an Jezus: "Wie is mien naoste?"
30 Doe vertelde Jezus him dit: "D’r was es iene die van Jeruzalem naor Jericho reisde en onderwegens deur rovers overvalen wodde, die him zien kleren uutstruupten, him mishaandelden en him doe halfdood liggen leuten.
31 Bi’j toeval kwam d’r een priester langes, mar doe hi’j et slaachtoffer liggen zag, leup hi’j mit een boge om him henne.
32 D’r kwam ok een Leviet langes, mar bi’j et zien van et slaachtoffer leup hi’j ok mit een boge om him henne.
33 Mar een Samaritaon, die op reize was, kreeg medelieden doe hi’j him liggen zag.
34 Hi’j gong naor de gewonde man toe, geut eulie en wien over zien wonden en dee daor een verbaand om henne.
     Hi’j zette him op zien eigen ezel en brocht him naor een harbarge, waor hi’j veur him zorgde.
35 De aanderemorgens gaf hi’j twie denarie an de harbargier en zee: "Zorg veur him, en as jow meer kosten maeken moeten, za’k jow die op de weerommereize bi'jbetaelen."
36 Wie van disse drieje is neffens jow de naoste van et slaachtoffer van de rovers wodden?"
37 De wetgeleerde zee: "De man die medelieden mit him toond het."
     Doe zee Jezus tegen him: "Doen jow dan van now of an krek zo."


© Piet/er Bult