Molekulen en atomen

Weeromme naor Verhaelen
Weeromme naor Stellingwarfs
Home


Molekulen en atomen

Een schoffien leden ston d’r in de kraante dat een reket van Europa op Mars laanded was mar veerder niks meer van him heuren laoten har. Een weke laeter was d’r ok zoe’n ding van Amerike op Mars ankommen en die het doe wel wat van zich heuren laoten. Nog even eerder ston d'r in de kraante dat de Nasa van Amerike ok een ni’j organisch molekuul in de ruumte ontdekt het. Doe’k wieder las ston d'r, dat dit de eerste opwiendende(!) uutkomst is van een ni'j onderzuuk mit een ni'je ruumtetelescoop van een stok of 'tig'- miljoen dollar. Ze vunnen dat molekuul op roegweg zoe'n 3,25 miljard lochtjaoren afstaand van de eerde. Zie, daor kuwwe wat mit vanzels. Krek as wi'j hier zels nog gien genoeg molekulen hebben.

Zoe'n berichien ropt bi'j mi'j vanzels vule meer vraogen op as dat et antwoorden geft. Wie daenkt die Nasa wel dat ze is! Ik hebbe al meer as genoeg an mien eigen onderzuken van alledag. En wat is now weer een organisch molekuul? Et woordeboek d'r bi'j en dat zegt dat een molekuul et kleinste ondeelbere pat is van een stof mit alle eigenschoppen van die stof. Een organisch molekuul is zoiets as een molekuul van een levend organisme of van een chemische verbiending. Zoe'n molekuul kan in 't slimste geval nog es dield wodden in atomen. Mooie dure woorden veur de verpakking mar et giet ze vanzels om de inhoold, die atomen.

En die drie-komma-vuventwintig miljard lochtjaoren hoeveer zol dat ongeveer wezen? Weer et grote boek d’r bi’j en dat zegt dat ien lochtjaor krapan tienduzend-miljard kilemeter is. Da's roem drieenzestigduzend keer heen-weeromme van de eerde naor de zunne. Now moej' de rest zels mar even uutrekenen want et wodt mi'j now al zwat veur de ogen. En rekenen het nog nooit mien starkste kaante west.

Mar wat hebben ze d'r now mit veur om zoe'n allemachtig klein ding te zuken en zoveer van huus. Awwe hier es wat zuken dan wodt d'r al gauw zegd dat we d'r niet an beginnen want da's zuken naor een spelde in een hujbarge. Now, waorom dan wel zo veer van huus zuken naor zoe'n onogelik molekulegien zoj' zeggen. Van die atomen kun ze weer bommen en grenaten maeken vanzels. A'k et al niet docht, ze zuken gewoon naor nog meer waopentuug! Vechten, vechten en nog es vechten. Daor schient et in 't leven om te dri'jen. Doe een jaor of wat leden bleek dat d’r op de maone gien maone-mannegies woonden, bin ze daor nooit weer west. Daor was dus niks te haelen en al hielendal niks te vechten vanzels.

Hoe laank is ’t al weer leden dat John en Yoko uut protest een weke op bedde bleven binnen om de wereld te vertellen dawwe es opholen moeten mit de hieltied ruzie te maeken en te vechten. Laot die molekulen en atomen now mar mooi blieven waor ze binnen. Veur dat geld kuj’ trouwes hiel wat eten kopen veur meensken die ’t echt neudig hebben. Nee, ’t waopentuug de wereld mar uut en as ze dan beslist een keer vechten moeten dan doen ze dat mar es mit heur blote hanen. En dan moe’n ze dat vechten es niet doen laoten deur soldaoten, mar de hoge heren moe’n zels de mouwen mar es opstrupen. Laot mi'j in de tussentied mar een betien mit de vrouw ommefrosselen.


© Piet/er Bult