Oold vrouwgien

Weeromme naor Verhaelen
Weeromme naor Stellingwarfs
Home


Oold vrouwgien

Vertaeling van een oold Fries verhaeltien veur kiender van Nynke van Hichtum (1860 - 1939).


D'r was es een oold vrouwgien

D'r was es een oold vrouwgien, die vun een hoolten stuver. Ze wus niet, wat ze daor veur kopen zol...

En doe kocht ze d'r een varken veur.

Mar dat varken wol niet naor huus toe gaon, of hi'j mos naor huus toe dreugen wodden.

Doe gong et oolde vrouwgien naor de hond toe: "Hond, wil ie ok varken bieten? Varken wil niet naor huus toe gaon, of hi'j moet naor huus toe dreugen wodden."
"Nee!" zee de hond.

Doe gong et oolde vrouwgien naor de stok toe: "Stok, wil ie ok hond slaon? Hond wil niet varken bieten, en varken wil niet naor huus toe gaon, of hi'j moet naor huus toe dreugen wodden."
"Nee!" zee de stok.

Doe gong et oolde vrouwgien naor et vuur toe: "Vuur, wil ie ok stok branen? Stok wil gien hond slaon, hond wil gien varken bieten, en varken wil niet naor huus toe gaon, of hi'j moet naor huus toe dreugen wodden."
"Nee!" zee et vuur.

Doe gong et oolde vrouwgien naor et waeter toe: "Waeter, wil ie ok vuur uutmaeken? Vuur wil gien stok branen, stok wil gien hond slaon, hond wil gien varken bieten, en varken wil niet naor huus toe gaon, of hi'j moet naor huus toe dreugen wodden."
"Nee!" zee et waeter.

Doe gong et oolde vrouwgien naor de osse toe: "Osse, wil ie ok waeter drinken? Waeter wil gien  vuur uutmaeken, vuur wil gien stok branen, stok wil gien hond slaon, hond wil gien varken bieten, en varken wil niet naor huus toe gaon, of hi'j moet naor huus toe dreugen wodden."
"Nee!" zee de osse.

Doe gong et oolde vrouwgien naor et touw toe: "Touw, wil ie ok osse bienen? Osse wil gien  waeter drinken, waeter wil gien vuur uutmaeken, vuur wil gien stok branen, stok wil gien hond slaon, hond wil gien varken bieten, en varken wil niet naor huus toe gaon, of hi'j moet naor huus toe dreugen wodden."
"Nee!" zee et touw.

Doe gong et oolde vrouwgien naor de moes toe: "Moes, wil ie ok touw anvreten, touw wil gien osse bienen, osse wil gien waeter drinken, waeter wil gien vuur uutmaeken, vuur wil gien stok branen, stok wil gien hond slaon, hond wil gien varken bieten, en varken wil niet naor huus toe gaon, of hi'j moet naor huus toe dreugen wodden."
"Nee!" zee de moes.

Doe gong et oolde vrouwgien naor de katte toe: "Katte, wil ie ok moes vangen? Moes, wil gien touw anvreten, touw wil gien osse bienen, osse wil gien waeter drinken, waeter wil gien vuur uutmaeken, vuur wil gien stok branen, stok wil gien hond slaon, hond wil gien varken bieten, en varken wil niet naor huus toe gaon, of hi'j moet naor huus toe dreugen wodden."
"Ja!" zee de katte.

En doe gong de katte aachter de moes...

En de moes aachter et touw, en et touw aachter de osse, en de osse aachter et waeter, en et waeter aachter et vuur, en et vuur aachter de stok, en de stok aachter de hond, en de hond aachter et varken...

En doe zee et oolde vrouwgien:
"Vrokke! Vrokke! Vrokke!
Et varken is in 't hokke!"


© Piet/er Bult (vertaeling)