Nommer 41
Weeromme naor Verhaelen
Weeromme naor Stellingwarfs
Home
Nommer 41
Jan en Hendrikkien weren 35 jaor trouwd en gavven een fesien veur de
kiender. Et mos ditkeer mar een etentien bi'j de Chinees wodden. Iene
van de jongen kwam een protte bi'j de oolde vri'jgezelle buurman over
de heerd en vreug moeke dan ok as buurman Klaos ok mit moch te diketen.
Et moch…
In twielochten toogde et hiele spul naor de Chinees. Zoas gebrukelik in
dit soorte gelegenheden kwam et dienstertien nao et eerste borreltien
langes om te vraogen wat as ze eten wollen. Vader, moeke en de kiender
weren riekelik vlogge uut de raod mar buurman Klaos hadde wat meer tied
neudig.
"Aj't niet weten" zee vader "dan zegge mar van 'nommer 41', dat begript
dat maegien dan ok wel. Dat is Babi Pangang en dat lus ie vast wel." Et
kwam krek zo vader zee, buurman kreeg Babi Pangang en vun et hatstikke
lekker.
(...)
Een week of wat naotied vreug buurman Klaos een oolde kammeraod van him
as die ok wel es naor de Chinees wol te diketen. Die hadde d'r ok nog
gienertied west mar tegere mit Klaos leek et him wel wat toe. Dezelde
Chinees zat vol mar een straote veerder was nog wel iene. Nao et
borreltien kwam een Chinese jongkerel bi'j heur an taofel om te vraogen
wat as de mannen eten wollen.
"Ik begriep hier niks van, ieje wel Klaos?" vreug buurman zien buisien an Klaos.
"Ikke wel heur" zee Klaos. "Doe oons allebeide mar een 'nommer 41'."
"Aanders ok nog wat?" vreug de ober nog.
"Nee heur, aanders niks. Doe alliend mar een 'nommer 41' asjeblief."
Bi'j disse Chinees was 'nommer 41': Portie Chinese sambal, extra heet…
© Piet/er Bult